பழைய காதல் அறை!

நீங்களும் வசித்து இருப்பீர்கள்தானே!

 

எழுதப்படாதத் தாள்-1

எழுதப்படாத வெள்ளைத்தாள்

எழுத எடுத்தமர்ந்தேன்

தொடங்கம் தவறாகிவிடுமோ

என்ற பயத்தில்

இன்னும் எழுதப்படாமலே

வெள்ளைத்தாள்..!

 

எழுதப்படாதத் தாள்-2

எழுதப்படாத வெள்ளைத்தாள்

எழுத எடுத்தமர்ந்தேன்

நினைவில் வந்தது....

காலதாமதமாய் சென்றதால்

அவன் சினங்கொண்டு சென்றது,

வழியில் கண்ட விபத்து,

மறந்து தவறிய அலுவலக வேலை,

நாளை கடக்கவேண்டிய பயணங்கள்,

இன்னும் நிரப்பப்படாத வெள்ளைத்தாள்

முடிந்துவிட்டது எனக்கான நேரம்..!

 

எழுதப்படாதத் தாள்-3

எழுதப்படாத வெள்ளைத்தாள்

எழுத எடுத்தமர்ந்தேன்-

அடர்ந்த புதர்களை அணைத்துக்கொண்ட

இருள் பூசிய வனப்பகுதியில்

வழித்தடம் இருந்தது,

அங்கு தனியாய் நான் மட்டும்

ஏதோ என்னை துரத்தவதை போல்

உணர்ந்து ஓடுகிறேன்-வேகமாய் .

வாழ்க்கையின் மீது அதீத

ஆசை வைத்து ஓடும் ஓட்டத்தில்

மூச்சு மேலும் கீழுமாய் திணற

கால்கள் இடறி பள்ளத்தில் விழ...

துரத்தி வந்த உருவம்

அருகே நெருங்க..நெருங்க..

 

பயந்தெழுந்தேன்...

ஓ... உறங்கிவிட்டேன்

எனக்கான வழித்தடமாய்...

இன்னும் எழுதப்படாத வெள்ளைத்தாள்.

 

சாபங்களுடன்...

அவளுடைய 

கோபத்திற்கும் அன்பிற்கும்

மதிப்பளித்ததில்லை

சிறு ஆசைகளுக்கு

காதுகொடுத்ததில்லை

ஆச்சர்யங்களை

பரிசளித்ததில்லை

 

அவளை அமரவைத்து 

உணவு பரிமாறியதில்லை

ஒளிந்துகொண்டு

விளையாடியதில்லை

செல்லமாக கொஞ்சியதுமில்லை

வேலையை பகிர்ந்துகொண்டு

ஓய்வெடுக்க சொன்னதுமில்லை

 

அன்பின் ஏக்கத்திலும்

அரவணைப்பின் ஆசையிலும்

கைபற்றுதலின் கனவிலும்

அவளது ஒவ்வொரு நாள்

வாழ்க்கையும் பயணிக்கிறது...

திருமணம் முடிக்கையில்

சரியாகத்தான் இருந்தது

 

முத்தமாக மாறேன்!

உமிழ்துளி தீர்த்தமாய்

இனித்தருளி

உதிர்ந்த பூவையும்

கனியவைத்து

நஞ்சையும் மகரந்தமாக்கும்

அன்னையின் முத்தம்

 

புழுதி படிந்த தினத்தை

பொன்னாக்கி

நீரும் நிழலும் அன்ற

நிலத்தில் மருந்தாகி

உட்பிணியை மயிலிறகால் வருடும்

தந்தையின் முத்தம்

 

வார்த்தைகளை ஊமையாக்கி

சொல்லத்தெரியாத

சொல்லின் மொழியில்

பூங்கொத்து தரும்

குழந்தையின் முத்தம்

 

விடாது நடந்த

போரின் முடிவில் கிழிந்த

நரம்பின் வலியை

பின்நோக்கி ஓடச்செய்து

பூத்துக்குலுங்குவது

நட்பின் முத்தம்

 

வெப்பத்தில் குளிர்காய்ந்து

இதழில் மடல் தீட்டி

துவந்தயுத்தத்தில்

பூ விரியும் பொழுதில்

புதுமொழி பேசும்

காதல் முத்தம்

 

முப்பகையில் முத்தெடுத்து

முத்திபெற அணிவகுத்து

அணிகலன் இன்றி

மங்கையை அழகுபடுத்தும்

ஆண்மகனின் ஆசைமுத்தம்

 

முத்தங்களான உலகில்

நீங்கள் முத்தத்தேர்வில்

ஈடுபட்டவராவென தெரியாது

முத்தமாக மாறுவது தான்

முக்கியமென்று மட்டும்