மூன்று வயது மகனைப் படுகொலை செய்தார் என்கிற வழக்கில் யாழ். மேல் நீதிமன்றத்தால் இன்று குற்றவாளியாக காணப்பட்டு மரண தண்டனைத் தீர்ப்பு வழங்கப்பட்ட நபர் ஒருவர் அந்நீதிமன்றத்தின் இரண்டாம் மாடிக் கட்டிடத்தில் இருந்து குதித்து தற்கொலை முயற்சியில் ஈடுபட்டார்.

இவர் படுகாயமடைந்த நிலையில் யாழ். போதனா வைத்தியசாலையில் சேர்க்கப்பட்டுள்ளார். இச்சம்பவத்தால் யாழ். நீதிமன்ற வளாகத்தில் பெரும் பரபரப்பு ஏற்பட்டது. பருத்தித்துறை வல்லிபுரக் கோயிலடியைச் சேர்ந்த இராஜராஜன் இராஜகுமார்( வயது37) என்பவரே இவ்வாறு தற்கொலை முயற்சியில் ஈடுபட்டவர் ஆவார்.

இவருக்கு எதிராக யாழ்.மேல்நீதிமன்றத்தின் இரண்டாம் மாடிக் கட்டிடத்தில் இரு வழக்குகள் இடம்பெற்று இன்று தீர்ப்புக்கள் வழங்கப்பட்டன. 2003 ஆம் ஆண்டு மூன்று வயது மகனை, மகனின் இரு கால்களிலும் பிடித்து நிலத்தோடு அறைந்து படுகொலை செய்தார் என்றும், அதே காலப்பகுதியில் மனைவியின் கையை வெட்டித் துண்டாக்கினர் என்றும் குற்றஞ்சாட்டியே இவ்வழக்குகள் இடம்பெற்றன.

யாழ். மேல் நீதிமன்ற நீதிபதி எஸ்.பரமராஜா இவ்வழக்குகளை விசாரித்துத் தீர்ப்பு வழங்கினார். சாட்சிகள் மற்றும் சான்றுகளின் படி இரு வழக்குகளிலும் சந்தேகத்துக்கு இடம் இன்றி குற்றச் செயல்கள் நிரூபிக்கப்பட்டிருக்கின்றன என்றும் இதனால் எதிரியை குற்றவாளியாகக் கண்டுள்ளார் என்றும் நீதிபதி அறிவித்தார்.

மகனைக் கொன்றார் என்ற வழக்கில் இவருக்கு மரண தண்டனையும், மனைவியின் கையை வெட்டித் துண்டாடினார் என்கிற வழக்கில் ரூபாய் 25 ஆயிரம் அபராதமும் விதிக்கின்றார் என்று தீர்ப்பளித்தார்.

25 ஆயிரம் ரூபாய் தண்டப் பணத்தைச் செலுத்தத் தவறும் பட்சத்தில் இரு வருட கடூழிய சிறைத்தண்டனையை அனுபவிக்க வேண்டும் என்றும் இரண்டாவது வழக்கின் தீப்பில் நீதிபதி குறிப்பிட்டார். தீர்ப்புக்களை செவிமடுத்த எதிரி ஒருவரும் எதிர்பார்த்து இராத வகையில் மாடியில் இருந்து கீழே குதித்து விட்டார்.

http://www.tamilcnn.com/index.php?option=com_content&view=article&id=9509:2010-09-01-20-41-17&catid=54:2009-12-16-09-39-33&Itemid=410

அசல் காட்டுமிராண்டி.