தமிழர்கள் மிருகங்கள் என்ற நினைவில் இருக்கின்றதா அரசு? செல்வா எம்.பி. ஆவேசம்

போரை முன்னின்று நடத்தியவர்கள் மனிதர்கள், போரால் பாதிக்கப்பட்டவர்கள் மிருகங்களா? தமிழ் மக்களும் ஆறறிவு படைத்த மனிதர்கள்; அவர்களும் அபிவிருத்தியுடன் சுய உரிமையுடன் வாழவேண்டும் என்பதை மஹிந்த அரசு விளங்கிக்கொள்ள வேண்டும்.

இவ்வாறு தமிழ்த் தேசியக் கூட்டமைப்பின் மட்டக்களப்பு மாவட்ட நாடாளுமன்ற உறுப்பினர் பொன். செல்வராசா தெரிவித்தார். ஜனாதிபதி மஹிந்த ராஜபக்ஷவினால் நாடாளுமன்றில் சமர்ப்பிக்கப்பட்ட 2013ஆம் ஆண்டுக்கான வரவு செலவுத் திட்டம் குறித்து கருத்துத் தெரிவிக்கும்போதே அவர் இவ்வாறு தெரிவித்தார்.

இது தொடர்பாக அவர் மேலும் தெரிவித்ததாவது:

இலங்கையின் 66ஆவதும் மஹிந்த அரசின் 8 ஆவதுமான 2013 ஆம் ஆண்டுக்கான வரவு செலவுத் திட்டத்தை ஜனாதிபதி மஹிந்த ராஜபக்ஷ நாடாளுமன்றத்தில் சமர்ப்பித்துள்ளார். ஆனால், இந்த வரவு செலவுத் திட்டத்தில் தமிழ் மக்களின் பூர்வீக தாயக இடங்களான வடக்கு, கிழக்கு மாகாணங்கள் மஹிந்த அரசால் திட்டமிட்டுப் புறக்கணிக்கப்பட்டுள்ளன.

இராணுவத்தினரின் ஆக்கிரமிப்பில் வடக்கு, கிழக்கு மாகாணங்கள் சின்னாபின்னமாக்கப்பட்டு இருக்கின்றன, ஆனால், எமது தாயகத்தை அபிவிருத்தி செய்ய திட்டங்கள் எதையும் முன்வைக்காமல் இராணுவ வீட்டுத் திட்டக்கடனுக்கு 100 கோடி ரூபாவை ஒதுக்கியுள்ளது மஹிந்த அரசு.

இது எந்த விதத்தில் நியாயமானது? வடக்கு, கிழக்கு தமிழ் மக்களை மிருகங்கள் என்று நினைத்துக் கொண்டு மஹிந்த அரசு இருக்கின்றதா? என எமக்கு சந்தேகம் எழுந்துள்ளது.

தமிழ் மக்களைப் புறக்கணித்துவிட்டு இந்த அரசு தொடர்ந்து செயற்படுமானால் இலங்கைக்கு தொடர்ந்து சர்வதேச அழுத்தம் வந்து கொண்டே இருக்கும். அதேவேளை, நாமும் சர்வ தேசத்தை நாடியே தீர்வைப் பெறுவோம். இதை மஹிந்த அரசுக்கு கூறிக்கொள்ள விரும்புகின்றோம்.

இதேவேளை, நாடாளுமன்றில் நடைபெறும் வரவு செலவுத் திட்ட விவாதங்களின் போது அரசின் திட்டமிட்ட புறக்கணிப்புக்கு எதிராக தமிழ் மக்களின் பிரதிநிதிகளான தமிழ்த் தேசியக் கூட்டமைப்பு உரத்துக் குரல் கொடுக்கும் என்றார்.

http://thaaitamil.com/?p=38180