அமெரிக்கத் தூதுவர் - கூட்டமைப்பு யாழில் நாளை முக்கிய பேச்சு!

இலங்கைக்கான அமெரிக்கத் தூதுவர் அதுல் கேஷாப், இரா.சம்பந்தன் தலைமையிலான தமிழ்த் தேசியக் கூட்டமைப்பின் நாடாளுமன்ற உறுப்பினர்களுடன் நாளை திங்கட்கிழமை யாழ்ப்பாணத்தில் முக்கிய கலந்துரையாடலில் ஈடுபடவுள்ளார் என்று கூட்டமைப்பின் பேச்சாளரும் நாடாளுமன்ற உறுப்பினருமான எம்.ஏ.சுமந்திரன் தெரிவித்தார்.

அமெரிக்க பசுபிக் கட்டளைப்பீடத்தால் ஏற்பாடுசெய்யப்பட்டுள்ள இலவச மருத்துவ முகாம் நிகழ்வில் கலந்துகொள்வதற்காக நாளை காலை யாழ்ப்பாணம் செல்லும் இலங்கைக்கான அமெரிக்கத் தூதுவர், மாலை யாழ்.கிறீன்கிறாஸ் ஹோட்டலில் இந்தச் சந்திப்பை நடத்தவுள்ளார் என்று சுமந்திரன் எம்.பி. குறிப்பிட்டார். இதன்போது அரசியல், பொருளாதாரம் மற்றும் சமூக அபிவிருத்தி சார்ந்த முக்கிய விடங்கள் குறித்து பேசப்படும் என்று சுமந்திரன் எம்.பி. மேலும் தெரிவித்தார்.

அமெரிக்காவின் இலவச மருத்துவ முகாம் நாளை யாழ்ப்பாணத்தில் ஆரம்பமாகின்றது. அமெரிக்க இராணுவத்தின் மருத்துவர்கள், அமெரிக்க பொதுச் சுகாதார திணைக்களத்தினர், பல் மற்றும் கண் மருத்துவர்கள் இதில் கலந்துகொள்கின்றனர். அமெரிக்காவின் மருந்துகாவி விமானமான சி - 130 நாளை பலாலி விமான நிலையத்தை காலை 8 மணிக்கு வந்தடையவுள்ளது. பலாலி விமானத்தளத்தில் நடைபெறும் ஆரம்ப நிகழ்வில், அமெரிக்கத் தூதுவர் அதுல் கேஷாப், அமெரிக்கப் படையினர் 60 பேர், எதிர்க்கட்சித் தலைவரும் தமிழ்த் தேசியக் கூட்டமைப்பின் தலைவருமான இரா.சம்பந்தன், அமைச்சர்கள், நாடாளுமன்ற உறுப்பினர்கள் மற்றும் வடக்கு மாகாண முதலமைச்சர் சி.வி.விக்னேஸ்வரன், வடக்கு மாகாண சுகாதார அமைச்சர் ப.சத்தியலிங்கம், இலங்கை விமானப் படையினர் எனப் பல தரப்பினரும் கலந்துகொள்கின்றனர். இலவச மருத்துவ முகாம் இரண்டு இடங்களில் நடைபெறவுள்ளது. நாளை திங்கட்கிழமை தொடக்கம் புதன்கிழமை வரையில் இடைக்காடு மகா வித்தியாலயத்தில் காலை 8.30 தொடக்கம் மாலை 4.30 மணி வரையிலும் மூன்று தினங்கள் இடம்பெறும்.

எதிர்வரும் வெள்ளி மற்றும் சனி இரு நாளும் புங்குடுதீவு ஸ்ரீ சுப்பிரமணிய மகளிர் வித்தியாலத்திலும் நடைபெறும். மருத்துவப் பரிசோதனைகள் மருத்துவ முகாமில் நடைபெறும். சிறப்பாக கண் மற்றும் பல் பரிசோதனைகளும் மேற்கொள்ளப்படவுள்ளன. இதனைவிட யாழ். போதனா வைத்தியசாலைக்கு மருத்துவ உபகரணங்கள் கையளிக்கின்ற நிகழ்வும் நடைபெறவுள்ளது. மருத்துவக் குழுவில், அமெரிக்க இராணுவத்தினர் 26 பேரும், இலங்கை விமானப் படையினர் 11 பேரும், பங்களாதேஷ், நேபாளம், மாலைதீவைச் சேர்ந்த தலா 2 படையினரும் இடம்பெறவுள்ளனர். இதற்கு மேலதிகமாக யாழ். போதனா வைத்தியசாலையின் 6 மருத்துவர்கள், 15 உதவியாளர்கள், இலங்கைச் செஞ்சிலுவைச் சங்கத்தின் 20 தொண்டர்களும் பங்கேற்கவுள்ளனர். இந்த இலவச மருத்துவ முகாம் ஆரம்ப நிகழ்வில் நாளை காலை கலந்துகொள்ளும் இலங்கைக்கான அமெரிக்கத் தூதுவர் அதுல் கேஷாப், மாலை 4 மணியளவில் யாழ்.கிறீன்கிறாஸ் ஹோட்டலில் இரா.சம்பந்தன் தலைமையிலான தமிழ்த் தேசியக் கூட்டமைப்பின் நாடாளுமன்ற உறுப்பினர்களுடன் முக்கிய கலந்துரையாடலில் ஈடுபடவுள்ளார்.

http://malarum.com/article/tam/2016/08/13/15252/%E0%AE%85%E0%AE%AE%E0%AF%86%E0%AE%B0%E0%AE%BF%E0%AE%95%E0%AF%8D%E0%AE%95%E0%AE%A4%E0%AF%8D-%E0%AE%A