விடுதலைப் புலிகளுடனான தொடர்பு பற்றியே குற்றப் புலனாய்வுத்துறையினர் என்னிடம் விசாரித்தனர்: மங்கள சமரவீர தகவல்

அப்போதைய அரசின் தேவைகளுக்காகவே தான் தமிழீழ விடுதலைப் புலிகளுடன் தொடர்புகளை ஏற்படுத்தியதாகத் தெரிவித்திருக்கும் சிறிலங்கா சுதந்திரக் கட்சியின் மக்கள் பிரிவுத் தலைவர் மங்கள சமரவீர, குற்றப் புலனாய்வுத்துறையினர் தனது இந்தத் தொடர்புகள் பற்றியே தன்னிடம் நேற்று விசாரணைகளை மேற்கொண்டதாகவும் தெரிவித்தார்.

குற்றப் புலனாய்வுத்துறைக்கு நேற்று வியாழக்கிழமை அழைக்கப்பட்ட மங்கள சமரவீர, அங்கு வைத்து நீண்ட நேரம் விசாரணைக்கு உள்ளாக்கப்பட்டார். அவரிடம் இருந்து விரிவான வாக்குமூலம் ஒன்றையும் காவல்துறையினர் பெற்றுக்கொண்டனர்.

இந்த விசாரணைகளின் முடிவில் கொழும்பில் உள்ள எதிர்க்கட்சித் தலைவரின் அலுவலகத்தில் ஊடகவியலாளர்களை மங்கள சமரவீர தெரிவித்தார். தன்மீதான விசாரணைகள் தொடர்பாக அங்கு அவர் விளக்கிக் கூறினார்.

"தமிழீழ விடுதலைப் புலிகள் அமைப்பினருடன் எனக்கு உள்ள தொடர்புகள் பற்றியும், முக்கிய பிரமுகர்கள் மீதான தாக்குதல் திட்டங்கள் தொடர்பாகவுமே காவல்துறையினர் என்னிடம் விசாரணைகளை மேற்கொண்டனர். அரசின் செயற்பாட்டுக்காகவே விடுதலைப் புலிகளின் அரசியல்துறையினருடன் அன்றைய காலகட்டத்தில் நான் தொடர்புகளை ஏற்படுத்திக்கொடுத்தேன்.

அரசின் தேவைகளுக்காகவும், வடக்கின் அபிவிருத்திக்காகவும் விடுதலைப் புலிகளுடன் தொடர்புகளை ஏற்படுத்தித் தருமாறு தற்போதைய அரசுதான் அப்போது என்னைக் கேட்டுக்கொண்டது. அதற்கு இணங்கவே எமில் காந்தன் என்ற வியாபாரி ஊடாக விடுதலைப் புலிகளுடன் சந்திப்புக்களை ஏற்படுத்திக்கொடுத்தேன்.

இவ்வாறான சந்திப்புக்களில் ஒரேயொரு சந்திப்பில் மட்டும்தான் நான் கலந்துகொண்டேன். ஏனைய சந்திப்புக்கள் எதிலும் நான் கலந்துகொள்ளவில்லை. இதனைக் காரணம் காட்டி எம்மை விசாரணைக்கு உட்படுத்தி எமது அரசியல் செயற்பாடுகளை முடக்குவதுதான் அரசின் நோக்கமாகும்.

இந்த அரசு அரசியல் கட்சிகளுக்கு எதிராரகச் யெற்பட்டு வருகின்றது. குற்றப் புலனாய்வுத்துறையினர் என்மீது மேற்கொண்ட விசாரணைகளின் பின்னணியில் அரசே உள்ளது.

அரசு எத்தகைய நடவடிக்கைகளை மேற்கொண்டாலும் அரசின் அடக்குமுறைகளுக்கு நாம் அடிபணியப் போவதில்லை. ஜனநாயகத்தைப் பாதுகாக்க கூட்டணியாக நாம் போராடுவோம்.

புதினம்