இராணுவத்திலிருந்து தப்பியோடியவர்களை மீள இணையுமாறு அழைப்பு.

இராணுவத்திலிருந்து தப்பியோடியவர்களை மீள இணையுமாறு அழைப்பு.

இலங்கையில் இடம்பெற்று வரும் போரை தீவிரமாக்கும் நோக்குடன் சிறிலங்கா இராணுவத்திலிருந்து தப்பியோடிய 17,000 படையினருக்கு பொதுமன்னிப்பு வழங்க தீர்மானித்துள்ளதாக இராணுவப் பேச்சாளர் பிரிக்கேடியர் பிரசாத் சமரசிங்க தெரிவித்துள்ளார்.

இது தொடர்பில் அவர் தெரிவித்துள்ளதாவது:

போர் உக்கிரமடைந்த காலப்பகுதியான 1983 இலிருந்து இன்றுவரை 50,000-க்கும் மேற்பட்ட படையினர் இராணுவத்தில் இருந்து தப்பியோடியுள்ளனர்.

எனினும் 2003 இலிருந்து முறைப்படி விடுமுறை கோராமல் கடமைக்கு சமூகமளிக்காத படையினரை இணைத்துக்கொள்ளவே அரசு தீர்மானித்துள்ளது. இவர்களே மீள் பயிற்சிக்கு உகந்தவர்கள் என கருதப்படுகின்றது.

பொதுமன்னிப்பு வழங்கும் காலம் ஜனவரி 20-31 வரை உள்ளது. இந்தக் காலப்பகுதியில் இவர்கள் இணைந்து கொள்ளலாம். புதிய படையினரை சேர்த்து முழுமையான பயிற்சி கொடுப்பதை விட மீள இணைபவர்களுக்கு மீள் பயிற்சி அளிப்பது இலகுவானது என்றார் அவர்.

125,000 படையினரைக் கொண்ட இராணுவத்தில் 630-க்கும் மேற்பட்டவர்கள் கடந்த ஆண்டு இடம்பெற்ற தாக்குதல்களில் உயிரிழந்துள்ளதாக இராணுவம் தெரிவித்துள்ளது.

-Puthinam-