இலங்கை மீதான விசாரணைக்கு ஐநா உதவும் - வலியுறுத்துகின்றார் நவநீதம்பிள்ளை

Edited June 5, 200916 yr by தேசம்

நம்பியார் கண்டு திரும்பியதைச் சொல்லமாட்டேன் என்றார். பான் கி மூனோ தான் எதையுமே காணவில்லை என்றார். சர்வதேச கூட்டு விசாரணைக்கு ஐ.நா உதவும் என்கிறார் நவநீதம். நடந்துமுடிந்த ஈழப்போரில் ஏற்பட்ட மனித அவலம் மற்றும் மனிதாபிமானமற்ற போர்குற்றங்கள் என்பனவற்றை விசாரிப்பதற்கு இப்படியே நாட்களை இழுத்தடித்துச் சொல்வது உலகசமுதாயம் எமது விடயத்தில் காட்டும் அக்கறையின்மையே என்ற தோற்றம் எமது மனதில் எழுந்தாலும் அது இன்னுமொரு பக்கத்தையும் கொண்டிருக்கிறது என்பதை இங்கு கூறித்தான் ஆகவேண்டும். இனவாத சிறிலங்காவால் புலிகளுக்கெதிரான போரை பயங்கரவாதத்துக்கெதிரான யுத்தமாக முத்திரைகுத்தப்பட்டு ஒரு இனஅழிப்பு நடவடிக்கை முன்னெடுக்கப்பட்டு பல உலகநாடுகளின் ஆசீர்வதத்துடனே மகிந்த அரசு செய்து முடித்துள்ளது. இந்நாடுகளில் சில சிறிலங்காவுக்கெதிராக ஐ.நாவில் கொண்டுவரப்படும் தீர்மானங்களைத் திட்டமிட்டு தடுத்தும் வந்திருக்கின்றன. இந்நிலையில் சர்வதேச கூட்டு விசாரணை என்பது ஒரு கண்துடைப்புக்கேதான். தமக்கெதிரான போர்த் தடையங்களை மிக நேர்த்தியாக துடைத்தழித்துவரும் சிறிலங்கா இராணுவம் சிலவற்றை வேண்டுமென்றே மாற்றியமைக்கவோ அல்லது தயாரித்து வைக்கவோ முடியும். ஏனெனில் விசாரணை என்று ஒன்று நடந்தால் அது போரில் ஈடுபட்ட இரண்டு தரப்பினருக்கும் எதிரானதாகவே இருக்கும். எனவே சர்வதேச கூட்டு விசாரணைகளில் ஆதாரங்கள் கண்டறியப்படுமிடத்து அவற்றை பிடிபட்ட, சரணடைந்த அல்லது தேடப்பட்டுவரும் புலி உறுப்பினர்களை தண்டிப்பதற்கு ஆதாரமாக சிறிலங்கா அரசு அதை எடுத்துக்கொள்ளலாம். நாம் சிறிலங்காவைத் தண்டிக்கவேண்டும் என்று சர்வதேசத்தை நோக்கி கூக்குரலிட்டுக்கொண்டிருக்க அது எங்களுக்கெதிராகவே திரும்புவதற்கு நிறையவே சாத்தியக்கூறுகள் உள்ளன. மீண்டும் வெறுங்கையோடு திரும்பப்போவது தமிழன் தான் என்று வைத்துக்கொண்டாலும் ஐ.நா இங்கு இரட்டைவேடம் போடுகிறது என்பது கண்கூடு. அணுசக்தி நிலையங்களை பார்வையிட வடகொரியாவுக்கும் ஈரானுக்கும் பார்வையாளர்களை அனுப்ப ஐ.நாவுக்கு இரண்டொரு நாட்கள் போதுமென்றால் இலங்கையில் நடந்த மனித அவலத்தை ஆதாரங்களுடன் கண்டறிய ஏன் இத்தனை இழுபறி?. போரில் கொல்லப்பட்ட அல்லது காணாமல்போன தமிழ்மக்களின் எண்ணிக்கையை ஐ.நா வேண்டுமென்றே குறைத்து இருட்டடிப்புச் செய்தது ஏன்?