சரத் பொன்சேகாவுக்கு வர்த்தக அமைச்சு செயலாளர் பதவி

சிறிலங்காவின் கூட்டுப் படைத் தளபதியும் தமிழீழ விடுதலைப் புலிகளுக்கு எதிரான போரை வழி நடத்தியவருமான ஜெனரல் சரத் பொன்சேகாவுக்கு அமைச்சு செயலாளர் பதவி வழங்கப்பட உள்ளதாக கொழும்பு அரசியல் வட்டாரங்கள் தெரிவிக்கின்றன.

அநேகமாக அவர், அனைத்துலக வர்த்தக மற்றும் ஏற்றுமதி அபிவிருத்தி அமைச்சின் செயலாளராக நியமிக்கப்படலாம் எனக் கூறப்படுகின்றது.

சிறிலங்கா தரைப்படைத் தளபதியாக அதிகாரம் மிக்க பதவியில் இருந்த பொன்சேகா, போர் முடிவடைந்ததும் அதிகாரம் ஏதுமற்ற கூட்டுப் படைத் தளபதி பதவிக்கு மாற்றப்பட்டார். இதனை அவர் விரும்பவில்லை என்பதுடன், அரச தரப்பு அவரை ஓரம் கட்டுவதற்கான நடவடிக்கைகளையும் மேற்கொண்டது.

இதனை அடுத்து நாட்டுக்காக பொன்சேகா ஆற்றிய சேவைக்கு மதிப்பளித்து அவருக்கு அதிகாரமிக்க உயர் பதவிகள் வழங்கப்பட வேண்டும் என பல்வேறு அரசியல் வட்டாரங்களிலும் இருந்து அரச தலைவர் மகிந்த ராஜபக்சவுக்கு அழுத்தங்கள் கொடுக்கப்பட்டன.

இந்த அழுத்தங்களை ஏற்றுக்கொண்டுள்ள மகிந்த ராஜபக்ச, ஜெனரல் பொன்சேகாவுக்கு அமைச்சு செயலாளர் பதவியை வழங்குவதற்கு இணங்கி உள்ளார் என்று தேசிய விடுதலை முன்னணியின் தலைவரான விமல் வீரவன்ச கொழும்பில் உள்ள வார ஏடுகளின் பத்தி எழுத்தாளர்களுக்குத் தெரிவித்துள்ளார்.

அனைத்துலக வர்த்தக மற்றும் ஏற்றுமதி அபிவிருத்தி அமைச்சராக பேராசிரியர் ஜி.எல்.பீரிஸ் பதவி வகித்து வருகின்றார். அமைச்சின் செயலாளராக எஸ்.ரணுகே பணியாற்றுகிறார். அவர் அந்தப் பதவியில் இருந்து நீக்கப்பட்டு பொன்சேகா அவரது இடத்திற்கு நியமிக்கப்படுவார் என எதிர்பார்க்கப்படுகின்றது. இதற்கான முன்மொழிவை விமல் வீரவன்சவே அரச தலைவரிடம் தெரிவித்துள்ளார் என்றும் கூறப்படுகின்றது.

பாதுகாப்பு அமைச்சின் செயலாளர் கோத்தபாய ராஜபக்ச நாடாளுமன்றத்திற்குத் தெரிவு செய்யப்பட்டதன் பின்னர், அந்தப் பதவிக்கு பொன்சேகாவை நியமிப்பதற்கும் அரச தலைவர் எண்ணம் கொண்டிருக்கிறார் என விமல் வீரவன்ச ஊடகவியலாளர்களிடம் கூறியிருக்கின்றார்.

ஜெனரல் சரத் பொன்சேகாவுக்கு அவர் தற்போது வகித்துவரும் பதவிக்கு மேலதிகமாக மற்றொரு பதவியும் வழங்கப்பட உள்ளது என அண்மையில் கொழும்பு செய்தி வட்டாரங்கள் தகவல் வெளியிட்டிருந்தன.

இதேவேளை, காயமடைந்த படையினரின் நலன்களைக் கவனிப்பதற்கான ரணவிரு சேவா சபையின் தலைவராக அண்மையில் நியமிக்கப்பட்ட, ஜெனரல் சரத் பொன்சேகாவின் மனைவி அனோமா நேற்று திங்கட்கிழமை பாதுகாப்பு செயலாளர் கோத்தபாய ராஜபக்சவை மரியாதை நிமித்தம் சந்தித்துப் பேசினார்.

காயமடைந்த படையினரின் வாழ்க்கைத் தரத்தை மேம்படுத்துவது தொடர்பில் அவர்கள் இருவரும் அந்த சந்திப்பின்போது கலந்துரையாடினர் என பாதுகாப்பு அமைச்சின் இணையத் தளம் தெரிவித்துள்ளது.

புதினம்