சிறிலங்காவின் தலைநகர் கொழும்பில் உள்ள நோர்வேயின் தூதரகத்தை உடனடியாக மூடிவிடுமாறு கோரி இரண்டு பிக்குகள் தலைமையில் நோர்வே தூதரகத்தின் முன்பாக ஆர்ப்பாட்டம் இடம்பெற்றிருக்கின்றது.

ஒஸ்லோவில் உள்ள சிறிலங்காவுக்கான தூதரகம் மீது தாக்குதல் நடத்தப்பட்டமையை வன்மையானன கண்டித்த இந்த ஆர்ப்பாட்டக்காரர்கள், அதற்குப் பதிலடியாக கொழும்பில் உள்ள நோர்வேயின் தூதரகம் மூடப்பட வேண்டும் என வலியுறுத்தினர்.

நேற்று வியாழக்கிழமை காலை சுமார் பிற்பகல் 1:00 மணி நேரத்துக்கு நடைபெற்ற இந்த ஆர்ப்பாட்டத்துக்கு இரண்டு பிக்குகளே தலைமை தாங்கினர் என்பது குறிப்பிடத்தக்கது.

நோர்வேயின் தூதரகம் மூடப்பட வேண்டும் எனவும் இதற்கு அரச தலைவர் மகிந்த ராஜபக்ச உடனடியாக நடவடிக்கை எடுக்க வேண்டும் எனவும் ஒஸ்லோவில் உள்ள சிறிலங்காவின் தூதரகம் தாக்கப்பட்டதைக் கண்டித்தும் இந்த ஆர்ப்பாட்டத்தின் போது முழக்கங்கள் எழுப்ப்பட்டன.

ஆர்ப்பாட்டத்தின் இறுதியில் தூதரகத்துக்குள் பிரவேசித்த ஆர்ப்பாட்டக்காராகள் தமது கோரிக்கைகளை வலியுறுத்தும் மனு ஒன்றையும் கையளித்துச் சென்றுள்ளனர்.

இந்த ஆர்ப்பாட்டத்தை முன்னிட்டு நோர்வேயின் தூதரகப் பகுதியில் கடுமையான பாதுகாப்பு ஏற்பாடுகள் செய்யப்பட்டிருந்தன.

இதேவேளையில் ஒஸ்லோவில் உள்ள சிறிலங்காவின் தூதரகம் மீதான தாக்குதல் நோர்வேயின் ஆதரவுடனேயே மேற்கொள்ளப்பட்டுள்ளது எனத் தெரிவித்திருக்கும் தேசிய சுதந்திர முன்னணியின் தலைவர் விமல் வீரவன்ச, நோர்வேயுடனான அனைத்து இராஜதந்திர உறவுகளையும் உடனடியாகத் துண்டித்துக்கொள்ள வேண்டும் என வலியுறுத்தியிருக்கின்றார்.

கடந்த காலங்களில் நாட்டின் தேசியப் பிரச்சினைக்கு உதவுவது போலக் காட்டிக்கொண்டு நாட்டைத் துண்டாடும் விடுதலைப் புலிகளின் முயற்சிகளுக்கு உதவிகளையே நோர்வே வழங்கி வந்திருக்கின்றது எனவும் தெரிவித்த அவர், உள்நாட்டில் நோர்வேயின் செயற்பாடுகள் அனைத்துக்கும் தடை விதிக்கப்பட வேண்டும் எனவும் வலியுறுத்தியிருக்கின்றார்.

புதினம்

மூடுங்கோ, மூடுங்கோ, மூடுவிழாநடத்தி வெளியேற்றிவிடுங்கோ. உங்களுக்கு சார்பாக வந்தவர்களை நீங்கள் துரத்துவதுதான் முறை.