கரை ஒதுங்கியோரை அடையாளம் காண யாழ். செல்லும் தமிழ்நாடு கடற்றொழிலாளர் சங்க உறுப்பினர்கள்

யாழ்ப்பாணம் தீவுப் பகுதிகளில் கடந்த நான்கு நாட்களில் கரை ஒதுங்கிய ஏழு உடலங்களும் தமிழ்நாடு கடற்றொழிலாளர்களினதாக இருக்கலாம் என சந்தேகம் தெரிவிக்கப்பட்டுள்ள நிலையில், இவற்றை அடையாளம் காண்பதற்காக தமிழ்நாடு கடற்றொழிலாளர் சங்க உறுப்பினர்கள் ஏழு பேரைக்கொண்ட ஒரு குழு கொழும்பு வழியாக யாழ்ப்பாணம் செல்லவிருக்கின்றது.

இந்தக் குழுவினர் குடாநாட்டுக்கு செல்வதற்கான ஏற்பாடுகளை கொழும்பில் உள்ள இந்தியத் தூதரகம் மேற்கொண்டிருப்பதாகத் தெரிவிக்கப்படுகின்றது.

உடலங்கள் தமிழ்நாடு கடற்றொழிலாளர்களினதுதான் என அடையாளம் காணப்பட்டால் அவர்களின் உலடங்களை குடாநாட்டிலேயே அடக்கம் செய்துவிட்டு இந்தக் குழு திரும்பிச் செல்லும் எனவும் இந்தியத் தூதரக வட்டாரங்கள் தெரிவித்தன.

தமிழ்நாடு கரையோர மாவட்டமான இராமேஸ்வரம், மற்றும் தனுஷ்கோடி பகுதிகளில் இருந்து இரண்டு வாரத்துக்கு முன்னர் மீன்பிடிக்கச் சென்ற எட்டு கடற்றொழிலாளர்கள் காணாமல் போய்விட்டதாக அறிவிக்கப்பட்டிருப்பதாலும், யாழ். குடாநாட்டில் இருந்து யாரும் காணாமல் போனதாக முறைப்பாடு செய்யப்படாமையாலும் கரை ஒதுங்கிய உடலங்கள் தமிழ்நாடு கடற்றொழிலாளர்களினதாக இருக்கவேண்டும் எனக் கருதப்படுகின்றது.

தனுஷ்கோடியில் இருந்து கடந்த 13 ஆம் நாள் கடலுக்கு மீன்பிடிக்க அசோக் குமார், செந்தில் குமார், முனியராஜ், நாகநாதன் ஆகிய கடற்றொழிலாளர்கள் சென்றனர்.

குறிப்பிட்ட காலத்தில் கரை திரும்பாத இவர்களில் அசோக்குமாரின் உடல் மட்டும் தனுஷ்கோடி 4 ஆம் நாள் தீடையில் கரையொதுங்கியது.

இந்நிலையில், இராமேஸ்வரத்தில் இருந்து கடந்த 15 ஆம் நாள் மீன் பிடிக்கச் சென்ற சந்திரன், மாதவன், இராதாகிருஷ்ணன், சரவணன் ஆகிய 4 பேர் உள்ளிட்ட 7 கடற்றொழிலாளர்களும் கரை திரும்பவில்லை.

இவர்கள் மொத்தம் 7 பேரின் நிலைமை என்னவாயிற்று என்று தெரியாத நிலையில் யாழ்ப்பாணக் குடாநாட்டில் உள்ள புங்குடுதீவில் 4 கடற்றொழிலாளர்களின் உடலும் எழுவைதீவில் மற்றொரு உடலமும் கரை ஒதுங்கியுள்ளதாக இராமேஸ்வரம் கடற்றொழிலாளர்களுக்கு தகவல் கிடைத்தது.

இதனையடுத்து காணாமற்போன ஏழு கடற்றொழிலாளர்களின் குடும்பத்தினர் புதன்கிழமை இராமேஸ்வரம் மீன்துறை அலுவலகம் முன்பாக திரண்டனர்.

இந்நிலையிலேயே குடாநாட்டுத் தீவுப் பகுதிகளில் கரையொதுங்கி யாழ்ப்பாண மருத்துவமனை பிரேத அறையில் வைக்கப்பட்டுள்ள ஏழு உடலங்களையும் அடையாளம் காண்பதற்காக தமிழ்நாடு கடற்றொழிலாளர் சங்க உறுப்பினர்கள் ஏழு பேர் இன்று சனிக்கிழமை கொழும்பு வழியாக யாழ்ப்பாணம் வருவதற்கான ஏற்பாடுகள் செய்யப்பட்டுள்ளன.

காணாமல் போனவர்களின் குடும்ப உறுப்பினர்கள் இதில் இணைந்துகொள்ள மாட்டார்கள் எனத் தெரிகின்றது.

புதினம்