விராட் கோலியின் பேட்டிங் ‘அடுத்த கட்டத்திற்கு’ முன்னேறியுள்ளதாகக் கூறும் அவரது ஆரம்பகால பயிற்சியாளர் ராஜ்குமார் சர்மா சச்சின் சாதனைகளை கோலியால் முறியடிக்க முடியும் என்று நம்பிக்கை தெரிவித்துள்ளார்.

இங்கிலாந்துக்கு எதிரான டெஸ்ட் தொடரில் ஜேம்ஸ் ஆண்டர்சன், விராட் கோலியை தனது செல்லப்பிள்ளையாக்கி சொல்லி, சொல்லி வீழ்த்திக் கொண்டேயிருந்தார், இதனால் ஒரு அரைசதம் கூட 5 டெஸ்ட் போட்டிகளில் கோலியால் எடுக்க முடியவில்லை, இது பற்றி அவரது பயிற்சியாளர் கூறும்போது, அடுத்த முறை இங்கிலாந்தில் நிச்சயம் பந்து வீச்சை கோலி ஆதிக்கம் செலுத்துவார் என்றார்.

இது குறித்து ராஜ்குமார் சர்மா கூறியதாவது:

இந்தத் தருணத்தில் அவரது ஃபார்ம் உச்சத்தில் உள்ளது. இந்தியாவுக்காக ஆடியதில் நான் பார்த்தவரையில் கோலி அளவுக்கு சீரான முறையில் ரன் எடுத்தவர்கள் என் நினைவில் இல்லை. சர்வதேச அளவில் கூட கோலி அளவுக்கு சீராக ரன் எடுப்பவர்கள் இல்லை என்றே தோன்றுகிறது. தற்போது அவர் பேட்டிங் செய்வதைப் பார்க்கும் போது, சச்சின் டெண்டுல்கர் சாதனைகளை அவரால் முறியடிக்க முடியும் என்றே கருதுகிறேன்.

மற்றவர்களிடமிருந்து கோலியை தனியே பிரிப்பது தன் திறமை மீது அவருக்கிருக்கும் தன்னம்பிக்கை. அவர் தனது நம்பிக்கையை அடிப்படையாக வைத்துக் கொண்டு பல்வேறு சூழல்களுக்கேற்பவும், பல்வேறு எதிரணியினருக்கேற்பவும் தன் ஆட்டத்தை மாற்றி அமைத்துக் கொள்ளும் விதம் மற்றவர்களிடமிருந்து அவரை தனித்துவமாகக் காட்டுகிறது, இதுதான் அவரது வெற்றிக்குக் காரணம். எப்போதுமே ரன்கள் மீதான தீராத அவா அவரிடம் உள்ளது.

இங்கிலாந்து தொடர் அவரது கிரிக்கெட் காலத்தில் மோசமானதுதான், ஆனால் ஒவ்வொரு வீரருக்கும் இத்தகைய நிலை ஏற்பட்டு அதனை கடந்து வந்துள்ளனர். அதன் பிறகே அவர் தனது ஆட்டத்தை தீவிர பயிற்சி மூலம் செம்மையாக்கிக் கொண்டார், அதன் விளைவுதான் நாம் ஆஸ்திரேலியாவில் நாம் பார்த்த பேட்டிங். தற்போது உலக டி20 தொடர் மற்றும் ஐபிஎல் கிரிக்கெட்டிலும் நாம் அவரது பேட்டிங்கில் கண்டது அந்த உழைப்பின் விளைவையே.

அடுத்த முறை இங்கிலாந்து செல்லும் போது கோலி நிச்சயம் தனது பேட்டிங் ஆதிக்கத்தை நிறுவுவார்.

கடின உழைப்பு அனைவருமே செய்யக்கூடியதுதான் ஆனால் கடின உழைப்புடன் சாதுரியமான சில விஷயங்களையும் மேற்கொண்டார். உதாரணமாக பயிற்சி முடிந்து அனைவரும் தங்கள் அறைக்குச் செல்வார்கள், ஆனால் கோலி உடற்பயிற்சி நிலையத்துக்குச் செல்வார். அவர் உணவுகளை விரும்பி சாப்பிடுபவர் என்றாலும் டயட்டில் மிகவும் கண்டிப்பானவர். அவருக்கு சாப்பிடுவதென்றால் பிடிக்கும், ஆனால் அதனை கட்டுப்பாட்டுடன் செய்து வருகிறார்.

ஆவேசமடைவது அவரது பலம், ஆனால் எல்லையை மீறாமல் இருக்க வேண்டும், அந்தவகையிலும் அவர் முன்னேறியுள்ளார்.

இன்றும் கோலியுடன் தொடர்பில் இருக்கிறேன், அவர் ஆடும் போட்டிகளை பார்க்கிறேன், கிங்ஸ் லெவன் அணிக்கு எதிராக 15 ஓவர்களில் அவர் எடுத்த சதம் எனக்கு பிடித்த சதம். அன்று அவர் விளையாடியது அசாதாரணமானது.

அவர் தனது தலைமைத்துவ திறமைகளை நிரூபித்துள்ளார், ஆனால் தோனி ஒரு மிகச்சிறந்த கேப்டன், எனவே தோனி விரும்பும் வரை அவர் தொடர வேண்டும் எனவே நேரம் வரும்போது விராட் கோலி அனைத்து வடிவங்களுக்கும் இந்திய அணியின் கேப்டனாக திகழ்வார்.

இவ்வாறு கூறினார்.

http://tamil.thehindu.com/sports/அடுத்த-முறை-இங்கிலாந்து-பந்துவீச்சை-கோலி-நிச்சயம்-பதம்-பார்ப்பார்-பயிற்சியாளர்-நம்பிக்கை/article8681809.ece