9 வருடங்களுக்குப் பின் நோர்வே அரச பிரமுகர் ஒருவர் ஸ்ரீலங்காவிற்கு விஜயம்

ஸ்ரீலங்காவுடனான அரசியல் ரீதியிலான தொடர்புகளை புதுப்பித்துக்கொள்ளும் நோக்கில்நோர்வே நாட்டு வெளிவிவகார அமைச்சர் போர்ஜ் பென்டா (Borge Brende) ஸ்ரீலங்காவிற்கு விஜயம் மேற்கொள்ளவுள்ளார்.

இவர் இந்த வார இறுதிக்குள் ஸ்ரீலங்காவிற்கு விஜயம் மேற்கொள்வார் என அவரது அலுவலகம் தெரிவித்துள்ளது.

கடந்த 2006ஆம் ஆண்டிற்குப் பின்னர் நோர்வே அரச பிரமுகர் ஒருவர் ஸ்ரீலங்காவிற்கு விஜயம் மேற்கொள்வது இதுவே முதற்தடவை என்பது குறிப்பிடத்தக்கது.

இந்த நிலையில் ஸ்ரீலங்காவுக்கு விஜயம் செய்யும் நோர்வே வெளிவிவகார அமைச்சர், தனது விஜயத்தின்போது ஜனாதிபதி மைத்திரிபால சிறிசேன, பிரதமர் ரணில் விக்கிரமசிங்க, வெளிவிவகார அமைச்சர் மங்கள சமரவீர, எதிர்க்கட்சித் தலைவர் இரா. சம்பந்தன் உள்ளிட்டோரை சந்திப்பார் என எதிர்பார்க்கப்படுகின்றது.

ஸ்ரீலங்காவில் இடம்பெற்ற போரில் இருதரப்பினரிடையே சமாதானத்தை ஏற்படுத்துவதற்கு நோர்வே அரசாங்கம் தீவிர முயற்சிகளை மேற்கொண்டிருந்தது.

இதற்கமைய போர் இடம்பெற்ற 2002ஆம் ஆண்டு காலப்பகுதியில் சமாதான உடன்படிக்கை செய்யப்பட்டதில் நோர்வே அதிக செல்வாக்கு செலுத்தியிருந்தது.

30 வருடகால போர் 2009ஆம் ஆண்டில் முடிவுக்கு கொண்டுவரப்பட்டதிலிருந்து நோர்வே, ஸ்ரீலங்கா தொடர்பில் கரிசனை கொண்டுள்ள போதிலும் ஸ்ரீலங்கா அரசாங்கத்துடன் அரசியல் தொடர்புகளை தொடரவில்லை என்று சர்வதேச அளவில் விமர்சனங்கள் எழுந்துள்ளன.

இந்த நிலையில் அத்தொடர்புகளை புதுப்பித்து, மீண்டும் ஸ்ரீலங்கா அரசாங்கத்துடனான உறவை வளர்த்துக் கொள்வதற்கு நோர்வே வெளிவிவகார அமைச்சர் ஸ்ரீலங்காவிற்கு விஜயம் மேற்கொள்கின்றார்.

http://ibctamil.com/news/index/16435