தமிழக மாணவர்களுக்கு கனடிய தமிழ் இளையோர் அமைப்பு நன்றி

தமிழக மாணவர்களுக்கு கனடிய தமிழ் இளையோர் அமைப்பு நன்றி

[வியாழக்கிழமை, 16 ஒக்ரோபர் 2008, 10:00 மு.ப ஈழம்] [ந.ரகுராம்]

ஈழத் தமிழர்களுக்காக தமிழகம் முழுவதும் நேற்று புதன்கிழமை வகுப்பு புறக்கணிப்பு போராட்டம் நடத்திய அனைத்து இந்திய மாணவர் பெருமன்றத்துக்கு கனடா தமிழ் இளையோர் அமைப்பினர் நன்றி தெரிவித்துள்ளனர்.

இது தொடர்பில் கனடா தமிழ் இளையோர் அமைப்பினர் வெளியிட்டுள்ள அறிக்கை:

ஈழத் தமிழர்களுக்காக கிளர்ந்தெழுந்துள்ள தமிழ்நாட்டு மாணவர் சமுதாயத்திற்கு தமிழ் இளையோர் அமைப்பு கனடா தனது நன்றிகளையும் பாராட்டுக்களையும் தெரிவித்துக் கொள்கின்றது.

சிறிலங்கா அரசின் ஆக்கிரமிப்புக்கு எதிராக தமிழினம் ஒன்றுபடும் இந்த வேளையில் அக்கொடுங்கோல் அரசிற்கு வழங்கும் உதவிகளை நிறுத்துமாறு இந்திய அரசிடம் வேண்டுகோள் விடுத்துத் தமது கல்வி நடவடிக்கைகளைப் புறக்கணித்த தமிழக மாணவர் உள்ளங்களை நாம் நன்றியுடன் பார்க்கின்றோம்.

எதிர்கால நாட்டின் தூண்களான மாணவ சமுதாயம் ஈழத்தமிழர் பிரச்சினையில் தம்மையும் ஈடுபடுத்திக் கொண்டுள்ளதானது, ஈழத் தமிழர்களை தமிழகத் தமிழர்கள் கைவிடப் போவதில்லை என்பதற்கு சான்று பகிர்கின்றது.

இம் மாணவ சமூகத்தை ஒன்றிணைத்து இப் போராட்டத்தில் ஈடுபடுத்திய அனைத்து இந்திய மாணவர் பெருமன்றத்துக்கு கனடிய தமிழ் இளையோர் அமைப்பு தனது நன்றிகளையும் பாராட்டுக்களையும் தெரிவித்துக் கொள்கின்றது.

அத்துடன், ஈழத் தமிழர்களின் அல்லல்களுக்கு முடிவுகட்ட இந்திய மத்திய அரசிற்கு நெருக்குதல் கொடுக்க வேண்டும் என்றும் எம் மாணவர் உறவுகளை நாம் உரிமையுடன் வேண்டிக்கொள்கின்றோம்.

தேர்வு காலம் நெருங்கியுள்ள இவ்வேளையில் ஈழத்தமிழர்களுக்காய் ஆதரவு தெரிவிக்கும் உங்கள் இவ்வாறான செயற்பாடுகளினால் தினம் தினம் குண்டுவீச்சுக்களாலும், இடப்பெயர்வுகளாலும் அல்லலுறும் எம் தமிழ் உறவுகளுக்கு விடியல் கிட்டும் என நம்புகின்றோம்.

கனடிய தமிழ் இளையோர் அமைப்பானது நாடளாவிய ரீதியிலான இளையோர்களுக்கிடையே ஓர் தொடர்பூடல் நிறுவனமாக இளையோரினால் நடத்தப்படும் ஓர் அமைப்பாகும்.

தமிழ் இளையோரினது பலத்தை ஒன்றுதிரட்டி அதன் மூலம் கனடாவிலும் வெளிநாடுகளிலும் உள்ள தமிழ்ச் சமூகத்திற்கு உழைப்பதை நோக்கமாகக் கொண்டது என்று அதில் தெரிவிக்கப்பட்டுள்ளது.

புதினம்