அம்பாந்தோட்டை துறைமுக நிர்மாணம் சீனத் தந்திரோபாயத்தின் ஓரங்கம் - அமெரிக்க இராணுவ ஆய்வறிக்கை

அம்பாந்தோட்டை துறைமுக நிர்மாணம் சீனத் தந்திரோபாயத்தின் ஓரங்கம் - அமெரிக்க இராணுவ ஆய்வறிக்கை

இந்து சமுத்திரத்தில் பிரதான கப்பல் போக்குவரத்துப் பாதைகளுக்கு அண்மித்ததாக தென்னிலங்கையில் நிர்மாணிக்கப்படும் துறைமுகமானது முக்கியமான வர்த்தக மார்க்கங்களை பாதுகாப்பதற்கும் செல்வாக்கை செலுத்துவதற்குமான சீனாவின் முயற்சியின் ஓரங்கமாக இருப்பதாக அமெரிக்க இராணுவ ஆய்வறிக்கையில் தெரிவிக்கப்பட்டுள்ளது.

சீன ஒப்பந்தக்காரர்களால் அம்பாந்தோட்டையில் நிர்மாணிக்கப்படும் வர்த்தக கப்பல் களஞ்சியங்களை உள்ளடக்கிய துறைமுகமானது அரசியல் ரீதியான அனுகூலத்தைப் பெற்றுக்கொள்வதற்கும் இந்து சமுத்திரப் பிராந்தியத்தில் வல்லமையை ஈட்டிக்கொள்வதற்குமான சீனாவின் "கோர்த்த முத்துக்கள்' என்று அழைக்கப்படும் தந்திரோபாயம் என்று செய்திகள் தெரிவிக்கின்றன.

அமெரிக்க கூட்டுப்படைகளின் கட்டளைத் தலைமையகத்தை தளமாகக் கொண்ட நோர்போங்க் என்ற அமைப்பு "இணைந்து செயற்படும் சூழல் 2008' என்ற ஆய்வறிக்கையை தயாரித்திருப்பதாக "வாஷிங்டன் ரைம்ஸ்' பத்திரிகை தெரிவித்துள்ளது.

எதிர்கால முரண்பாட்டில் அமெரிக்க படைகளுடன் மோதக்கூடிய அச்சுறுத்தலான பிரதான நாடாக சீனாவை அந்த ஆய்வறிக்கை பட்டியலிட்டுள்ளது. ரஷ்யா, மத்திய கிழக்கு மற்றும் ஆசியாவின் ஏனைய பகுதிகளிலிருந்து ஏற்படக்கூடிய அச்சுறுத்தல்களில் முக்கிய இடத்தை சீனா பிடித்துவிடும் என்று குறிப்பிடப்பட்டுள்ளது.

பாரசீககுடாவின் முகப்பில் இருக்கும் பாகிஸ்தானின் கவ்டார் துறைமுகமானது கடற்படைத்தளமாகவும் கண்காணிப்பு வசதிகளை கொண்டதாகவும் இருப்பதாகவும் அத்துடன் தென் சீனக் கடலில் உள்ள பராசெல்தீவுகளில் ஒன்றான வூடித் தீவிலுள்ள விமானப் படைத்தளமும் ஆய்வறிக்கையில் உள்ளடக்கப்பட்டுள்ளன.

இவை சீனாவுக்கு பயனுள்ளவை எனவும் சீனாவின் கடல்போக்குவரத்து பாதுகாப்பு உபாயத்துக்கு உதவுவனவென்றும் பத்திரிகையில் தெரிவிக்கப்பட்டுள்ளது.

எதிர்காலத்தில் அமெரிக்க இராணுவத்திற்கு குறிப்பிடத்தக்க அச்சுறுத்தலாக சீனாவே இருக்குமென்று அமெரிக்க இராணுவ அறிக்கையில் அடையாளம் காணப்பட்டுள்ளது.

மத்திய கிழக்கிலிருந்து சீனா வரையிலான கேந்திர முக்கியத்துவம் வாய்ந்த எண்ணெய்க் கப்பல் மார்க்கத்தில் அரசியல் செல்வாக்கையும் இராணுவ பலத்தையும் கட்டியெழுப்பும் பெய்ஜிங்கின் முயற்சிகளே இவையென்றும் அவற்றை இந்த ஆய்வறிக்கை வெளிப்படுத்துவதாகவும் வாஷிங்டன் ரைம்ஸ் குறிப்பிட்டுள்ளது.

ஆனால் சீனாவின் "கோர்த்த முத்துக்கள்' உபாயத்தை மகிழ்ச்சியான நடவடிக்கைகள் என்று அமெரிக்காவிலுள்ள சீனத்தூதரகப் பேச்சாளர் வாங் பாடொஸ் குறிப்பிட்டுள்ளார்.

"துறைமுக அபிவிருத்தி உட்பட பல்வேறு துறைகளில் சில ஆசிய நாடுகளுடன் சீனா ஒத்துழைப்பு நடவடிக்கைகளை மேற்கொண்டிருப்பது உண்மை. ஆனால் இவை வர்த்தக நோக்கங்களுக்காக மட்டுமே மேற்கொள்ளப்படுபவை என்பது சீனாவினால் நியாயப்படுத்தக்கூடிய விடயம்' என்று அவர் கூறியுள்ளார்.

"சீனாவின் நடவடிக்கைகளை உணர்வுபூர்வமாகவும் சமத்துவமான அணுகுமுறையுடனும் நோக்கவேண்டும். பரஸ்பர பயன்பாடு, சமாதான நோக்கங்களை கொண்டவையே சீனாவின் நடவடிக்கைகள் என்பதை உண்மைகள் நிருபித்துள்ளன. எவருக்கும் அவற்றால் அச்சுறுத்தல் இல்லை' என்றும் அவர் கூறியுள்ளார்.

திட்டமிட்டவகையில் அம்பாந்தோட்டை துறைமுக நிர்மாணப் பணிகள் முன்னெடுக்கப்படுவதாக இங்கே துறைமுக அதிகார சபை அதிகாரிகளை மேற்கோள்காட்டி லங்கா பிஸ்னஸ் ஒன்லைன் தெரிவித்தது. சீனாவின் கடன் உதவி மற்றும் 2 சீனக் கம்பனிகளினால் இத்துறைமுக நிர்மாணப் பணிகள் இடம்பெறுகின்றன.

களஞ்சிய வசதிகளை ஏற்படுத்தும் நோக்கத்தில் முதலில் அமைக்கப்படவிருந்த போதும் பின்னர் சரக்குக் கப்பல்களுக்கான துறைமுகமாகவும் கப்பல்களிலிருந்து கொள்கலன்கள் இறக்கப்பட்டு பின்னர் பிறிதொரு கப்பலுக்கு பொருட்களை மாற்றி ஏற்றுவதற்கான வசதிகளைக் கொண்ட துறைமுகமாகவும் இது அமைக்கப்படுகிறது.

இந்து சமுத்திரத்தில் பிரதான கடல் போக்குவரத்து மார்க்கத்திற்கு சமீபமாக இருப்பதாலேயே புதிய துறைமுகத்தை நிர்மாணிப்பதற்கான இடமாக அம்பாந்தோட்டை தேர்ந்தெடுக்கப்பட்டது

http://www.swissmurasam.net/