அண்ணா சிறையில் இருக்கின்றார் என புகைப்படம் வெளியாகி இருந்தது; சகோதரி சாட்சியம்

காணாமல் போன எனது அண்ணாவின் புகைப்படம் ஒன்று தென்னிலங்கை சிறையில் உள்ளவர்கள் என்ற தலைப்புடன் இணையத்தளம் ஒன்றில் வெளியாகியிருந்தது ஆனால் இன்று வரை தகவல் எதுவும் இல்லை என ஆணைக்குழு முன் சகோதரி ஒருவர் சாட்சியமளித்தார்.

ஜனாதிபதி ஆணைக்குழுவின் சாட்சியப் பதிவுகள்  மூன்றாவது நாளாக இன்று பூநகரி பிரதேச செயலகத்தில் நடைபெற்று வருகின்றது. அதன்போதே சகோதரி ஒருவர் மேற்கண்டவாறு சாட்சியமளித்தார்.

அவர் மேலும் சாட்சியமளிக்கையில்,

நாங்கள் பூநகரியில் இருந்து இடம்பெயர்ந்து முல்லத்தீவு வரைக்கும் சென்று அங்கு இருந்தோம். 19.04.2009 ஆம் திகதி அண்ணா வட்டுவாகலில் உள்ள எங்களது சித்தி வீட்டிற்கு சென்றுவிட்டார். அப்போது ஆமி வந்து விட்டது.

நாங்கள் 2009.04.20 ஆம் திகதி இராணுவக் கட்டுப்பாட்டிற்குள் வந்துவிட்டோம். எனினும் அண்ணா எம்முடன் வரவில்லை. 15.05.2009 ஷெல் விழுந்ததில் சித்தி, சித்தப்பா மற்றும் பிள்ளை ஒன்றும் இறந்து விட்டனர்.

அதற்குப் பின்னர் 17.05.2009 அன்று சித்தியின் பிள்ளைகளையும் கூட்டிக் கொண்டு வட்டுவாகலில் இராணுவக் கட்டுப்பாட்டுக்குள் வந்துள்ளனர். அங்கு சித்தியின் பிள்ளைகளை வேறு பஸ்சிலும் அண்ணாவை வேறு பஸ்சிலும் ஏற்றியுள்ளனர்.

அப்போது அண்ணாவுடன் அவரது நண்பர்களும் ஏற்றப்பட்டிருந்தனர். பின்னர் ஓமந்தையில் வைத்து அண்ணாவை வேறு ஒரு பஸ்சில் ஏற்றிச் சென்றுள்ளனர்.

அதற்குப்பின்னர் தகவல் அறிந்து எல்லா இடமும் தேடினோம் ஆனால் அண்ணா தொடர்பில் தகவல் எதுவும் கிடைக்கவில்லை பின்னர் 2011 ஆம் ஆண்டு தென்னிலங்கை சிறையில் உள்ளவர்கள் என்ற செய்தியுடன் கூடிய புகைப்படம் ஒன்று இணையத்தளங்களில் வெளிவந்திருந்தது.

அதில் அண்ணாவின் புகைப்படமும் இருந்தது. அதற்குப்பின்னரும் தேடினோம் தகவல் எதுகும் இல்லை. பூஸாவில் இருந்து விடுதலையாகி வந்தவர்களிடமும் அண்ணா குறித்து கேட்டோம் ஆனால் அவர் அங்கு இல்லை என்று கூறினர்.

இன்றுவரை தகவல் எதுவும் தெரியாது என்றார். இதேவேளை , கஜேந்திரன் மருத்துவ பீடத்திற்கு தெரிவாகிய மாணவன் என்பது குறிப்பிடத்தக்கது.