நாம் விடுத்த அழைப்பை ஏற்றே இந்திய அமைச்சர் பிரணாப் முகர்ஜி இலங்கை வருகின்றார் : போகொல்லாகம

இந்தியாவின் தூதுவராக இலங்கை வரும் அமைச்சர் தொடர்பில் நான் ஒரு மாத காலத்திற்கு முன்னரே அழைப்பினை விடுத்தேன். அவர் அந்த அழைப்பினை ஏற்றுத்தான் இலங்கை வருகிறார்.

வெளிவிவகார அமைச்சின் புதிய காரியாலயத் திறப்பு வைபவத்தில் கலந்து கொண்ட வெளிவிவகார அமைச்சர் அங்கு வந்திருந்த ஊடகவியலாளர் ஒருவர் கேட்ட கேள்வி ஒன்றுக்குப் பதிலளித்துப் பேசியபோதே மேற்கண்டவாறு தெரிவித்தார்.

அவர் அங்கு தொடர்ந்து பேசுகையில் கூறியதாவது :

இன்று வெளிநாட்டில் தங்கியிருக்கும் இலங்கையர் மற்றும் வெளிநாட்டுத் தகவல்கைள் அறிந்து கொள்ள விரும்பும் எம்மவர்களிடையே தொடர்பை ஏற்படுத்திக்கொள்ள இந்தக் காரியாலயம் ஒரு கேந்திர நிலையமாக இருக்கும்.

இன்று 10 இலட்சத்துக்கும் அதிகமான இலங்கையர்கள் வெளிநாட்டில் வாழ்கிறார்கள். அவர்களுக்கு இலட்சக்கணக்கான பிரச்சினைகள் ஏற்படலாம். இதற்குப் பொறுப்புக் கூற வேண்டியவை தூதுவராலயங்களும் வெளிநாட்டு அலுவல்கள் அமைச்சுமே.

வெளிநாடுகளில் எமது தூதுரகங்கள் மற்றும் துணை தூதரகங்கள் 56 ற்கும் அதிகமாக உள்ளன. இவற்றினூடாக மட்டுமல்ல, 112 நாடுகளிலும்கூட மக்கள் உயர்நிலையையடைய வாய்ப்புள்ளது.

இந்த வய்ப்புக்களை ஸ்திரப்படுத்திக்கொள்ள எமது புதிய காரியாலயம் பேருதவி புரியும். வெளிநாட்டு அலுவல்கள் அமைச்சு மேற்கொண்டுள்ள இந்த நடவடிக்கை மக்களுக்குப் பாரிய அளவில் துணை செய்யும் என நம்புகிறோம். இதற்கு உதவி அளித்த அனைவருக்கும் நான் நன்றியைத் தெரிவித்துக் கொள்கிறேன். இவ்வாறு அவர் தெரிவித்தார்.

அச்சமயம், ஊடகவியலாளர் ஒருவர், இந்தியாவிலிருந்து தூதுவராக அமைச்சர் ஒருவர் இலங்கைக்கு விஜயம் செய்வது தொடர்பில் உங்களின் கருத்து என்ன என்ற கேள்விக்குப் பதிலளிக்கையில்,

இந்தியா சார்பில், தூதுவராக இலங்கைக்கு விஜயம் செய்யவிருக்கும் அமைச்சருக்கு நான் ஒரு மாத காலத்திற்கு முன்னரே அழைப்பு விடுத்திருந்தேன். அந்த அழைப்பை ஏற்றுத் தான் அவர் இலங்கை வருகிறார் என நம்புகிறேன் என்றார்.

கிளிநொச்சியைக் கைப்பற்றுவது ஒரு அரசியல் இலாபம் கருதியே என கூறப்படுகின்றதே, இது தொடர்பில் உங்கள் கருத்து என்ன என்று கேட்டபோது,

கிளிநொச்சி இலங்கையில் உள்ள ஒரு பிரதேசம். அங்குள்ள மக்களை பயங்கரவாதிகளிடம் இருந்து காப்பாற்றுவதே எமது நோக்கம். அதற்கான நடவடிக்கைகளையே நாம் மேற்கொண்டு வருகின்றோம். இலங்கை, இந்திய அரசு பயங்கரவாத நடவடிக்கைக்கு எதிராக ஒரே வேளையில் குரல் கொடுத்தமை குறிப்பிடத்தக்கது என்றார்.

http://tamilwin.com/view.php?203oQHHdb3dF9...c82h34ccePj0A3e