இடம்பெயர்ந்துள்ள வன்னி மக்களுக்காக இந்து சமயப் பேரவை நிவாரணங்கள் கோரிக்கை :

இடம்பெயர்ந்துள்ள வன்னி மக்களுக்காக இந்து சமயப் பேரவை நிவாரணங்கள் கோரிக்கை :

யாழ் மாவட்டத்தில் வன்னியில் இடம்பெயர்ந்து தங்கியுள்ள முகாம்களில் அரசினாலும் ஏனைய அரச சார்பற்ற நிறுவனங்களாலும் வழங்கப்படும் உதவிகள் போதாமல் இருப்பதால் அவர்களுக்கு மேலதிக உதவிகள் தேவைப்படுவதாக யாழ்ப்பாணம் இந்து சமயப் பேரவை அறிவித்துள்ளது. இது தொடர்பாக ஊடகங்களுக்கு அது செய்திக்குறிப்பினை விடுத்துள்ளது.

இதன் பிரகாரம் நல்லை ஆதின முதல்வரும் இந்து சமயப் பேரவையின் காப்பாளருமான ஸ்ரீல ஸ்ரீ ஞானசம்பந்தர் தலைமையில் கடந்த 5ம் திகதி இடம்பெற்ற இந்து சமய அமைப்புக்களின் ஒன்றியக் கூட்டத்திற்கமைவாகவே இந்தத் தீர்மானம் மேற்கொள்ளப்பட்டுள்ளது.

இத்தீர்மானத்திற்கமைவாக வன்னியிலிருந்து யாழ் மாவட்டத்திற்கு சென்று முகாம்களில் தங்கியுள்ள மக்களுக்கு அரசினாலும் ஏனைய அரச சார்பற்ற நிறுவனங்களாலும் வழங்கப்படும் உதவிகளுக்கு மேலதிகமாக உதவிகள் தேவைப்படுவதாக அறிவிக்கப்பட்டிருப்பதால் அவற்றை தாம் அரச அதிபருக் கூடாக வழங்க உத்தேசித்திருப்பதனால் இந்து ஆலயங்கள், தர்மகத்தா சபைகள், இந்து சமய அமைப்புகள் பொது அமைப்புகள் மற்றும் உள்நாட்டு வெளிநாட்டுப் பொதுமக்களிடம் இருந்து தாங்கள் நன்கொடைகளை எதிர்பார்ப்பதாக தெரிவித்துள்ளது.

இரக்க சிந்தையுள்ள நன்கொடையாளர்கள் இந்து சமயப் பேரவையின் யாழ்ப்பாணம் ஸ்ரான்லி வீதியிலுள்ள இலங்கை வங்கியின் நடைமுறைக்கணக்கான 8944876 ற்கு வைப்புச் செய்வதினூடாக அல்லது பலாலி வீதியிலுள்ள அதன் காரியாலயத்தில் உதவிகளை வழங்குவதன் மூலமாக இந்த உதவிகளை மேற்கொள்ளுமாறு வேண்டுகோள் விடக்கப்பட்டுள்ளது.

குடாநாட்டில் தற்பொழுது வன்னிப் பேரவலத்தை சந்தித்திருக்கும் மக்களுக்காக இந்து அமைப்புக்கள் அகிம்சை ரீதியாக பல போராட்டங்களை முன்னெடுத்து வருகின்ற நிலையில் தற்போது இந்து சமயப் பேரவை முதன்முதலாக மக்களிடம் உதவிகளைப் பெற்று வழங்கப் போவதாக பகிரங்கமாக அறிவித்துள்ளது.

இந்து சமயப் பேரவையின் பல பிரமுகர்களும் பல்வேறு அச்சுறுத்தல்களுக்கு மத்தியில் இந்தப் பணிகளை ஆரம்பித்திருப்பதாக இந்து சமயப் பேரவையின் கௌரவ செயலாளர் தி. சத்தியசீலனால் விடுக்கப்பட்ட செய்திக்குறிப்பில் தெரிவிக்கப்பட்டுள்ளது.

http://globaltamilnews.net/tamil_news.php?nid=6863&cat=1