தஞ்சாவூர், அரவக்குறிச்சி சட்டப்பேரவை தொகுதிகளுக்கான தேர்தலை 3 வாரங்களுக்கு ஒத்திவைக்க முடிவெடுக்கப்பட்டுள்ளதாக சென்னை உயர் நீதிமன்றத்தில் தேர்தல் ஆணையம் தெரிவித்தது.

அரவக்குறிச்சி தொகுதி பாமக வேட்பாளர் எம்.பாஸ்கரன், தஞ்சாவூர் தொகுதி பாஜக வேட்பாளர் எம்.எஸ்.ராமலிங்கம், திருச்சியைச் சேர்ந்த விவசாயி அய்யாகண்ணு, சுய ஆட்சி இயக்கத்தைச் சேர்ந்த பாலகிருஷ்ணன், பாஜகவைச் சேர்ந்த தனசேகரன் ஆகியோர் தஞ்சாவூர், அரவக்குறிச்சியில் தேர்தல் ஒத்திவைக்கக் கோரி உயர் நீதிமன்றத்தில் தனித்தனியே மனுக்களை தாக்கல் செய்திருந்தனர்.

பணப்பட்டுவாடா புகார் இருப்பதால் 23-ம் தேதி தேர்தலை நடத்த தடை விதிக்கவும், தேர்தல் தேதியை ஒத்திவைக்கவும் உத்தரவிட வேண்டும் என கோரியிருந்தனர்.

இந்த மனுக்கள் அனைத்தும் நீதிபதிகள் கல்யாணசுந்தரம், டி.கிருஷ்ணகுமார் ஆகியோர் முன்பு இன்று விசாரணைக்கு வந்தது.

தேர்தல் ஆணையம் சார்பில் ஆஜரான வழக்கறிஞர் நிரஞ்சன் ராஜகோபாலன், “அரவக்குறிச்சி, தஞ்சாவூர் தொகுதிகளுக்கான தேர்தலை 3 வாரங்கள் ஒத்திவைக்க முடிவு செய்யப்பட்டுள்ளது. அதற்கிடையே, அங்குள்ள நிலைமை குறித்து தேர்தல் ஆணையம் ஆராயும். மேலும், அந்த இரு தொகுதிகளில் போட்டியிடும் வேட்பாளர்கள் தேர்தல் குறித்து ஆணையத்திடம் மனு அளிக்கலாம். பின்னர், இந்த விவகாரத்தில் முடிவு எடுக்கப்படும்” என தெரிவித்தார்.

இதனைப் பதிவு செய்துகொண்ட நீதிபதிகள், வழக்கை ஜூன் மாதத்துக்கு ஒத்திவைத்து உத்தரவிட்டனர்.

தஞ்சாவூர், அரவக்குறிச்சி ஆகிய இரு தொகுதிகளில் மே 16-ம் தேதி நடக்க இருந்த தேர்தல் பணப்பட்டுவாடா புகார் காரணமாக மே 23-ம் தேதிக்கு தள்ளிவைக்கப்பட்டது. இப்போது 5 பேர் வழக்கு தொடுத்திருப்பதால், தேர்தல் ஆணையம் மீண்டும் தேர்தலை தள்ளிவைத்துள்ளது.

தேர்தல் நடைபெறும் நாளை இன்னும் தேர்தல் ஆணையம் அறிவிக்கவில்லை. அதுகுறித்து கலந்தாலோசித்து பின்னர் அறிவிக்கப்படும் என்று சென்னை உயர் நீதிமன்றத்தில் தெரிவித்துள்ளது.