கூட்டமைப்பு திடீரென தமது பழைய முடிவுகளை மாற்றினாலும் ஆச்சரியபடுவதற்கில்லை: – கஜேந்திரகுமார் பொன்னம்பலம்

தமிழ் தேசிய கூட்டமைப்பு திடீரென தமது பழைய முடிவுகளை மாற்றினாலும் ஆச்சரிய படுவதற்கில்லை என தமிழ் தேசிய மக்கள் முன்னணியின் தலைவர் கஜேந்திரகுமார் பொன்னம்பலம் தெரிவித்தார்.. மேலும் அவர் தெரிவிக்கையில் 13 வது திருத்த சட்டம் அது இருக்கும் நிலையிலோ தற்போது உள்ள நிலையில் பலவீனப்பட்டாலும் அது பெயருக்காவது இருந்தாக வேண்டும் என்ற அடிப்படையில் தான் இந்தியாவின் சிந்தனையும் செயற்பாடுகளும் அமைகின்றன இந்திய இலங்கை ஒப்பந்தம் உயிரோடு இருப்பதற்கு 13 வது திருத்தம் தான் முக்கிய காரணமாக அமைந்துள்ளது 13 வது திருத்தத்தை நீக்கினால் அல்லது தமிழர்கள் 13 வது திருத்த சட்டத்தை வேண்டாம் என கூறுமிடத்து இந்திய இலங்கை ஒப்பந்தத்திற்கு கேள்விக்குறியான நிலைமையே உருவாகும் .

இந்தியாவுடைய நலன்கள் இவ் ஒப்பந்தத்தின் மூலம் பாதுகாக்கப்பட்டுள்ளது இருந்த போதும் தமிழருடைய பெயரை பயன்படுத்திதான் இலங்கை இந்திய ஒப்பந்தம் உத்தியோக பூர்வமாக கொண்டு வரப்பட்டது இந்த நிலையில் தான் 13 வது திருத்த சட்டத்தை அரசாங்கம் பலவீன படுத்தினாலும் அதனை ஏற்று கொள்ள வேண்டிய நிர்ப்பந்தத்தை நிச்சயமாக கூட்டமைப்பிற்கு வழங்கியிருக்கும் அதன் அடிப்படையில் தெரிவிக்குழு ஊடாக 13 ஆம் திருத்தத்தை நீக்குவதா இல்லையா என்ற விவாதங்கள் நடைபெறவுள்ள நிலையிலே கூட்டமைப்பும் அதில் கலந்து கொள்ள வேண்டும் என்ற கோரிக்கையை இந்தியா விட்டிருக்க கூடும் அதன் அடிப்படையில் கூட்டமைப்பும் தமது பழைய நிலைப்பாடுகளை மாற்றி தெரிவு குழுவிற்குள் செல்வதற்கான நடவடிக்கையாகத்தான் அண்மைக்கால கருத்துக்களையும் செயற்பாடுகளையும் பார்க்க வேண்டியுள்ளது என குறிப்பிட்டார்.

மேலும் எங்களை பொறுத்த வரையில் சர்வதேச சமூகத்தை அணுகி செல்ல வேண்டும் என்பதில் நாமும் தெளிவாக இருக்கின்றோம் இந்தியாவாக இருக்கலாம் மேற்குலக நாடாக இருக்கலாம் அவர்களுக்கு என்று ஒரு நிகழ்ச்சி நிரல் காணப்படுகின்றது எங்களுடைய நலன்கள் பாதுகாக்கப்படாத நிலையில் வெறுமனே வெளித்தரப்பினருடைய நலன்கள் பேணப்படுவது தான் எமது கேள்வியாக உள்ளது தமிழ் தேசிய கூட்டமைப்பு வெறுமனே இந்தியா விரும்பிய படி கண்ணை மூடிக்கொண்டு செயற்படுவதும் தமிழர்களுக்கு பாதிப்பை ஏற்படுத்த கூடியளவிற்கு ஒரு சில முடிவுகளை எடுப்பதும் ஏற்று கொள்ள முடியாத விடயம் .

கூட்டமைப்பினர் தமிழ் மக்களால் தெரிவுசெய்யப்பட்டவர்கள் தமிழ் மக்களின் நலன்களை பேண வேண்டிய பொறுப்பு அவர்களிடத்தில்தான் இருக்கின்றது எனவே அந்த பொறுப்பை சரியான முறையில் நிறைவேற்ற வேண்டும் மாறாக தமிழ் மக்களுடைய நலன்களை விட்டு விட்டு இந்தியாவின் எடு பிடிகளாக செயற்படுவதை ஒரு போதும் ஏற்று கொள்ள முடியாது துரதிஷ்டவசமாக தற்போதைய நிலையில் கூட்டமைப்பு அவ்வாறுதான் செயற்பட்டு கொண்டிருக்கின்றது எனவும் சுட்டி காட்டினார் .

நன்றி – தமிழ் தந்தி