தலைமைச்செயலகத்துக்கு வெளியே ‘சனிக்கிழமை தோறும் தெருக்களில் அமர்ந்து மக்களிடம் குறை கேட்போம்’ டெல்லி முதல்–மந்திரி கெஜ்ரிவால் அறிவிப்பு

புதுடெல்லி

ஒவ்வொரு சனிக்கிழமையும் நானும், மந்திரிகளும் தலைமைச்செயலகத்துக்கு வெளியே உள்ள தெருக்களில் அமர்ந்து மக்களிடம் நேரடியாக குறைகளை கேட்டு அறிந்து அவற்றுக்கு தீர்வு காண்போம் என்று டெல்லி முதல்–மந்திரி அரவிந்த் கெஜ்ரிவால் அறிவித்து உள்ளார்.

ஊழல் ஒழிப்பு நடவடிக்கை

மக்களின் குறைகளை தீர்ப்பதிலும், ஊழலை ஒழிப்பதிலும் டெல்லி முதல்–மந்திரி அரவிந்த் கெஜ்ரிவால் தீவிர ஆர்வம் காட்டி வருகிறார். ஊழலை ஒழிப்பதற்கான உதவி மையத்தை (ஹெல்ப்லைன்) டெல்லியில் நேற்று முன்தினம் அவர் தொடங்கி வைத்தார். இந்த நிலையில், பொதுமக்களின் குறைகளை தீர்ப்பது தொடர்பாக கெஜ்ரிவால் நேற்று அவர் புதிய அறிவிப்பு ஒன்றை வெளியிட்டார்.

இதுகுறித்து நிருபர்களுக்கு அளித்த பேட்டியில் அவர் கூறியதாவது:–

மக்களிடம் குறை கேட்போம்

பொதுமக்களின் குறைகளை தீர்ப்பதற்கு நமது கொள்கைகளை புதுப்பிக்க வேண்டிய அவசியம் ஏற்பட்டு இருக்கிறது. ஊழலை ஒழிக்கவேண்டுமானால் இடைவிடாமல் தீவிர நடவடிக்கைகளை எடுக்க வேண்டும். மக்களிடம் குறைகளை நேரடியாக கேட்டு அறிந்து தீர்வுகாண இருக்கிறோம். இதற்காக நானும் மற்ற மந்திரிகளும் வருகிற 11–ந்தேதி முதல் ஒவ்வொரு சனிக்கிழமையும் காலை 9.30 மணி முதல் 11.30 மணி வரை டெல்லி தலைமைச்செயலகத்துக்கு வெளியே உள்ள தெருக்களில் அமர்ந்து மக்களிடம் குறைகளை கேட்க இருக்கிறோம்.

உடனடியாக தீர்க்கப்படவேண்டிய குறைகள் என்றால், உடனே அதுபற்றி சம்பந்தப்பட்ட அதிகாரிகளை தொலைபேசியில் தொடர்பு கொண்டு பேசி தீர்வுகாண முயற்சி மேற்கொள்ளப்படும். மற்ற குறைகள் எந்த வகையைச் சேர்ந்தவை என்பதை கண்டு அறிந்து அவற்றுக்கும் விரைவில் தீர்வு காண்போம்.

செல்போனில் குறுந்தகவல்

பொதுமக்கள் தெரிவித்த குறைகள் தீர்க்கப்பட்டனவா? என்பதை உறுதி செய்யவும் நடவடிக்கை எடுக்கப்படும். இதற்காக குறையை தெரிவித்த சம்பந்தப்பட்ட நபருக்கு, ‘‘நீங்கள் தெரிவித்த குறையை சம்பந்தப்பட்ட அதிகாரி தீர்த்து வைத்துவிட்டாரா? என்று கேட்டு செல்போனில் குறுந்தகவல் அனுப்பப்படும். மேலும் எங்களுடைய தன்னார்வ தன்னார்வ தொண்டர்கள் இதுதொடர்பாக அவர்களுடன் தொடர்பு கொண்டு பேசுவார்கள்.

இதுதவிர ஒவ்வொரு நாளும் இதே நேரத்தில் ஒரு மந்திரி அனைத்து அமைச்சகங்கள் தொடர்பான பிரச்சினைகளுக்கு தீர்வு காண்பதற்கான நடவடிக்கைகளை எடுப்பார்.

ஊழல் அதிகாரிகள்

ஊழலை ஒழிப்பதற்காக அமைக்கப்பட்டுள்ள உதவி மையத்துக்கு முதல் நாளிலேயே சுமார் 4 ஆயிரம் அழைப்புகள் வந்துள்ளன. உதவி மையத்தில் உள்ள தொலைபேசி எண்ணுக்கு வந்த 800–க்கும் அதிகமான அழைப்புகளை ஏற்று பேசியதில், அவர்களில் 38 பேர் ஊழல் அதிகாரிகளை ரகசியமாக பிடித்துக்கொடுக்க ஒப்புக்கொண்டனர்.

ஊழல் அதிகாரிகள் யாரும் இந்த உதவி மையத்தில் உள்ளவர்களுடன் தொடர்பு வைத்துக்கொள்ளமுடியாத நிலையை நாங்கள் உறுதி செய்து இருக்கிறோம்.

இவ்வாறு கெஜ்ரிவால் கூறினார்.

http://www.dailythanthi.com/2014-01-10-From-Delhi---Minister-Arvind-Kejriwal