மகாத்மா காந்தியை சுட்டுக்கொன்ற கோட்சேயை தேச பக்தர் என்பதா? பாரதீய ஜனதா எம்.பி. பேச்சால் டெல்லி மேல்–சபையில் அமளி

புதுடெல்லி,

மகாத்மா காந்தியை சுட்டுக்கொன்ற கோட்சேயை தேச பக்தர் என பாரதீய ஜனதா எம்.பி. புகழ்ந்து பேசிய சர்ச்சையால், டெல்லி மேல்–சபையில் அமளி ஏற்பட்டது.

மராட்டிய மாநிலத்தில் நடந்த நிகழ்ச்சி ஒன்றில், உத்தரபிரதேச மாநிலத்தை சேர்ந்த பாரதீய ஜனதா எம்.பி., சாக்ஷி மகாராஜ் பங்கேற்று பேசினார்.

அப்போது அவர், ‘‘கோட்சே வேதனைக்குள்ளான ஒரு மனிதர். அவர் தவறுதலாக சில காரியங்களை செய்திருக்கலாம். ஆனால் அவர் தேச விரோதி அல்ல. அவர் ஒரு தேசபக்தர்’’ என கூறியதாக தகவல்கள் வெளியாகின. இந்தப்பேச்சு சர்ச்சையை ஏற்படுத்தியது. அவர் மீது நடவடிக்கை எடுக்க வேண்டும் என்ற கோரிக்கையும் எழுந்தது.

உடனே அவர், ‘‘கோட்சேயை நான் தேசபக்தராக பார்க்கவில்லை. நான் ஏதாவது தவறாக கூறி இருக்கலாம்’’ என பல்டி அடித்தார்.

இந்தப் பிரச்சினை, டெல்லி மேல்–சபையில் நேற்று புயலைக் கிளப்பியது. இது தொடர்பாக காங்கிரஸ் உறுப்பினர் உசேன் தல்வாய் பிரச்சினை எழுப்பி பேசினார்.

அப்போது அவர், ‘‘தேசப்பிதாவை கொன்ற நாதுராம் கோட்சேவுக்கு புகழாரம் சூட்டுவதற்கு வீர தினம் கடைப்பிடித்திருக்கிறார்கள். மதத்தலைவர்களும், சில முன்னாள் எம்.எல்.ஏ.க்களும் கலந்து கொண்ட இந்த நிகழ்ச்சி குறித்து மராட்டிய முதல்–மந்திரிக்கு கடிதம் எழுதி உள்ளேன். ஆனால் இவர்கள்தான் வளர்ச்சி பற்றி பேசுகிறார்கள். இவர்கள் சமூகத்தை பிளவுபடுத்த முயற்சிக்கிறார்கள்’’ என குற்றம் சாட்டினார்.

இந்தப் பிரச்சினை தொடர்பான பதாகைகளை ஏந்தியவாறு காங்கிரஸ் உறுப்பினர்கள் கோஷங்களையும் முழங்கினார்கள்.

சபையின் துணைத்தலைவர் பி.ஜே.குரியன், அவர்களை அமைதிப்படுத்த முயற்சித்தார். ‘‘இத்தகைய செயலுக்காக பூஜ்ய நேரத்தை பயன்படுத்தாதீர்கள். இது முழுக்க முழுக்க ஒழுக்கமற்ற செயல். ஒன்று குற்றமா, இல்லையா என்று தீர்மானிப்பது கோர்ட்டுகள்தான். நானோ, நீங்களோ அல்ல’’ என கூறினார்.

பாராளுமன்ற விவகாரங்கள் துறை ராஜாங்க மந்திரி முக்தர் அப்பாஸ் நக்வி, ‘‘காங்கிரஸ் கட்சி உறுப்பினர்களின் அமளியை ஏற்க முடியாது. மகாத்மா காந்தியை கொன்றது யாராக இருந்தாலும், அவர்களுக்கு நாங்கள் எதிரானவர்கள். மகாத்மா காந்தி கொலையாளிகளை கொண்டாடுவதை நாங்கள் ஏற்க மாட்டோம்’’ என கூறினார்.

ஆனாலும் காங்கிரஸ் உறுப்பினர்கள் தொடர்ந்து அமளியில் ஈடுபட்டதால், சபை துணைத்தலைவர் பி.ஜே.குரியன் அவையை 10 நிமிடம் ஒத்திவைத்தார்.

மீண்டும் சபை கூடியபோது, நிலைமையில் மாற்றமில்லை. இதையடுத்து சபை 15 நிமிடங்கள் ஒத்திவைக்கப்பட்டது.

சபை மறுபடியும் கூடியபோது காங்கிரஸ் தலைவர் ஆனந்த் சர்மா, ‘‘கோட்சேயை யாரோ ஒருவர் புகழ்ந்துரைத்ததை ஏற்க முடியாது. அத்தகைய செயலை இந்த சபையோ அல்லது பாராளுமன்ற விவகாரங்கள் துறை மந்திரியோ ஏற்க மாட்டார்கள் என நம்புகிறேன்’’ என கூறினார்.

உடனே பாராளுமன்ற விவகாரங்கள் துறை மந்திரி வெங்கையா நாயுடு, ‘‘அத்தகைய ஒரு நபரை புகழ்ந்துரைக்கும் கேள்விக்கே இடமில்லை. இந்த விவகாரத்தை இத்துடன் விட்டுவிடுவோம்’’ என கூறினார். அத்துடன் இந்தப் பிரச்சினை முடிந்து, சபை வழக்கமான அலுவல்களைக் கவனித்தது.

http://www.dailythanthi.com/News/India/2014/12/12013856/BJP-MP-calls-Godse-nationalist-Opposition-protests.vpf