‘கெட்ட பையனா’ இஷாந்த் சர்மா

புதுடில்லி: ‘அளவுக்கு மிஞ்சினால் அமிர்தமும் நஞ்சு’ என்பதை இஷாந்த் சர்மா உணராதவராக இருக்கிறார். களத்தில் இவரது ஆக்ரோஷம் எல்லை மீறுவது ரசிகர்களை அதிருப்தி அடைய செய்துள்ளது. 

இந்திய அணியின் வேகப்பந்து வீச்சாளர் இஷாந்த் சர்மா, 28. களத்தில் இவரை சீண்டி விட்டால் போதும், மோதலில் இறங்கி விடுவார்.

கடந்த 2012ல் பாகிஸ்தானுக்கு எதிரான ‘டுவென்டி–20’ போட்டியில் கம்ரான் அக்மலுக்கு இவர் பவுலிங் செய்தார். அப்போது கம்ரான் ஏதோ கூற, உடனடியாக இருவருக்கும் மோதல் ஏற்பட்டது. 

ஆஸ்திரேலிய மண்ணில் சமீபத்தில் நடந்த பிரிஸ்பேன் டெஸ்டில், ஸ்மித்தை தகாத வார்த்தைகளால் திட்டிய இஷாந்த் சர்மாவுக்கு 15 சதவீதம் அபராதம் விதிக்கப்பட்டது.

இப்போது இலங்கை மண்ணில் அளவுக்கு அதிகமாக கோபத்தை வெளிப்படுத்தினார். கொழும்புவில் (சாரா ஓவல்) நடந்த இரண்டாவது டெஸ்டில் திரிமான்னே, சண்டிமால் அவுட்டானது போது, அவர்களை பார்த்து கத்தியதற்காக 65 சதவீதம் அபராதம் விதிக்கப்பட்டது. 

மீண்டும் கொழும்பில் (எஸ்.எஸ்.சி.,) நடந்த 3வது டெஸ்டில் 3, 4 என, இரு நாட்களில் 4 முறை மோசமாக நடந்து கொண்டார் இஷாந்த் சர்மா. இதில் 4வது நாளில் தம்மிகா பிரசாத்துடன் நடந்து கொண்ட செயலுக்காக, ஒரு டெஸ்டில் பங்கேற்க தடை விதிக்கப்பட்டார்.

தவிர, அடுத்த 12 மாதத்தில் இஷாந்த் விதி முறையை மீறினால், நீண்ட கால தடை விதிக்கப்படும். வரும் போட்டிகளில் இஷாந்த் திருந்துவார் என எதிர்பார்ப்போம்.

இதுகுறித்து முன்னாள் கேப்டன் கவாஸ்கர் கூறியது:

வேகப்பந்து வீச்சாளர் ஆக்ரோஷமாக இருக்க வேண்டும் என்பது சரி தான். இதில், ஒரு வித கட்டுப்பாடு இருக்க வேண்டும். எல்லோருக்கும் மகிழ்ச்சி தரும் வகையில் அமைய வேண்டும். வீண் கோபத்தினால் களத்தில் மோசமான சூழ்நிலை உருவாகி விடக் கூடாது.  சர்வதேச போட்டிகளில் விளையாடுபவர் மற்றவர்களுக்கு ‘ரோல் மாடலாக’ இருக்க வேண்டும். ஏனெனில் ஏராளமான சிறுவர்கள் உங்களை பார்த்துக் கொண்டிருப்பர். போட்டிகளில் விளையாட்டு உணர்வுடன் பங்கேற்க வேண்டும்.

இவ்வாறு கவாஸ்கர் தெரிவித்தார்.

