திசநாயகத்திற்கு எதிரான தீர்ப்பு சிறிலங்கா ஊடகத்துறையை மேலும் கட்டிப்போட்டுள்ளது: ஏஎஃப்பி

அமெரிக்கா உட்பட பல நாடுகள் கடுமையாகக் கண்டித்தபோதும் தமிழ் ஊடகவியலாளரான ஜே.எஸ்.திசநாயகத்திற்கு அண்மையில் விதிக்கப்பட்ட 20 வருட கடூழிய சிறைத் தண்டனை நாட்டின் ஊடகத்துறையின் கைகளை மேலும் இறுக்கிக் கட்டிப்போடுவதற்கே வழிவகுத்துள்ளது என்று ஏஎஃப்பி செய்தி நிறுவனம் தெரிவித்துள்ளது.

சிறிலங்காவில் அறிவிக்கப்படாத தணிக்கை முறை கடந்த ஒரு வருட காலத்திற்கு மேலாக நடைமுறையில் இருந்து வரும் நிலையில் இந்தத் தீர்ப்பு ஊடகங்கள் மீதான கட்டுப்பாட்டை மேலும் அதிகரித்துள்ளதாக ஏஎஃப்பி கருத்துத் தெரிவித்துள்ளது.

திசநாயகத்தின் தண்டனைக்கு எதிராக பல்வேறு தரப்புகளும் கடும் கண்டனம் தெரிவித்திருக்கின்றன. அவை அனைத்தையும் சிறிலங்கா வெளிவிவகாரத்துறை ஒதுக்கித் தள்ளிவிட்டது.

இத்தகைய கருத்துக்கள் நாட்டின் சுயாதீனமான நீதித்துறையை களங்கப்படுத்துபவையாகவும் அதனை இகழ்பவையாகவும் இருக்கின்றன எனவும் அமைச்சு கூறியுள்ளது.

பயங்கரவாத தடைச்சட்டத்தை திசநாயகம் மீறினார் என்பதால் அவர் குற்றவாளி என நீதிமன்றம் தீர்ப்பளித்தது.

2006 - 2007 ஆம் ஆண்டில் அவர் வெளியிட்ட கட்டுரை வன்முறைகளை உருவாக்குவதற்கான அல்லது இன, சமூக நல்லிணக்கத்தை குலைப்பதற்கான முயற்சி என நீதிமன்றம் தெரிவித்தது.

"வரலாற்றில் முதல் தடவையாக ஊகத்தின் அடிப்படையில் ஒரு தீர்ப்பை நீதிமன்றம் வழங்கி உள்ளது" என்றார் மனித உரிமைகள் செயற்பாட்டாளரான நிமல்கா பெர்னாண்டோ. இவர் ஒரு சட்டவாளரும் கூட.

"அந்த எழுத்தில் வன்முறையை உருவாக்குவதற்கான எந்தச் சான்றுகளும் இல்லை. அது வெறும் ஊகம். இதனது அர்த்தம், யாருடைய எழுத்தையும் அது அமைதியைக் குலைத்தது அல்லது வன்முறையைத் தூண்டியது என்று அரசால் வாதாட முடியும் என்பதும் அவர்களைக் கைது செய்ய முடியும் என்பதும்தான்" என்றார் நிமல்கா.

ஊடகவியலாளர்களுக்கு எதிராக சட்ட நடவடிக்கைகள் எடுக்கப்படலாம் என்ற எதிர்பார்ப்பைத்தான் திசநாயகத்திற்கு எதிரான தீர்ப்பு வெளிக்காட்டுகிறது.

இவ்வாறு ஏஎஃப்பி மேலும் தெரிவித்துள்ளது.

புதினம்