இரண்டு ரூபாய் குறைந்ததால் பேருந்திலிருந்து தள்ளிவிடப்பட்ட தந்தை, மகள் சாவு

[கறுப்பன்]

இரண்டு ரூபாய் குறைந்ததால் பேருந்திலிருந்து தள்ளிவிடப்பட்ட தந்தை, மகள் சாவு

ஜார்சுகுடா(ஒரிசா): டிக்கெட் கட்டணத்தைவிட இரண்டு ரூபாய் குறைவாக கொடுத்ததால் பேருந்திலிருந்து நடத்துநரால் தள்ளிவிடப்பட்ட பழங்குடியினர் ஒருவரும், அவரது நான்கு வயது மகளும் பேருந்தின் சக்கரங்களில் நசுங்கி உயிரிழந்தனர்.

ஒரிசா மாநிலம் ஜார்சுகுடாவிலிருந்து ஐந்து கிலோமீட்டர் தொலைவிலுள்ள தால்பட்டியாவில் இச்சம்பவம் நடந்தது.

இதுபற்றி போலீசார் கூறியதாவது:

முப்பந்தைந்து வயதான பழங்குடியின நபர் சனிச்சார் தோப்போ செவ்வாய்க்கிழமை தனது மகளுடன் பேருந்தில் ஏறினார். தன்னிடம் பணம் இல்லாததால் சரியான டிக்கெட் கட்டணத்தை அவரால் கொடுக்க இயலவில்லை. டிக்கெட் கட்டணத்தில் குறைவாக இருந்த இரண்டு ரூபாயை நடத்துநர் தொடர்ந்து கேட்டுக்கொண்டிருந்தார்.

அவர் பயணம் செய்யவிருந்த தூரத்துக்கான டிக்கெட் கட்டணம் பத்து ரூபாயாகும்.

இரண்டு ரூபாயை கொடுக்காததால் பேருந்து நகரத் தொடங்கியதும், தோப்போ மற்றும் அவரது மகளை நடத்துநர் பேருந்திலிருந்து வெளியே தள்ளினார். இதில் அவர்கள் பேருந்தின் சக்கரங்களில் சிக்கி உயிரிழந்தனர்.

நடத்துநரும், ஓட்டுநரும் பின்னர் கைது செய்யப்பட்டனர்.

இந்த சம்பவத்தையடுத்து உள்ளூர் மக்கள் மற்றும் பயணிகள் அந்த பேருந்துக்கு தீவைத்தனர். மேலும் மாநில நெடுஞ்சாலையில் சிறிது நேரம் மறியலில் ஈடுபட்டனர். பின்னர் போலீசார் அப்பகுதிக்கு வந்து கூட்டத்தைக் கலைத்தனர்.

இச்சம்பவத்துக்கு ஆழந்த வருத்தம் தெரிவித்த முதல்வர் நவீன் பட்நாயக், தோப்போவின் அடுத்தநிலையிலுள்ள உறவினருக்கு ரூ 1,00,000 இழப்பீடாக வழங்கப்படும் என வியாழக்கிழமை அறிவித்தார்.

dinamani.com

[தமிழ் சிறி]

இரண்டு ரூபாய்க்காக இரண்டு உயிர் போய்விட்டதே.