வெளிநாட்டவர்களுக்காகத் திறந்து விடப்பட்டுள்ள சிறிலங்காவின் வடபகுதி

வெளிநாட்டவர்களுக்காகத் திறந்து விடப்பட்டுள்ள சிறிலங்காவின் வடபகுதி

[ திங்கட்கிழமை, 11 யூலை 2011, 11:56 GMT ] [ நித்தியபாரதி ]

சிறிலங்காவில் உள்நாட்டுப் போர் இடம்பெற்ற காலப்பகுதியில், அதன் வட பகுதியில் பெருமளவான நிலப்பரப்பு தமிழ்ப் புலிகளின் கட்டுப்பாட்டின் கீழேயே இருந்தது.

இந்தப் பிரதேசத்துடன் கடந்த ஐந்து ஆண்டுகளுக்கும் மேலாக சிறிலங்காத் தீவின் ஏனைய பகுதிகளும், அனைத்துலக நாடுகளும் தமது தொடர்புகளைப் பேணிக் கொள்ள முடியாமல் இருந்தது.

ஆனால் யுத்தம் முடிவுற்று இருஆண்டுகள் கடந்துள்ள நிலையில், தற்போது வெளிநாட்டவர்கள் எந்தவொரு தடைகளுமின்றி சிறிலங்காவின் வடக்கிற்குச் செல்ல முடியும் என சிறிலங்கா அரசாங்கம் அறிவித்துள்ளது.

இந்த வாரத்தின் முற்பகுதியில் வெளியிடப்பட்ட இந்த அறிவிப்புக்குப் பின்னர் முதன் முதலில், தமிழீழ விடுதலைப் புலிகளின் கட்டுப்பாட்டிலிருந்த, சிறிலங்காவின் வட பகுதிக்குச் சென்றுள்ள முதலாவது ஊடகவியலாளர் பி.பி.சி.யின் சாள்ஸ் கவிலண்ட் ஆவார்.

கிளிநொச்சியிலிருந்து சாள்ஸ் கவிலண்ட் அனுப்பி வைத்த செய்திக்குறிப்பு இங்கு பிரசுரிக்கப்படுகிறது.

சிறிலங்காவின் வட பகுதிக்குள் நுழைவதற்கு முன் உள்ள சோதனைச் சாவடி மிகப் பெரியதும் பரந்ததுமாகும்.

இங்கு பறக்கவிடப்பட்டுள்ள சிறிலங்காவின் தேசியக் கொடியானது, பிறிதொரு நாட்டின் எல்லை போன்றதொரு உணர்வை வெளிப்படுத்தியது. இந்த இடத்திலேயே பலர் வடபகுதிக்குள் நுழைய முடியாதென திருப்பி அனுப்பப்பட்டனர்.

2006 இலிருந்து மூன்று ஆண்டுகளாக சிறிலங்காவின் வடபகுதியில் குருதி தோய்ந்த யுத்தம் இடம்பெற்ற பிரதேசங்களில் இருந்த மக்களின் வாழ்விடங்கள் முற்றுமுழுதாக அழிக்கப்பட்டிருந்தன.

தற்போது இடம்பெயர்ந்தோர் முகாங்களில் தங்கியிருந்த இந்தப் பகுதி மக்கள் தமது சொந்த இடங்களுக்குத் திரும்பி வந்துள்ளார்கள் என்பதை அங்கு மேற்கொள்ளப்பட்டுள்ள மரக்கறிப் பயிர்ச்செய்கை உறுதிப்படுத்தி நிற்கின்றது.

இந்த மக்கள் வாழ்ந்த வீடுகள் முற்றாக அழிக்கப்பட்டும் சேதமடைந்திருந்த போதும், இவர்கள் தமது சொந்தக் கிராமங்களுக்கே திரும்பி வந்துள்ளனர்.

இந்த இடங்களில் நிலக்கண்ணி வெடி அகற்றல் பணிகள் பூர்த்தியடைந்துள்ள போதிலும், அரச சார்பற்ற நிறுவனங்கள் தற்போதும் நிலக்கண்ணி வெடி தொடர்பான விழிப்புணர்வுக் கருத்தரங்குகளை மேற்கொள்ள வேண்டும்.

தமது சொந்த இடங்களுக்குத் திரும்பியுள்ள இந்த மக்களில் பெரும்பாலானோர் தமது குடும்பத்து உறவுகளை இழந்தவர்களாக உள்ளனர்.

அத்துடன் ஏற்கனவே பெரும் துன்பங்களைச் சுமந்து வாழ்ந்த இந்த மக்கள் தற்போது வேலைவாய்ப்பைப் பெற்றுக் கொள்வதில் மிகுந்த சிரமங்களை எதிர்நோக்கி வருகின்றனர்.

இந்தப் பிரதேசங்களில் சிறிலங்கா இராணுவத்தினரால் நடாத்தப்படும் கடைகள் மற்றும் உணவகங்கள் என்பன காணப்படுகின்றன.

இங்கே இராணுவ வீரர்கள் தேநீர் மற்றும் சிற்றுண்டிகளை பரிமாறுவது அங்கே வாழும் தமிழ்ச் சிறார்கள் நாளாந்தம் காணும் காட்சிகளாக உள்ளன.

தமிழ்ப் புலிகள் அமைப்பின் தலைவரின் பாதுகாப்புக் கோட்டையாக அமைந்திருந்த கிளிநொச்சி தற்போது ஏனைய வட பகுதியிலுள்ள பிரதேசங்கள் போன்று சிறிலங்கா இராணுவப் படைகளின் மிகப் பலமான அரண்கள் அமைக்கப்பட்டுள்ள இடமாகக் காணப்படுகின்றது.

சிறிலங்காவின் வடபகுதியில் சிறிலங்கா இராணுவத்தினரின் நடமாட்டம் என்பது அதிக தொலைவில் இல்லை.

வழிமூலம்- பிபிசி

http://www.puthinappalakai.com/view.php?20110711104259