இன்னும் வாழ்வதில் நம்பிக்கையற்றுப்போன குடும்பத்தின் எஞ்சிய உருப்படி இவன்தான். கடுமையான எறிகணைத் தாக்குதலொன்றில் இந்த 19வயது இளைஞனும் இவனது குடும்பத்து உறுப்பினர்கள் யாவரும் காயமடைந்து போனார்கள். இனி வாழ்வில்லை ஒன்றாய் யாவரும் பிணமாகப் போகிறோம் என்ற நினைவில் இரத்த வெள்ளத்தில் கிடந்தார்கள். இவர்களது செல்லத்தம்பி வீட்டின் கடைக்குட்டி குற்றுயிராய் துடித்ததை யாராலும் தாங்கிக்கொள்ள முடியாமல் அவனுடன் போய்விடும் நினைப்போடு இருந்தவர்களை மருத்தவத்துக்காக சேர்த்ததில் கடைக்குட்டி நினைவு தெளிந்து எழுந்தான். அத்தோடு வவுனியாவுக்குள் கொண்டு வரப்பட்டார்கள். கையையிழந்த தந்தை கையில் காயங்களுடன் அண்ணன் வயிற்றில் காயத்தோடு தங்கை கையிலும் காலிலும் காயத்தோடு தம்பி உடலில் எறிகணைச் சிதறல்களை ஏந்திய அம்மாவென குடும்பத்தில் சற்றுக் குறைந்த காயத்தோட ஆரோக்கியமானது இவன் ஒருவன் மட்டும்தான். மருத்துவம் முகாமென வாழ்வு நரமாகிப்போனது இந்தக் குடும்பத்துக்கு. குடும்பமே ஊனமான துயரில் அம்மா மனநோயாளியாகிப்போனாள். பாதியில் தடையான கல்வி அன்றாட உணவிற்கே கையேந்தும் நிலமை எல்லாத்துயரமும் இந்த இளைஞனை தன்னைத்தானே மனநோயாளியென்று சொல்லும் நிலைக்கு ஆளாக்கியிருக்கிறது. கடைக்குட்டியான இவனது தம்பி இன்று வவுனியாவில் மருத்துவம் நிறைவுபெறாத நிலமையில் இருக்கிறான். அந்தப் 15வயதுத் தம்பியை இவனே அம்மாவாய் அப்பாவாய் எல்லாமுமாய் பராமரிக்கிறான். வெளிநாட்டில் உறவுகள் வாழ்வதாகச் சொல்லும் இவன் உறவுகள் எவருமே இந்தக்குடும்பத்துக்கு ஆதரவைக் கொடுக்காத நிலமையில் தனது உறவுகளை விசாரிக்கிறான். தனது மனநோயாளியான அம்மாவுக்காக , கையையிழந்த அப்பாவுக்காக , கைபாதிக்கப்பட்ட அண்ணனுக்காக , காயமடைந்த தங்கைக்கைக்காக , உடலில் இயக்கங்கள் அறுந்து போன தம்பிக்காக உங்கள் நேசக்கரத்தை நாடி வந்திருக்கிறான்.

மேலுள்ள ஒலிப்பதிவினைக் கேட்க இணைப்பில் அழுத்துங்கள்.

இக்குடும்பத்தினருக்கு மாதாந்தம் 100கனடிய டொலர்களை வழங்க முன்வந்த கள உறவு தமிழன் அவர்களது முதலாவது கொடுப்பனவினை உரிய குடும்பம் பெற்றுக்கொண்டுள்ளது. அடுத்த கட்டம் மேற்படி குடும்பத்தினருக்கு தமிழன் அவர்கள் சுயதொழிலுக்கான உதவியை வழங்கவும் முன்வந்துள்ளார். கடந்தவாரம் எமது தொடர்பாளரினால் இலங்கைரூபா பத்தாயிரம் தமிழன் அவர்கள் சார்பாக வழங்கப்பட்டது.

கள உறவு தமிழனுக்கு எமது இதயம் நிறைந்த நன்றிகள்.