பந்தை நேரா தலைக்கு வீசினா போய் சேந்துருவேன்லா... இஷாந்த் சர்மா செய்கையால் பரபரப்பு!

 

இந்திய பந்துவீச்சாளர் இஷாந்த் சர்மாவை இலங்கை பந்துவீச்சாளர் தம்மிகா பிரசாத் விரட்டி சென்றதால் கொழும்பு மைதானத்தில் பரபரப்பு ஏற்பட்டது.

கொழும்பு நகரில் 3வது டெஸ்ட் போட்டி நடைபெற்று வருகிறது. இந்திய பந்துவீச்சாளர் இஷாந்த் சர்மா தொடர்ந்து இலங்கை வீரர்களுடன் வாக்குவாதத்தில் ஈடுபட்டு வருகிறார். இலங்கை அணி பேட்டிங் செய்த போது ஹெராத்துடன் வாய் தகராறில் ஈடுபட்ட இஷாந்த், நேற்றும் இலங்கை வீரர்களுடன் மோதல் போக்கை கடைபிடித்தார்.

நேற்றைய ஆட்டத்தில் தம்மிகா பிரசாத் 76வது ஓவரை வீசிய போது, தொடர்ச்சியாக 3 பவுன்சர்கள் வீசினார். இதனைத் தொடர்ந்து கோபமடைந்த இஷாந்த், பந்தை 'எனது ஹெல்மெட்டுக்கு போடு' என்று சைகை செய்தார். பதிலடியாக பிரசாத்தும் ஏதோ கூற அவருடன் சண்டிமாலும் இணைந்து இஷாந்திடம் மோதினார். இதனைத் தொடர்ந்து நடுவர்கள் இலங்கை கேப்டன் ஏஞ்சலா மாத்யூசை அழைத்து வீரர்கள் வரம்பு மீறி நடப்பதாக எச்சரிக்கை விடுத்தனர்.

இந்த ஓவரின் கடைசி பந்தில் அஸ்வின் அவுட் ஆக, இந்தியாவின் 2வது இன்னிங்ஸ் முடிவுக்கு வந்தது. அஸ்வினும் இஷாந்த்தும் பெவிலியன் நோக்கி நடந்தனர். அப்போது தம்மிகா பிரசாத், இஷாந்தை பின்னாலேயே விரட்டி சென்றதால், மைதானத்தில் பரபரப்பு ஏற்பட்டது. இருவரும் அக்னி நட்சத்திரம் பிரபு -கார்த்திக் போல மோதிக் கொள்வதைப் போல் முறைத்து முறைத்து பார்த்துக் கொண்டே சென்றனர். பின்னர் டிரெஸ்சிங் அறையின் வாசல் அருகே நின்றும் இருவரும் முறைத்துக் கொண்டு இருந்தனர். இதனைத் தொடர்ந்து அஸ்வின் இஷாந்தை சமாதானம் செய்து அழைத்து சென்றார்.

இந்த விவகாரத்தில் இஷாந்த் சர்மா, திரிமண்னே, பிரசாத், சண்டிமால் ஆகியோர் ஐ.சி.சி. ஒழுங்கு விதிமுறைகளை மீறியுள்ளதாக ஐ.சி.சி. தெரிவித்துள்ளது. தண்டனை விபரம் இந்த போட்டி முடிந்தவுடன் அறிவிக்கப்படும். ஏற்கனவே 2வது டெஸ்ட் போட்டியின் போதும் இஷாந்த் சர்மா வாக்குவாதத்தில் ஈடுபட்டதால், போட்டி கட்டணத்தில் இருந்து 65 சதவீதம் அபராதம் விதிக்கப்பட்டது.

http://www.vikatan.com/news/article.php?aid=51747

இசாந்தின் உணர்ச்சி வெளிப்பாடு சிறந்தது, ஆனால் கட்டுப்படுத்த வேண்டும்!

 

 

 

 

இந்தியா மற்றும் இலங்கை அணிகளுக்கு இடையிலான 3-வது மற்றும் இறுதி டெஸ்ட் கிரிக்கெட் போட்டில் கொழும்பில் நடைபெற்று வருகிறது.

இதில் நேற்றைய நான்காம் நாள் ஆட்டத்தில் இந்திய அணி துடுப்பெடுத்தாடிக் கொண்டிருக்கும்போது, உமேஷ் யாதவ் ஆட்டமிழந்த வேளை, கடைசி விக்கெட்டாக இசாந்த் சர்மா களம் இறங்கினார்.

அப்போது இலங்கை அணியின் வேகப்பந்து வீச்சாளர் தம்மிக பிரசாத் தொடர்ச்சியாக இசாந்த் சர்மாவிற்கு பவுன்சராக பந்து வீசினார். இதனால் கோபம் அடைந்த இசாந்த் சர்மா பிரசாத்துடன் கடும் வாக்குவாதத்தில் ஈடுபட்டார்.

அவருக்குத் துணையாக தினேஷ் சந்திமாலும் இணைந்து கொண்டார். பின் இசாந்த் சர்மாவிற்கு ஆதரவாக மறு முனையில் துடுப்பெடுத்தாடி வந்த அஸ்வின் இணைந்தார்.

இதனால் மைதானத்திற்குள் பரபரப்பு ஏற்பட்டது. அப்போது நடுவர்கள் தலையிட்டு அவர்களை சமாதானம் செய்தனர்.

அதன்பின் இலங்கை 2-வது இன்னிங்சை தொடங்கியது. இசாந்த் சர்மா ஆக்ரோஷமாக பந்து வீசினார். முதல் ஓவரின் கடைசி பந்தில் உபுல் தரங்கவை வீழ்த்தினார். அத்துடன் 3-வது விக்கெட்டாக சந்திமாலை வீழ்த்தினார். அப்போது ஆக்ரோஷத்தின் உச்சிக்கு சென்ற இசாத் சர்மா தன் தலையில் பலமாக இரண்டு மூன்று முறை அடித்தார். அவரை இந்திய வீரர்கள் சமாதானம் செய்தனர்.

இந்த விவகாரம் குறித்து இந்திய முன்னாள் தலைவர் மற்றும் துடுப்பாட்ட வீரர் சுனில் கவாஸ்கர் கூறுகையில், ‘‘இசாந்த் சர்மா தனது உணர்ச்சியை வெளிக்காட்டியது மிகவும் சிறந்தது. ஆனால், அவர் தனது உணர்ச்சியை கட்டாயம் கட்டுப்பாட்டுக்குள் வைத்திருக்க வேண்டும். ஏனென்றால் அவர் இந்தியாவின் தற்போதைய முன்னணி பந்து வீச்சாளராக உள்ளார்.

இன்றைய போட்டியின் சில சம்பவங்களை பார்க்கும்போது அது குழந்தைகளுக்கு உகந்ததாக இல்லை. வீரர்கள் முன்னுதாரணமாக இருக்க வேண்டும்.

மிஸ்ரா சிறப்பான துடுப்பாட்டத்தை வெளிப்படுத்தினார். கடைநிலை வீரர்கள் எப்போதும் இதுபோன்று உறுதியாக செயல்பட வேண்டியது அவசியம்,

என்றார்.

http://tamil.adaderana.lk/news.php?nid=72183