ஒற்றுமையின் பிரதிபலனாக திரண்டன 37 தமிழ் ஊடகங்கள்: வலுப்பெற்றனர் தமிழர்கள்

கனடா – ஒன்றாரியோ மாகாணத்தின் பழைமை வாதக்கட்சியின் தலைவர் திரு.பற்றிக் பிறவுனால் ஏற்பாடு செய்யப்பட்ட ஊடக கௌரவிப்பு விழா பல இனிய செய்திகளை தமிழர்களுக்கு தருவதாக அமைந்துள்ளது.

625.0.560.320.160.600.053.800.668.160.90 (5)இந்த விழாவிற்கு வந்திருந்த கனடாவைத் தளமாகக் கொண்டியங்கும் 37 தமிழ் ஊடகங்களும் தங்களுக்கிடையேயான ஒரு ஒற்றுமைப் பாலத்தை ஏற்படுத்தும் நிகழ்வாக இதனை மாற்றிக் கொண்டமை குறிப்பிடத்தக்கது.

லங்காசிறிக் குழுமத்தின் சார்பில் கனடாமிரர், லங்காசிறி நினைவுகள்.கொம் ஆகியன உட்பட 37 தமிழ் ஊடகங்கள் இந்தக் கௌரவிப்பு நிகழ்வில் கலந்து கொண்டன. திரு.பற்றிக் பிறவுனின் வருகைக்கு முன்பதாக தமிழ் ஊடகவியலாளர்கள் தம்மிடையேயான கருத்துப் பகிர்வினை மேற்கொண்டனர்.

இந்த நிகழ்வில் லங்காசிறி நினைவுகள்.கொம் இணையத்தின் சார்பாக உரையாற்றிய திரு.கணா ஆறுமுகம் தமிழர்களிடையே சுமார் 40க்கும் மேற்பட்ட ஊடக அமைப்புக்கள் இருந்தும் அவற்றை ஒருமித்துப் பிரதிநிதித்துவப்படுத்த ஒரு அமைப்பு இல்லையென்பதை தான் தமிழ்ச் சமுதாயத்தின் முன்னுள்ள ஒரு தடையாகவே பார்ப்பதாகத் தெரிவித்துள்ளார்.

அதனைத் தொடர்ந்து உரையாற்றிய ஊடகவியலாளர் ராஜி அரசரட்ணம் தமிழ் ஊடகவியலாளர்கள் தாம் அறிந்த விடயத்தை ஏனையோருக்கும் பகிர்வதன் மூலம் அது உறுதுணையாக அமையும் என்ற நோக்கிலான கருத்துக்களை மிகவும் ஆரோக்கியமாகப் பகிர்ந்துள்ளார்.

இவர்களோடு இணைந்து ஊடகவியலாளர்களான சுரேஸ் தர்மா, பி.ஜே.டிலிப்குமார், பி.விக்னேஸ்வரன், நடா ராஜ்குமார், ராகவன் பரஞ்சோதி, சாமி அப்பாத்துரை, லோகன் வேலும்மயிலும், சிவமோகன்.சி மற்றும் அகிலன்.மு ஆகியோரும் தமது கருத்துப் பகிர்வுகளை மேற்கொண்டுள்ளனர்.

இந்த நிகழ்வில் சகல ஊடக அமைப்புகளுக்கும் விருது வழங்கிக் கௌரவித்த திரு.பற்றிக் பிறவுன் இந்த அளவிற்கு, ஊடக அமைப்புக்களும் தமிழர்கள் மத்தியில் இருப்பது மிகவும் ஆரோக்கியமான விடயம் என தெரிவித்துள்ளார்.

இதேவேளை, இந்த ஊடகங்கள் ஒரு அமைப்பை ஏற்படுத்தி, எந்தவித கட்சிபேதமுமற்ற முறையில் அவர்கள் தமிழர்களுக்கான கோரிக்கைகளை, தமது ஊடகங்கள் மூலமாக எடுத்துச் சென்றால் அவற்றிற்கான தமது முழு ஆதரவும் இருக்கும் என தெரிவித்திருந்தமை குறிப்பிடத்தக்கது.

http://nerudal.com/nerudal.68498.html