மஹிந்தரிடமிருந்து இந்தியா எதிர்பார்க்கின்றது

இணைப்பைப் பற்றிய உறுதியை இந்தியா மஹிந்தரிடமிருந்து எதிர்பார்க்கின்றது

இந்தியாவுக்கு விஜயத்தை மேற்கொண்டிருக்கும் இலங்கை ஜனாதிபதி மஹிந்த ராஜபக்ஷ நாளை புதுடில்லியில் இந்தியப் பிரதமர் மன்மோகன் சிங்கைச் சந்தித்துப் பேசுகின்றார்.

இலங்கை இனப்பிரச்சினையும், அதை ஒட்டிய விவகாரங்களுமே இரு நாட்டுத் தலைவர்களின் இந்தச் சந்திப்பின்போது முக்கிய இடம் பிடிக்கப் போகின்றன என்பது திண்ணம்.

இலங்கை இனப்பிரச்சினை தொடர்பாகப் பல்வேறு விடயங்களை இந்தியத் தரப்பு இந்தச் சந்திப்பின்போது இலங்கை அரசுத் தலைவருக்கு முன்வைத்துச் சுட்டிக்காட்டும் என்றாலும் அவற்றுள் பிரதானமாக இடம்பெறப்போவது ஈழத் தமிழர் தாயகமான வடக்கும், கிழக்கும் ஒன்றிணைந்திருக்க வேண்டும் என்ற அம்சம் தான் என்பது உள்ளங்கை நெல்லிக்கனி.

இது விடயத்தில் இந்தியாவின் திட்டவட்டமான நிலைப்பாடு, ஏற்கனவே சில தினங்களுக்கு முன்னர் கொழும்பில் இலங்கை ஜனாதிபதி மஹிந்த ராஜபக்ஷவை, இந்திய வெளியுறவுச் செயலாளர் சிவசங்கர் மேனன் சந்தித்துத்துப் பேசியபோது தெளிவாகத் தெரிவிக்கப்பட்டு விட்டது.

இவ்விவகாரத்தில் இலங்கை அரசுத் தலைமையின் முடிவு என்ன - தீர்மானம் என்ன - என்பதைத் தெளிவாக அறிவதற்கு இரு நாட்டுத் தலைவர்களின் இப்போதைய சந்திப்பை எதிர்பார்த்துப் புதுடில்லி காத்திருப்பதாகவும் தெரிகின்றது.

இலங்கைத் தமிழர்களைப் பொறுத்தவரை வடக்கு - கிழக்கு மாகாணங்கள் அவர்களின் பூர்வீகத் தாயகம். அதைக் கூறுபோடும் எந்த முயற்சிக்கும் அவர்கள் இணங்க மாட்டார்கள். கேள்விக்கு உட்படுத்த முடியாத அடிப்படை விவகாரமாகவே அவர்கள் இணைப்பைக் கருதுகின்றார்கள்.

வடக்கு - கிழக்கைப் பிரிக்கும் எந்த யோசனைக்கும் தமிழர்கள் இணங்கவே மாட்டார்கள் என்பதும், அதையும் மீறி பிரிப்பு தம் மீது திணிக்கப்பட்டால் அதற்கு எதிராக அவர்கள் முரண்டு பிடிப்பார்கள் என்பதும், அவ்வாறு பிரிக்க முயல்வது தமிழர்களுக்கு இழைக்கப்படும் சரித்திர பூர்வமான துரோகம் என்பதும் இந்தியா உட்பட சர்வதேச சமூகத்துக்கு நன்கு தெரியும்.

ஆனால், இந்தியாவைப் பொறுத்தவரை ஈழத் தமிழர்களின் பூர்வீகத் தாயகம், அந்த மக்களின் அனுமதியின்றி - இணக்கமின்றி - கொழும்பு நிர்வாகத்தால் பலவந்தமாகப் பிரிக்கப்படுவது, ஈழத் தமிழர்களுக்குச் செய்யப்படும் அநீதி மட்டுமல்லாமல், இந்தியாவின் கொள்கை நிலைப்பாட்டுக்கும் விழுந்த அடியாகவும் அமையும்.

ஏனென்றால், இந்த இணைப்பை அந்நாடு எழுத்து மூலமான சர்வதேச ஒப்பந்தம் ஒன்றின் மூலம் இலங்கையோடு உறுதி செய்து கொண்டிருக்கிறது.

அந்த ஒப்பந்தத்தை உதாசீனம் செய்யும் வகையில் ஈழத் தமிழர் தாயகத்தைக் கொழும்பு அரசு துண்டாடுவது, இந்தியாவுக்கு எழுத்து மூலம் உறுதியளித்த விவகாரத்தை இலங்கை ஒதுக்கித் தள்ளி, துச்சமாக மதித்து, நிராகரித்தமைக்குச் சமனாகும்.

எனவேதான், இணைப்பை உறுதிப்படுத்த வலியுறுத்தி நிற்கின்றது இந்தியா.

வடக்கையும், கிழக்கையும் ஒரே நிர்வாக அலகின் கீழ் கொண்டு வரும் உத்தரவு, இப்போது இலங்கை உயர் நீதிமன்றத்தினால் செல்லுபடியற்றதாக்கப்பட்டிர