நிர்பயா வழக்கு இளம் குற்றவாளி விடுவிக்கப்பட்டார்!

நிர்பயா வழக்கு இளம் குற்றவாளி விடுவிக்கப்பட்டார்!

புதுடெல்லி: டெல்லியில் ஓடும் பேருந்தில் மருத்துவ மாணவி நிர்பயா பாலியல் பலாத்காரம் செய்யப்பட்ட வழக்கின் இளம் குற்றவாளி விடுவிக்கப்பட்டார்.

டெல்லியில் கடந்த 2012-ம் ஆண்டு டிசம்பர் மாதம் மருத்துவ மாணவி நிர்பயா, தனது ஆண் நண்பருடன் பேருந்து ஒன்றில் சென்றபோது, ஆறு பேர் கொண்ட கும்பலால் தாக்கப்பட்டு பாலியல் பலாத்காரம் செய்யப்பட்டார். அவருடன் வந்த ஆண் நண்பரையும் சரமாரியாகத் தாக்கிய அந்தக் கும்பல் இருவரையும் பின்னர் சாலையோரத்தில் வீசிச் சென்றது. இதில் படுகாயமடைந்த அந்தப் பெண் இரண்டு வாரங்கள் சிகிச்சைக்குப்பின் சிங்கப்பூர் மருத்துவமனையில் டிசம்பர் 16-ம் தேதி உயிரிழந்தார்.

இந்த சம்பவத்தில் ஈடுபட்ட டிரைவர் ராம் சிங், அவரது சகோதரர் முகேஷ், அக்ஷய் தாகூர்,  பவன், வினய் மற்றும் ஒரு சிறுவன் ஆகிய 6 பேரை டெல்லி காவல்துறையினர் கைது செய்தனர். இந்த வழக்கில் ஒருவர் உயிரிழந்த நிலையில் 4 பேருக்கு தூக்குத் தண்டனை விதிக்கப்பட்டது. மற்றொரு குற்றவாளி சிறுவன் என்று நிரூபிக்கப்பட்டதால் அந்த இளம் குற்றவாளி சிறுவர் சீர்திருத்த பள்ளியில் அடைக்கப்பட்டான்.

இந்த சிறுவனின் மூன்று ஆண்டு தண்டனை காலம் முடிவடைந்ததை தொடர்ந்து, அவன்  டிசம்பர் 16-ம் தேதி விடுவிக்கப்பட இருந்த நிலையில், பா.ஜனதாவை சேர்ந்த மூத்த தலைவர் சுப்பிரமணியன் சுவாமி, 3 ஆண்டு தண்டனை அனுபவித்த நிலையில், இளம் குற்றவாளி திருந்தி விட்டான் என்றும், அவனால் சமூகத்துக்கு பிரச்னை ஏதும் இருக்காது என்றும் உறுதியாக தெரிகிற வரையில், அவனை விடுதலை செய்யக்கூடாது என்று டெல்லி உயர் நீதிமன்றத்தில் மனு ஒன்றை தாக்கல் செய்தார்.

இந்த மனுவை விசாரித்த உயர் நீதிமன்றம், தண்டனை காலம் முடிந்த பின் சிறுவனை விடுவிக்காமல் இருக்க முடியாது என்று கூறி சுப்பிரமணியன் சுவாமியின் மனுவை நிராகரித்தது.

நீதிமன்றத்தின் உத்தரவுக்கு எதிர்ப்பு தெரிவித்து நிர்பயாவின் பெற்றோர் கருத்து வெளியிட்டனர். மேலும், பல்வேறு அமைப்பினரும் இளம் குற்றவாளியை விடுவிக்க எதிர்ப்பு தெரிவித்து வருகின்றனர்.

இந்நிலையில், இளம் குற்றவாளியின் விடுதலைக்கு எதிராக பல்வேறு மட்டத்திலும் குரல்கள் எழுப்பப்பட்டு வருவதால், பிரச்னைகளை தவிர்க்கும் பொருட்டு, நேற்று மாலையே ரகசிய இடத்திற்கு இளங்குற்றவாளி கொண்டு செல்லப்பட்டார்.

இந்நிலையில், இன்று (20-ம் தேதி) மாலை சுமார் 5.30 மணியளவில் இளம் குற்றவாளி விடுவிக்கப்பட்டு விட்டதாக அறிவிக்கப்பட்டிருக்கிறது. மேலும், அவர் தன்னார்வ தொண்டு நிறுவனத்தின் கண்காணிப்பில் பராமரிக்கப்படுவார் எனவும் கூறப்பட்டிருக்கிறது.

இதற்கிடையே, டெல்லி மகளிர் ஆணையம் சார்பில், இளம் குற்றவாளி விடுதலைக்கு தடை கேட்டு உச்சநீதிமன்றத்தில் மனுத்தாக்கல் செய்யப்பட்டிருக்கிறது. இந்த மனு நாளை (21-ம் தேதி) விசாரணைக்கு வரவுள்ளது குறிப்பிடத்தக்கது.

http://www.vikatan.com/news/india/56610-december-16-gangrape-case-juvenile-convict-release.art