திருமலை கங்குவேலி சிவன் கோவில் மீது புத்த பிக்கு தலைமையிலான குழு தாக்குதல்

திருகோணமலை மாவட்டத்தின் பிரசித்தி பெற்ற திருக்கரைசையம்பதி எனப்போற்றப்படும் மூதூர் கங்குவேலி அகத்தியர் ஸ்தாபன சிவன் ஆலய புனரருத்தாரணப்பணியை புத்த பிக்கு ஒருவன் தலைமையிலான சிங்கள காடையர் குழு புகுந்து சேதப்படுத்தியுள்ளது.

நேற்று (14.03.2014) பிற்பகல் 4.30 மணியளவில் ஆலய பணிகள் இடம்பெற்ற இடத்தில் இருந்த களஞ்சிய (மடைப்பள்ளி) சாலையை உடைத்து சேதப்படுத்தியதுடன் பல பொருட்களையும் எடுத்துச்சென்றதாக முறையிடப்பட்டுள்ளது.

கடந்த 12ம் திகதியில் இருந்து புனர்தாரணப்பணிகள் இடம்பெற்று வந்தன. காவல் கடமையில் முதூர் பொலிசாரும் ஈடுபடுத்தப்பட்டிருந்தனர். எதிர்வரும் 17ம் திகதி வைபரீதியாக அடிக்கல் நாட்டப்பட இருந்த நிலையில் புத்த பிக்கு இந்த அடாவடித்தனத்தை புரிந்துள்ளான்.

இதேவேளை இவ்வாலயத்திற்கு கடந்த சிவராத்திரி தினத்தன்று திருகோணமலை அரசாங்க அதிபர் சில்வா விஜயம் செய்து வழிபட்டதுடன் பணிகளுக்கான உதவிகளை வழங்குமாறு பொலிசாரையும் படையினரையும் கேட்டிருந்தார்.  அங்கு அவர் மரக்கன்று ஒன்றையும் நாட்டி வைத்தார்.

திருக்கரைசைபுராண பாடல் பெற்ற தலமாகும். அகஸ்தியபெருமான் வழிபட்ட ஆலயம் என்பதனால் பல்லின மக்களும் வந்து வழிபடும் ஆலயமாகவிருந்தது.

இந்த அடாவடித்தனத்தில் நீலாப்பொலை என்ற கிராமத்தில் உள்ள ஆரிய பால என்பவரது புதல்வாரன புத்த பிக்குவுடன் தெகிவத்தை கிராமத்தைச்சார்ந்த சுமண சிறி என்பவரது புதல்வர் தலைமையிலான குழு ஒன்றே இந்த தாக்குதலை மேற்கொண்டதாக ஆலய நிர்வாகத்தினர் தெரிவித்துள்ளனர்.

இதற்கு பலமாதங்களுக்கு முன்னர் இங்கிருந்த பெறுமதி வாய்ந்தபுராதன சிவலிங்கம் இக்குழுவினரால் உடைத்து சேதப்படுத்தப்பட்டிருந்தது. இது பற்றி மூதூர் பொலிசில் முறையிடப்பட்டிருந்தது. பின்னர் அரச அதிபர் நேரடியாக விஜயம் செய்து பார்வையிட்டும் இருந்தார். ஆயினும் எவரும் கைது செய்யப்படவில்லை. இன்று இரண்டாவது தடவையாக இச்சம்பவம் நடைபெற்றுள்ளது.

இந்த அடாவடித்தனத்தை புரிந்தவர்கள் யார் என தெரிந்த போதிலும் பொலிஸார் இவர்கள் மீது எந்த நடவடிக்கையும் இதுவரை எடுக்கவில்லை.

2009ஆம் ஆண்டிலும் இந்த ஆலயம் சிங்களவர்களால் சேதமாக்கப்பட்டிருந்தது.

http://www.thinakkathir.com/?p=57437