வானில் தமிழர்கள் கடத்தப்படுகின்ற சம்பவங்களுடன் படையினருக்கு தொடர்புள்ளமை நிரூபணமாகியுள்ளது மனோ கணேசன் எம்.பி. அவுஸ்திரேலிய உயர்ஸ்தானிகரிடம் எடுத்துரைப்பு

வானில் தமிழர்கள் கடத்தப்படுகின்ற சம்பவங்களுடன் படையினருக்கு தொடர்புள்ளமை நிரூபணமாகியுள்ளது மனோ கணேசன் எம்.பி. அவுஸ்திரேலிய உயர்ஸ்தானிகரிடம் எடுத்துரைப்பு

வீரகேசரி நாளேடு 4/18/2008 8:48:30 AM -

அமுலில் இருக்கின்ற சட்டத்திட்டங்களுக்கு அமைவாக நாட்டில் வாழ்கின்ற எந்தவொரு பிரஜையையும் விசாரணை செய்வதற்கு படையினருக்கு பூரண உரிமை இருக்கின்றது. எனினும் அந்த உரிமையை மீறுகின்ற வகையில் படையினர் செயற்படுகின்றனர். வெள்ளை வானில் தமிழர்கள் கடத்தப்படுகின்றமைக்கு படையினருடன் தொடர்பு இருக்கின்றமை நிரூபணமாகியுள்ளது என்று மேலக மக்கள் முன்னணியின் தலைவரும் பாராளுமன்ற உறுப்பினருமான ம÷னா கணேசன் சுட்டிக்காட்டியுள்ளார். இலங்கையிலுள்ள அவுஸ்திரேலிய தூதரகத்தில் உயர்ஸ்தானிகர் கத்தே கிளக்மனை நேற்று சந்தித்து பேச்சுவார்த்தை நடத்திய போதே அவர் இதனை எடுத்துக்கூறியுள்ளார். இந்த சந்திப்பு தொடர்பாக பாராளுமன்ற உறுப்பினர் மனோ கணேசன் தெரிவிக்கையில்,

கொழும்பிலும் அதனை அண்மித்த பகுதிகளிலும் இடம்பெறுகின்ற வெள்ளை வான் கடத்தலுடன் படையினருக்கு தொடர்பு இருக்கின்றது. அண்மைய காலங்களில் வெள்ளை வானில் கடத்தப்பட்ட தமிழர்கள் குற்றத்தடுப்பு பிரிவில், நான்காம் மாடியில் அல்லது பொலிஸ் நிலையங்களில் தடுத்து வைக்கப்பட்டுள்ளனர்.

வெள்ளை வானில் ஆயுதங்களுடன் சிவில் உடைகளில் வருகின்ற இனந்தெரியாதவர்களே இவ்வாறான கடத்தல் சம்பவங்களுடன் ஈடுபடுவதாக தெரிவிக்கப்படுகின்ற போதிலும் கடத்தப்படுபவர்கள் பொலிஸ் நிலையங்களில் ,நான்காம் மாடியில் அல்லது குற்றத்தடுப்பு பிரிவில் தடுத்து வைக்கப்படுவது ஏன்? அவ்வாறு கடத்திச்சென்று தடுத்துவைத்து விசாரணை செய்வதற்கு பாதுகாப்பு தரப்பினருக்கு எவ்விதமான அதிகாரமும் வழங்கப்படவில்லை.

சிவில் உடையில் படையினரால் மேற்கொள்ளப்படும் இவ்வாறான செயற்பாடுகள் மனித உரிமைகளை அப்பட்டமாக மீறுகின்ற செயற்பாடு மட்டுமல்லாது, படையினருக்கு வழங்கப்பட்டுள்ள அதிகாரத்தை துஷ்பிரயோகம் செய்யும் நடவடிக்கையாகும். அதற்கு சர்வதேச சமூகமும் சிவில் சமூகமும் இடமளிக்கக் கூடாது என்றும் எடுத்துரைத்துள்ளேன் என்றார்..