இலங்கையில் தமிழர்கள் படுகொலை செய்யப்படுவதை கண்டித்து இன்று தமிழகம் முழுவதும் ஆயிரக்கணக்கான வழக்கறிஞர்கள் பட்டினிப்போராட்டம் மேற்கொண்டனர். மதுரையில் நடந்த பட்டினிப்போராட்டத்தில் மதிமுக பொதுச் செயலாளர் வைகோ பங்கேற்றார்.

இலங்கையில் சிங்கள ராணுவம் தமிழர்கள் மீது தொடர்ந்து தாக்குதல் நடத்தி வருகிறது. இதனால் ஏராளமான தமிழர்கள் உயிரிழந்தனர். இதற்கு தமிழகம் முழுவதும் கடுமையான எதிர்ப்பு எழுந்துள்ளது.

வருகிற 21ந் தேதி சென்னையில் மாபெரும் மனித சங்கிலி நடத்த முதல்வர் கருணாநிதி அழைப்பு விடுத்துள்ளார். நவம்பர் 1ந் தேதி திரைப்பட நடிகர் நடிகைகள் சென்னையில் பட்டினிப்போராட்டம் மேற்கொள்ள முடிவு செய்துள்ளனர்.

இந்நிலையில், தமிழர்கள் மீது இலங்கை ராணுவத்தின் தாக்குதலை கண்டித்து நேற்றும், இன்றும் சென்னை உயர்நீதிமன்ற வழக் கறிஞர்கள் நீதிமன்ற நடவடிக்கைகளை புறக்கணித்தனர். நேற்று அவர்கள் ஆளுநர் மாளிகைக்கு பேரணி நடத்தி, தமிழர்கள் படுகொலையை தடுத்துநிறுத்த நடுவணரசு நடவடிக்கை எடுக்க வேண்டும் என்று வலியுறுத்தும் மனுவை கொடுத்தனர்.

இன்று வழக்கறிஞர்கள் என்.எஸ்.சி. போஸ் சாலையில் நீதிமன்ற வளாகத்தையொட்டி பந்தல் அமைத்து பட்டினிப்போராட்டம் மேற்கொண்டனர். காலை 10.30 மணிக்கு தொடங்கி மாலை 5 மணி வரை பட்டினிப்போராட்டம் நடக்கிறது.

இந்த பட்டினிப்போராட்டத்திற்கு வழக்கறிஞர்கள் சங்கத் தலைவர் பால் கனகராஜ் தலைமை வகித்தார். கட்சிப் பாகுபாடின்றி வழக்கறிஞர்கள் இதில் பங்கேற்றனர். பட்டினிப்போராட்டத்தின் நடுவே அனைவரும் 2 நிமிடம் எழுந்து நின்று, சிங்கள ராணுவத் தாக்குதலில் உயிரிழந்த தமிழர்களுக்கு மவுன அஞ்சலி செலுத்தினர்.

இந்த பட்டினிப்போராட்டத்தில் வழக்கறிஞர்கள் சங்க செயலாளர்கள் வி.மோகன கிருஷ்ணன், வேல்முருகன், சமூக நீதிக்கான வழக்கறிஞர்கள் பேரவை தலைவர் கே.பாலு, மதிமுக செய்தித் தொடர்பாளர் நன்மாறன், இராம. சிவசங்கர், அறிவழகன், விடுதலை சிறுத்தைகள் கட்சிசெய்தித் தொடர்பாளர் வன்னியரசு, பெண் வழக்கறிஞர் சங்கத் தலைவி சாந்த குமாரி, செயலாளர் நளினி, முன்னாள் வழக்கறிஞர் சங்கத் தலைவர் கருப்பன், மூத்த வழக்கறிஞர் என்.ஜி.ஆர். பிரசாத், சங்கர், அப்துல் ரகுமான், முகவை ஆரோக்கியம், பாபு முருகவேள், நமோ நாராயணன் உள்பட நூற்றுக்கணக்கான வழக்கறிஞர்கள் பட்டினிப்போராட்டத்தில் கலந்துகொண்டனர்.

இந்தியப்பொதுவுடைமைக் கட்சியின் சட்ட மன்ற உறுப்பினர் மகேந்திரன் பட்டினிப்போராட்டத்தை வாழ்த்தி பேசினார். திரைப்பட இயக்குனர் சீமான், தமிழ் மையம் நிறுவனர் ஜெகத் கஸ்பர் உள்ளிட்டோரும் பட்டினிப்போராட்டத்தில் பங்கேற்றனர்.

மதுரையில் நடந்த பட்டினிப்போராட்டத்திற்கு தமிழ்நாடு வழக்கறிஞர்கள் சங்கத் தலைவர் எஸ்.பிரபாகரன் தலைமை வகித்தார். மதிமுக பொதுச் செயலாளர் வைகோ இந்த பட்டினிப்போராட்டத்தில் பங்கேற்று வாழ்த்திப் பேசினார். அப்போது அவர் இலங்கைத் தமிழர்களை காப்பாற்ற அறைகூவல் விடுத்தார்.

இதேபோன்று தமிழகம் முழுவதும் ஆயிரக்கணக்கான வழக்கறிஞர்கள் இன்று பட்டினிப்போராட்டம் மேற் கொண்டனர்.

http://www.tamilseythi.com/tamilnaadu/lawers-2008-10-17.html

மிகவும் உணர்ச்சிப்பூர்வமாக நடைபெற்றது வழக்கறிஞர்கள் போராட்டம்!!!

நன்றி நன்றி நன்றி..