முன்னாள் தலைவர்களால் முடியாததை தன்னால் நடத்திக் காட்ட முடியுமென நினைத்து ஜனாதிபதி செயல்படுகின்றார் : சம்பந்தன்.

முன்னாள் தலைவர்களால் முடியாததை தன்னால் நடத்திக் காட்ட முடியுமென நினைத்து ஜனாதிபதி செயல்படுகின்றார் : சம்பந்தன்.

முன்னாள் ஜனாதிபதிகளால் முடியாதவற்றை தன்னால் நடத்திக் காட்ட முடியுமென நினைத்து தற்போதைய ஜனாதிபதி செயல்படுகின்றார். இதுவொரு தப்புக்கணக்கென தமிழ்த் தேசிய கூட்டமைப்பின் பாராளுமன்றக் குழுத்தலைவர் இ ரா.சம்பந்தன் தெரிவித்தார்.

பாராளுமன்றத்தில் கடந்த வியாழக்கிழமை (11.02.2007) இடம்பெற்ற மாமனிதர் சந்திரநேருவின் அனுதாபப் பிரேரணையில் உரையாற்றுகையிலேயே இவ்வாறு தெரிவித்த சம்பந்தன் மேலும் கூறியதாவது

அரசாங்கம் யுத்தம் செய்யவில்லையென்று கூறிக்கொண்டே யுத்தமொன்றை தமிழ் மக்கள் மீது நடத்திக் கொண்டிருக்கின்றது. இதன் விளைவாக 2006 ஆம் ஆண்டு மட்டும் மூவாயிரம் பேர் கொல்லப்பட்டுள்ளனர். இவர்களில் இரண்டாயிரம் பேர் அப்பாவி தமிழ் மக்கள் என்பதை எவரும் மறுக்க முடியாது.

இராணுவத் தளபதிகள் கிழக்கை கைப்பற்றிவிட்டு வடக்கையும் கைப்பற்றப்போவதாக கூறுகிறார்கள். இவ்வாறான நிலைப்பாடுகளால் இன்று எழுந்துள்ள நிலை மிகவும் அபாயகரமானதாகும். நாம் எவருமே யுத்தத்தை ஒருபோதும் விரும்பியதில்லை.

உள்நாட்டுப் போரில் ஈடுபட்டிருந்த எத்தனையோ நாடுகள் சமஷ்டித்தீர்வின் ஊடாக தமது பிரச்சினைகளை தீர்த்துவிட்டு இன்று நிம்மதியாக உள்ளன. ஆனால், இந்த உண்மைத்தன்மையை அரசாங்கம் உணர மறுக்கின்றது.

முன்னாள் ஜனாதிபதிகளால் நடத்த முடியாதவற்றை தன்னால் நடத்திக் காட்டமுடியுமென தற்போதைய ஜனாதிபதி நினைக்கின்றார். எம்மைப் பொறுத்தவரை ஜனாதிபதியின் இந்த நினைப்பு ஒரு தப்புக்கணக்கு.

இவ்வாறான நிலையில் மூவின மக்களுக்காக அவர்களின் தேவைகளையறிந்து கடுமையாக உழைத்தவர் மாமனிதர் சந்திரநேரு. சிங்களவர், முஸ்லிம், தமிழர் என்ற பாகுபாடின்றி அனைவருக்கும் சேவை செய்தார். மக்களிடையே ஒற்றுமையை ஏற்படுத்துவதில் சந்திரநேரு முன்னின்று செயற்பட்டவர்.

சந்திரநேருவின் தந்தையும் மிகவும் புகழ்பெற்றவர். அறப்போர் வீரர் அரியநாயகம் என எல்லோராலும் அழைக்கப்பட்டவர். தந்தை செல்வாவின் வலதுகரமாகவும் திகழ்ந்தார். தந்தை செல்வா எப்போது திருகோணமலை வந்தாலும் அறப்போர் வீரர் அரியநாயகமும் வருவார்.

தந்தை செல்வாவும் அறப்போர் வீரர் அரியநாயகமும் வன்முறைகளை வெறுத்தவர்கள். எதையும் சமாதானமாக கலந்து பேசி செய்ய வேண்டுமென நினைப்பவர்கள். அப்படியான ஒருவரான அரியநாயகத்தின் மகனான சந்திரநேரு வன்முறையாலேயே கொல்லப்பட்டார்.

நாம் இன்று வெட்கப்படவேண்டிய காலகட்டத்தில் இருக்கிறோம். யுத்தத்தை தொடங்கவில்லையெனக் கூறிக்கொண்டே யுத்தத்தை நடத்திக் கொண்டிருக்கிறார்கள். 3 ஆயிரத்திற்கும்மேற்பட்ட அப்பாவி மக்கள் கொல்லப்பட்டுள்ளனர். இவை உடனடியாக நிறுத்தப்பட வேண்டும்.

-Sankathi-