அமெரிக்க, பிரித்தானிய தூதுவர்களுடன் கூட்டமைப்பு நீண்டபேச்சு – தீர்மானத்தை வலுப்படுத்தக் கோரிக்கை

கொழும்பிலுள்ள அமெரிக்க, பிரித்தானிய தூதுவர்களுடன் தமிழ்த் தேசியக் கூட்டமைப்பின் தலைவர்கள் நீண்ட பேச்சுக்களை நடத்தியுள்ளதாக கொழும்பு ஆங்கில நாளிதழ் ஒன்று செய்தி வெளியிட்டுள்ளது. 

அமெரிக்க தலைமையிலான நாடுகளால் ஜெனிவாவில் முன்வைக்கப்பட்டுள்ள சிறிலங்காவுக்கு எதிரான தீர்மான வரைவு தொடர்பாகவே இவர்கள் நேற்று முன்தினம் பேச்சுக்களை நடத்தியுள்ளனர். 

பிரித்தானியத் தூதுவர் ஜோன் ரன்கின்னையும், அமெரிக்கத் துணைத் தூதுவர், வில்லியம் வெய்ன்ஸ்ரெய்னினையும் சந்தித்துப் பேச்சு நடத்தியுள்ளனர். 

தமிழ்த் தேசியக் கூட்டமைப்பின தலைவர். இரா.சம்பந்தன் தலைமையிலான, தமிழ்த் தேசியக் கூட்டமைப்பின் பிரதிநிதிகள் குழுவே இந்தப் பேச்சுக்களில் பங்கேற்றுள்ளது. 

இந்தச் சந்திப்புகளில், நாடாளுமன்ற உறுப்பினர்கள் மாவை சேனாதிராசா, எம்.ஏ.சுமந்திரன் ஆகியோரும் கலந்து கொண்டனர். 

பிரித்தானியத் தூதுவரையும், அமெரிக்கத் துணைத் தூதுவரையும் சந்தித்து தற்போதைய ஜெனிவா கூட்டத்தொடர் குறித்துப் பேசியதை உறுதிப்படுத்திய நாடாளுமன்ற உறுப்பினர், சந்திப்புகள் தொடர்பான மேலதிக விபரங்களை வெளியிட மறுத்துள்ளார். 

இதன்போது தீர்மான வரைவு தொடர்பாக நீண்ட நேரம் கலந்துரையாடல்கள் நடத்தப்பட்டதாக, தெரிவிக்கப்படுகிறது. 

அமெரிக்கா, பிரித்தானியா உள்ளிட்ட நாடுகளால் முன்வைக்கப்பட்டுள்ள சிறிலங்காவுக்கு எதிரான தீர்மான வரைவை, வரவேற்றிருந்த தமிழ்த் தேசியக் கூட்டமைப்பின் தலைவர் இரா.சம்பந்தன், அனைத்துலக விசாரணைப் பொறிமுறை பற்றிய தெளிவான விளக்கங்களைக் கொண்டதாக அந்த வரைவு வலுப்படுத்தப்பட வேண்டும் என்று கோரியிருந்தார். 

இதுதொடர்பாக தாம் சம்பந்தப்பட்ட தரப்புகளுடன் பேசுவோம் என்றும் குறிப்பிட்டிருந்தார். 

இந்தப் பின்னணியில், நேற்று முன்தினம் கொழும்பில் நடந்துள்ள சந்திப்புகளில், சிறிலங்காவுக்கு எதிரான தீர்மானத்தை வலுப்படுத்த வேண்டும் என்று தமிழ்த் தேசியக் கூட்டமைப்பு வலியுறுத்தியுள்ளதாக தகவல்கள் தெரிவிக்கின்றன. 

இதற்கிடையே, தமிழ்த் தேசியக் கூட்டமைப்பின் நாடாளுமன்ற உறுப்பினர் எம்.ஏ.சுமந்திரனும், மாகாணசபை உறுப்பினர் அனந்தி சசிதரனும், ஜெனிவாவுக்கு புறப்பட்டுச் சென்றுள்ளனர்.

http://www.puthinappalakai.com/view.php?20140312110122