நடுக்கடலில் தத்தளித்துக்கொண்டிருந்த 115 பேர் மீட்பு - ஒருவர் உயிரிழப்பு!

[sunday, 2013-02-03 08:10:07]

 

அம்பாறை, ஒலுவில் கடல் பிரதேசத்தில் தத்தளித்துக்கொண்டிருந்த 115 வெளிநாட்டவர்களை கடற்டையினர் மீட்டுள்ளனர். கடலில் தத்தளித்தவர்களில் ஒருவர் உயிரிழந்துமுள்ளார். பங்களதேஷில் இருந்து அவுஸ்திரேலியாவுக்குச் சென்றுகொண்டிருந்த பங்களதேஷ், மியான்மார் நாடுகளைச்சேர்ந்த 115 பேர் நடுக்கடலில் தத்தளித்துக் கொண்டிருந்தபோதே நேற்று நள்ளிரவில் கடற்படையினரால் மீட்கப்பட்டுள்ளதுடன் ஒருவர் இறந்துள்ளதாக அக்கரைப்பற்று பொலிஸார் தெரிவித்தனர். கடற்படையினருக்கு கிடைத்த தகவல் ஒன்றினையடுத்து ஒலுவில் கடலில் 70 மைல்களுக்கப்பால் கடலில் தத்தளித்துக் கொண்டிருந்த குறித்த வெளிநாட்டவர்களை நேற்று இரவு 11 மணியளவில் கடற்படையினர் மீட்டுள்ளனர். இப்படகில் பங்களதேஷைச் சேர்ந்த 104 பேரும் மியான்மாரைச் சேர்ந்த 11 பேரும் பயணித்துள்ளனர். இவர்களில் எட்டுவயதுக்குட்பட்ட சிறுவர்கள் 8 பேரும் பெண்கள் 3 பேரும் உள்ளடங்குகின்றனர்.

 

சட்டவிரோதமான முறையில் அவுஸ்ரேலியாவுக்கு டோறா படகில் பயணித்தபோது அலையின் வேகத்தினால் படகு செல்லமுடியாமல் நடுக்கடலில் தத்தளித்துக் கொண்டிருந்தபோதே கடற்படையினர்; இவர்களை மீட்டுள்ளதாக தெரிவித்தனர். உணவு கிடைக்காமையினால் ஒருவர் இறந்துள்ளநிலையில் மீட்டுள்ளதாகவும் மயக்கமுற்ற நிலையில் 2 பெண்கள் உட்பட 6 பேரை அக்கரைப்பற்று ஆதார வைத்தியசாலையில் அனுமதித்துள்ளதாகவு பொலிஸார்; தெரிவித்தனர். இவர்கள் கடந்த நான்கு நாட்களாக உணவுகள் இன்றி நடுக்கடலில் இருந்திருப்பதாக கடற்படையினரின் ஆரம்ப விசாரணையில் தெரிய வந்துள்ளதாகவும் மீட்கப்பட்ட அனைவரையும் ஒலுவில் கடற்படை முகாமில் தற்போது வைத்திருப்பதாகவும் இவர்களை நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளதாகவும் பொலிஸார் மேலும் தெரிவித்தனர்.

 

இது தொடர்பான விசாரணைகளை அக்கரைப்பற்று பொலிஸார் மேற்கொண்டு வருகின்றனர்.http://seithy.com/breifNews.php?newsID=75175&category=TamilNews&language=tamil