 

கவனிப்பாரா கேப்டன் 

இஷாந்த் செயலில் தவறில்லை என கோஹ்லி கூறியது குறித்து முன்னாள் வீரர் பிஷன் சிங் பேடி கூறுகையில்,‘‘ இஷாந்த் சர்மாவின் ஆக்ரோஷ நடத்தை பரிதாபத்திற்குரியது. இலங்கை தொடரில் கோஹ்லி சிறப்பாக செயல்பட்டார். ஆனால் அவர் தனது ஆக்ரோஷத்தை கட்டுப்படுத்த வேண்டும். களத்தில் கேப்டனை மட்டும் ஒரு கேமரா கண்காணித்துக் கொண்டிருக்கும். இதனால் கேப்டன் என்பவர் முன்மாதிரியாக இருக்க வேண்டும். வார்த்தை போரில் ஈடுபட வேண்டாம்,’’ என்றார். 

http://sports.dinamalar.com/2015/09/1441211796/ishantindia.html

''எரிகிற தீயில் எண்ணெய் விடுகிறார் கோலி''! : இஷாந்த் பயிற்சியாளர் குற்றச்சாட்டு

 

களத்தில் ஆக்ரோஷமாக செயல்படுமாறு பந்துவீச்சாளர் இஷாந்த் சர்மாவை கேப்டன் விராட் கோலி தூண்டி விட்டதாக குற்றச்சாட்டு எழுந்துள்ளது.

இலங்கைக்கு எதிரானத் தொடரில், இந்திய அணியின் வேகப்பந்து வீச்சாளர் இஷாந்த் ஷர்மா அபாரமாக பந்து வீசி 13 விக்கெட்டுகளை சாய்த்தார். 2-வது மற்றும் 3வது டெஸ்ட் போட்டியில் இலங்கை வீரர்களிடம் எல்லை கடந்து  வாக்குவாதத்தில் ஈடுபட்டதால், ஒரு டெஸ்ட் போட்டியில் விளையாடவும் இஷாந்துக்கு தடை விதிக்கப்பட்டுள்ளது.

இஷாந்த்துக்கு விதிக்கப்பட்ட தடை குறித்து அவரது தந்தை விஜயகுமார் கூறுகையில், '' களத்தில் இஷாந்த் ஷர்மா நடந்து கொண்ட விதம் பாராட்டும்படி இல்லை. ஐ.சி.சி. தண்டனை விதித்தது சரிதான்.  இஷாந்த் ஷர்மா தனது உணர்ச்சியை கட்டுப்படுத்த பழக வேண்டும். சிறு வயதில் இது போன்ற ஆக்ரோஷமான செயல்பாடுகளை நான் அவரிடம் கண்டது இல்லை''  என்றார்.

இதற்கிடையில் இஷாந்த் ஷர்மாவின் ஆக்ரோஷமான செயல்பாட்டுக்கு கேப்டன் விராட்கோலியும், அணியின் இயக்குனர் ரவிசாஸ்திரியும் தான் காரணம் என்று இஷாந்த் ஷர்மாவின் இள வயது  பயிற்சியாளர் ஷர்வன்குமார் புகார் தெரிவித்துள்ளார்.
 

இது குறித்து ஷர்வன்குமார் அளித்த ஒரு பேட்டியில், ‘இஷாந்த் ஷர்மா எல்லை மீறி நடந்து இருப்பது இதுவே முதல்முறையாகும். இஷாந்த் ஷர்மா ரவிசாஸ்திரியும் களத்தில் ஆக்ரோஷமாக செயல்பட அனுமதித்தது தவறு. அவர்கள் இருவருமே எரிகிற தீயில் எண்ணெய் விடுவது போல, இஷாந்தை துண்டி விடுகின்றனர்.

இஷாந்த் டெல்லி திரும்பியதும் உணர்ச்சி வேகத்தை கட்டுப்படுத்த வேண்டியதன் அவசியத்தை வலியுறுத்தினேன். இந்த சம்பவத்தால் பாதிக்கப்பட்டது இஷாந்த் சர்மா மட்டும்தான். இஷாந்த்துக்கு விதிக்கப்பட்ட தடையை நீக்க வேண்டுமென இந்திய நிர்வாகம் வேண்டுகோள் விடுக்காதது ஏன்?எதிரணியினரை ஸ்லெட்ஜ் செய்வதிலும் மதிநுட்பத்துடன் செயல்பட வேண்டும்'' என்றார்.

http://www.vikatan.com/news/article.php?aid=51923