தமிழர்களிற்கெதிரான சிங்களவர்களின் அராஜகம் நீடித்தால் வீண் விபரீதங்கள் ஏற்படும் - சம்பந்தன் எச்சரிக்கை

"தமிழர் தாயகமான வடக்கு, கிழக்கில் தமிழ் மக்களின் நிலங்களை ஆக்கிரமிப்பதையும், அவர்களை அச்சுறுத்தும் விதத்தில் அராஜகங்கள் புரிவதையும் அரச படைகளும், சிங்கள மக்களும் உடன் கைவிட வேண்டும். இல்லையேல் வீண்விபரீதங்களைச் சந்திக்க வேண்டிய நிலை ஏற்படும்." இவ்வாறு தமிழ்த் தேசியக் கூட்டமைப்பின் தலைவரும் திருகோணமலை மாவட்ட நாடாளுமன்ற உறுப்பினருமான இரா.சம்பந்தன் எச்சரித்துள்ளார். மூதூர் பிரதேசத்துக்குட்பட்ட படுகாடு, முதலை மடு ஆகிய பகுதிகளில் தமிழ் மக்கள் விவசாயம் செய்த காணிகளை சிங்கள மக்கள் ஆக்கிரமித்து விவசாயம் செய்கின்றனர். இதனால் பாதிக்கப்பட்ட பல கிராமங்களைச் சேர்ந்த தமிழ் விவசாயிகளை நேற்று முன்தினம் கங்குவேலியில் தமிழ்த் தேசியக் கூட்டமைப்பினர் சந்தித்தனர். அங்கு இடம்பெற்ற கூட்டத்தில் கலந்துகொண்டு உரையாற்றினார் நாடாளுமன்ற உறுப்பினர் சம்பந்தன்.

  

இந்தக் கூட்டத்தில் சம்பந்தன் எம்.பி. மேலும் தெரிவித்தவை வருமாறு:

 

வடக்கு, கிழக்கில் தமிழ் மக்களின் வீட்டுக் காணிகள், விவசாயக் காணிகள் நாளுக்குநாள் அரச படைகளினாலும், சிங்கள மக்களினாலும் ஆக்கிரமிக்கப்பட்டு வருகின்றன. இது தொடர்பில் அரச தரப்பினரிடம் நாம் பல தடவைகள் எடுத்துக்கூறியும் அவர்கள் எவ்வித நடவடிக்கைகளையும் எடுக்கவில்லை. அதேவேளை, இந்த நில ஆக்கிரமிப்புக்கு எதிராக எமது தமிழ் மக்கள் அறவழியில் ரீதியில் போராட்டங்களை நடத்தும்போது அவர்களை அச்சுறுத்தும் வகையில் அரச படையினர் அராஜகங்களை மேற்கொண்டு வருகின்றனர். தட்டிக் கேட்பார் எவரும் இல்லை என்ற துணிவில் அவர்கள் செயற்படுகின்றனர். பேரினவாதத்தின் இந்த நில ஆக்கிரமிப்பில் தமிழ் மக்களின் விவசாயக் காணிகள் அமைந்துள்ள படுகாடு, முதலைமடு ஆகிய பகுதிகளும் சிக்கியுள்ளன. இதனால்2009 ஆம் ஆண்டிலிருந்து குறித்த பகுதிகளில் மூதூர் பிரதேசத்துக்குட்பட்ட பல கிராமங்களைச் சேர்ந்த தமிழ் மக்கள் விவசாயம் செய்யமுடியாத அவலநிலை ஏற்பட்டுள்ளது.

 

இதன் வலி இங்கு வந்திருக்கும் எமது விவசாயிகளுக்குத்தான் தெரியும். இதனை உணர்ந்தும் எமது விவசாயிகள், தொழிலின்றி அமைதியாக இருக்கின்றார்கள். ஆனால், அரச படைகளுடன் சேர்ந்து சிங்கள மக்கள் எமது நிலங்களை விழுங்கி அட்டகாசம் புரிகின்றனர். இது இன ஒற்றுமைக்கு நல்லதல்ல என்பதை அவர்கள் நன்கு புரிந்துகொள்ளவேண்டும். எனவே, தமிழர் தாயகமான வடக்கு, கிழக்கில் தமிழ் மக்களின் நிலங்களை ஆக்கிரமிப்பதையும், அவர்களை அச்சுறுத்தும் விதத்தில் அராஜகங்கள் புரிவதையும் அரச படைகளும், சிங்கள மக்களும் உடன் கைவிடவேண்டும். இதனை மீறி அரச படைகளும், சிங்கள மக்களும் செயற்படுவார்களாயின் வீண்விபரீதங்களைச் சந்திக்கவேண்டி வரும்.

 

அரசு இதனைக் கவனத்தில் கொண்டு இனியாவது உரிய நடவடிக்கை எடுக்கவேண்டும்" என்று தெரிவித்தார் சம்பந்தன் எம்.பி. இந்தச் சந்திப்பில் தமிழ்த் தேசியக் கூட்டமைப்பின் முன்னாள் நாடாளுமன்ற உறுப்பினரும் தமிழரசுக் கட்சியின் திருகோணமலை மாவட்ட தலைவருமான க.துரைரெட்ணசிங்கம், கிழக்கு மாகாணசபை எதிர்க்கட்சித் தலைவரும் கூட்டமைப்பின் மூத்த உறுப்பினருமான சி.தண்டாயுதபாணி, கூட்டமைப்பின் கிழக்கு மாகாணசபை உறுப்பினர்களான ஜெ.ஜெனார்த்தனன், கு.நாகேஸ்வரன், கூட்டமைப்பின் மூதூர் பிரதேசசபை உறுப்பினர்கள் மற்றும் கங்குவேலி, பட்டித்திடல், மல்லிகைத்தீவு, மேன்காமம், மணற்சேனை, பாரதிபுரம். கிளிவெட்டி, பெரியவெளி, புளியடிச்சோலை போன்ற கிராமங்களைச் சேர்ந்த விவசாயிகள் என பலர் கலந்துகொண்டனர்.

 

http://www.seithy.com/breifNews.php?newsID=79388&category=TamilNews&language=tamil