ஜோடிக்கப்பட்ட வழக்கில் ஆயுள் தண்டனை பெற்ற பினாயக் சென். விடுதலை செய்ய வைகோ வலியுறுத்தல்.

ஆயுள் தண்டனை விதிக்கப்பட்ட மருத்துவர் பினாயக் சென்னை விடுவிக்க நடவடிக்கை எடுக்க வேண்டும் என்று மத்திய அரசை மதிமுக பொதுச் செயலாளர் வைகோ வலியுறுத்தியுள்ளார்.

இதுகுறித்து அவர் இன்று வெளியிட்டுள்ள அறிக்கையில், "சத்தீஸ்கர் மாநிலத்தில் ராய்ப்பூர் செசன்ஸ் நீதிமன்றத்தில் மனிதநேய மருத்துவரும் மனித உரிமை போராளியுமான, மருத்துவர் பினாயக் சென்னுக்கு ஆயுள் தண்டனை விதிக்கப்பட்டுள்ளது.

தமிழ்நாட்டில் வேலூர் கிறித்துவ மருத்துவக் கல்லூரியில் மருத்துவப் பட்டம் பெற்ற டாக்டர் பினாநயக் சென் வறுமையில், ஏழ்மையில் வாடி வதங்கி மருத்துவ வசதி பெறமுடியாமல் தவித்த பாமர மக்களுக்கு இலவச மருத்துவ சேவை செய்துவந்தார்.

இந்த சேவைக்காக எண்ணற்ற விருதுகளும் பெற்றார். சட்டீஸ்கர் மாநிலத்தில் பகாசூர கம்பெனிகள் பழங்குடி மக்களின் வாழ்க்கையை வேட்டைக்காடு ஆக்கிய போது அதனை எதிர்த்து மாவோயிஸ்டுகள் போராடிய தொடங்கியதால் பகாசூர கொள்ளைக் கம்பெனிகள், பழங்குடி மக்களிலேயே ஒரு பிரிவை தயார் செய்து, ஆயுதங்களைக் கொடுத்து ரத்தக் களறிக்கு வித்திட்டார்கள்.

அம்மாநிலத்தினுடைய இயற்கை வளங்களைப் பன்னாட்டு நிறுவனங்கள் சுரண்டி கொள்ளையடிக்கும் கொடுமையை எதிர்த்துத்தான் மாவோயிஸ்டுகள் போராட்டம் தீவிரம் ஆயிற்று. அதன் தலைவர்களில் ஒருவரான நாராயண் சன்யாள் என்பவர், 74 வயதான முதியவர் நீரழிவு நோயாளியும்கூட, அவர் மிகவும் உடல்நலக்குறைவால் சிறையில் வாடுவதை அறிந்து மருத்துவர் பினாயக் சென் சிறையில் அவரைப் போய்ச் சந்தித்தார்.

அவர் தன் உடல்நலம் குறித்து நண்பர் ஒருவருக்கு எழுதிய கடிதத்தை சிறைக்கு வெளியில் கொண்டு வந்து மருத்துவர் பினாயக் சென் கொடுத்தார். ஆனால், புரட்சிக்கு தூண்டி எழுதியதாக கடிதங்களை போலீசாரே தயாரித்து டாக்டர்

பினாயக் சென் மீதும் தேசத் துரோக குற்றம் புரிந்ததாக வழக்குப் பதிவுசெய்து சிறையில் அடைத்தனர்.

தற்போது நாராயண் சென்யாலுக்கும், பிஜி குகா என்பவருக்கும், மருத்துவர் பினாயக் சென்னுக்கும் ஆயுள் தண்டனை விதித்திருக்கிறது.

பல்லாயிரக்கணக்கான உயிர்களை பறித்த போபால் நச்சுப்புகை வெடிக்க காரணமான கொடியவர்களுக்கு வெறும் இரண்டு ஆண்டுதான் சிறைதண்டனை கிடைத்தது. லட்சக்கணக்கான கோடிகளை ஊழலில் கொள்ளையடித்தவர்கள் ஆடம்பரமாக பவனி வருகிறார்கள்.

துன்புற்ற மக்களுக்கு மனித நேய சேவை செய்த மருத்துவர் பினாநாயக் சென்னுக்கு ஆயுள்தண்டனை சிறை என்ற கொடுமை ஜனநாயகத்தின் மீதும், சட்டங்களின் மீதும் மக்களுக்கு நம்பிக்கை இழக்கச் செய்கிறது.

இத்தகைய எதேச்சதிகார இருள் பரவாமல் தடுக்க மனித உரிமை இயக்கங்களும், ஜனநாயக சக்திகளும் அரசாங்கத்தை எதிர்த்து, அரசு பயன்படுத்தும் காவல்துறையைக் கண்டித்து பலத்த போர்க்குரலை எழுப்ப வேண்டும்.

மருத்துவர் பினாயக் சென்னுக்கு இழைக்கப்பட்ட அநீதியை களைய மத்திய அரசு அவரை விடுவிக்க உடனடி நடவடிக்கை எடுக்க வேண்டும்," என்று வைகோ வலியுறுத்தியுள்ளார்.

பினாயக் படம் மற்றும் வீடியோ பார்க்க....

http://www.thedipaar.com/news/news.php?id=22606