ஈழ தேசமே எங்கள் வாழ்வு

ஈழமணித் திருநாட்டில் சுற்றிவரும் அலையோசை

வளங்கொழிக்கும் குளிர்வாடை நாட்டிடையே ஆர்ப்பரிக்க

வடதிசை யொலிக்கின்ற ஓங்கார நாதமுமே

நடைபோடும் நல்லுலகின் யேசுபிரான் நாமமும்

கீழ்த்திசை யலையோடு குர்ஆனும் ஒலிகேட்க

திரிகரண சுத்தியுடன் திடமாக நின்றறிருந்தால்

பரிவில்லாச் சிங்களனும் பார்த்துமே பறந்திருப்பான்

தமிழனிற்குள் தனித்தொரு அணிபிரிந்து அழியாவண்ணம்

வழிவழியே வையகத்தில் வசையான கேலிக்கதை

நிலையாமல் நெஞ்சத்தில் நிறுத்தி நாளும்

கலையாத கருத்தோடு காண்கின்ற ஒற்றுமையுள்

ஈழமண்ணின் கனிச்சுவையும் இனிப்பான நன்னீரும்

பாணன் தன் புகழ்சூழ்ந்த யாழ்ப்பாண நகர்தன்னில்

தங்கத் தமிழ்மக்கள் தனித்தோர் கோலோச்ச

மங்காத மறவர்கள் மரணித்து விதையாகி

வஞ்சக எதிரிகளை வென்றெடுத்து தரணியிலே

வாஞ்சைமிகு ஈழதாகம் வகையுடனே மலர்ந்திடவே

விழியினைக் காத்திடும் இமையதனின் செயலதுவாய்

அழிவினைக் காத்துமொரு அன்புநெறி கடைப்பிடித்து

பாய்ந்துவரும் புலிக்கொடியும் பறக்கவெங்கள் ஈழத்தில்

ஓயாது குரலெடுத்து எங்கள் பணியெடுத்துநின்று

தாயெனுந் தமிழீழம் தரணியிலே மிளிரவேண்டி

அவரவர் விரோதமதை அவனியிலே பரப்பிடாமல்

எவரவர் நாமுளரோ அனைவருமே தமிழரென

திசையெங்கும் கரமிணைத்து தீந்தமிழ் உறவாகி

வசைபாடா நிலையுறுத்தி வன்மைகொள் ளுறுதியுடன்

எத்தனைநாள டிமையிலே ஏங்கிநாம் தவிப்பதென்று

சித்தத்தில் நமக்கிருக்கும் சொந்தங்கள் துயரத்தை

கதறியழுதாலும் கயவரின் கொடுமைகளால் யழிவதனை

நாடுக ளறிந்திருந்தும் நமக்கேதும் உதவவில்லை

நாடுகள் கூடியங்கே நலன்செய்வார் அரசிற்கே

உண்ணா நோன்பிருந்தும் உலகெங்கும் பேரணிகள்

எண்ணக் கருத்துக்களை எடுத்துநா மொலித்தாலும்

அத்தனையும் நிறைவேற்றி வைப்பதாய் உறுதிமொழி

புத்திசொல்லி புரிந்துணர்வை புகுத்தியதால் கைவிட்டார்

மக்களவை நம்பியது மனதார நிகழவில்லை

நிற்கதியாய் போனவெங்கள் தாகமது தீரவில்லை

எந்நாளும் கொடுமையங்கே என்செய்வோம் நாமிங்கே

ஓங்குங் குரலதனை ஒருமித்து கூறுதற்கு

பங்குகொள்ள பாரிலுள்ளோர் பறந்தோடி யிணைந்திடுவீர்