பிரதமர் - முதல்வர் சந்திப்பு தள்ளிவைப்பு

புதுடெல்லி செல்லும் முதல்வர் தலைமையிலான தூதுக்குழுவின் பயணம் தள்ளி வைக்கப்படும் என்று அரசியல் வட்டாரத்தில் கூறப்படுகிறது. வரும் 4 ம் தேதிக்கு பதிலாக வேறு ஒரு தேதியில் இந்த சந்திப்பு நடைபெறும் என்று கூறப்படுகிறது.

இலங்கை தமிழர் பிரச்சனை தொடர்பாக முதலமைச்சர் கருணாநிதி தலைமையில் தமிழக சட்டசபை கட்சித் தலைவர்கள் கூட்டம் கடந்த 25 ந் தேதி நடைபெற்றது.

பிரதமர் மன்மோகன் சிங்கை நவம்பர் 28ந் தேதி எம்.பி.க்கள் குழு சந்திப்பது என்றும், 4 ம் தேதி முதல்வர் தலைமையில் சட்டசபை கட்சித் தலைவர்களை கொண்ட தூதுக்குழு சந்தித்து பேசுவது என்றும் அக்கூட்டத்தில் முடிவு செய்யப்பட்டது.

தமிழக எம்.பி.க்கள் பயண திட்டத்தில் திடீர் மாறுதல் செய்யப்பட்டது. நவம்பர் 28ந் தேதிக்கு பதிலாக டிசம்பர் 2ந் தேதி அன்று பிரதமரை சந்திப்பார்கள் என்று தமிழக அரசு சார்பில் தெரிவிக்கப்பட்டது. இதனிடையே மும்பையில் நடந்த தீவிரவாதிகள் தாக்குதல் காரணமாக அரசியலில் திடீர் திருப்பம் ஏற்பட்டது.

தலைநகர் டெல்லியில் பெரும் பரபரப்பு ஏற்பட்டது. தீவிரவாதத்தை தடுப்பதற்கான நடவடிக்கை எடுப்பதில் மத்திய அரசு தீவிரமாக ஈடுபட்டுள்ளது. மத்திய உள்துறை அமைச்சர் சிவராஜ் பாட்டீல் மாற்றப்பட்டு, அவருக்கு பதிலாக தமிழகத்தைச் சேர்ந்த மத்திய நிதி அமைச்சர் ப.சிதம்பரம் அப்பொறுப்பை ஏற்றார்.

பரபரப்பான இந்த அரசியல் சூழ்நிலை காரணமாக வரும் 4 ம் தேதி பிரதமரோடு நடைபெறுவதாக இருந்த தமிழக சட்டசபை கட்சித் தலைவர்கள் கூட்டம் தள்ளி வைக்கப்படலாம் என்று அரசியல் வட்டாரத்தில் கூறப்படுகிறது. இம்மாதம் 4 ம் தேதிக்கு பதிலாக வேறொரு தேதியில் இந்த சந்திப்பு நடைபெறும் என்று சொல்லப்படுகிறது.

இதனிடையே இந்த தூதுக்குழுவில் தாங்கள் இடம்பெறப்போவதில்லை என்று மார்க்சிஸ்ட் கம்யூனிஸ்ட் கட்சி, மதிமுக என்பன அறிவித்துள்ளன.

http://www.tamilwin.com/view.php?20IWnz20e...d42oQH3b02PLS3e