இந்தியாவில் 10 லட்சம் தொழிலாளர் வேலைநிறுத்தம்

ஊதிய உயர்வு கோரியும், அரசின் பொருளாதார சீர்திருத்தங்களுக்கு எதிராகவும் இந்தியா முழுவதும் பத்து லட்சத்துக்கும் மேற்பட்ட தொழிலாளர்கள் இன்று வெள்ளிக்கிழமை, ஒரு நாள் வேலைநிறுத்தத்தில் ஈடுபட்டுள்ளனர்.

வங்கிகள், அரசு அலுவலகங்கள் மற்றும் தொழிற்சாலைகள் மூடப்பட்டுள்ளன. பொதுப் போக்குவரத்தும் பாதிக்கப்பட்டுள்ளது.

இடதுசாரிக் கட்சிகள் பலமாக உள்ள கேரளம், மேற்குவங்கம் மற்றும் திரிபுரா மாநிலங்களில் வேலைநிறுத்தத்தின் தாக்கம் அதிகமாக உள்ளதாக அங்கிருந்து வரும் செய்திகள் தெரிவிக்கின்றன.

பொருளாதாரத்தை மீட்டெடுக்க சீர்திருத்தங்கள் அவசியம் என அரசு கூறுகிறது.

ஆனால், வங்கி, தொலைத் தொடர்புத்துறை மற்றும் பிற தொழில்துறைகளில் உள்ள தொழிலாளர்களின் தேவைகள் குறித்து அரசு அக்கறை காட்டவி்ல்லை என்று தொழிற்சங்கங்கள் குற்றம் சாட்டுகின்றன.

ஓய்வூதிய நிதியை பங்குச் சந்தைகளில் முதலீடு செய்யும் மத்திய அரசின் திட்டத்துக்கும் தொழிற்சங்கங்கள் எதிர்ப்புத் தெரிவித்துள்ளன.

பாதுகாப்பு, ரயில்வே உள்ளிட்ட முக்கிய துறைகளில், தனியார்மயமாக்கல் உள்ளிட்ட முக்கியப் பிரச்சினைகளில் தொழிலாளர்களின் கவலைகள் செவிமடுக்கப்படவில்லை என்றும், குறைந்தபட்ச ஊதியம் தொடர்பான கோரிக்கையும் கவனிக்கப்படவில்லை என மத்திய தொழிற்சங்க பொதுச் செயலர் தபன் சென் தெரிவித்தார்.

கடந்த 2014-ம் ஆண்டு மே மாதம் ஆட்சிக்கு வந்தது முதல், நரேந்திர மோடி தலைமையிலான பாரதீ ஜனதா அரசு, பொருளாதார சீர்திருத்தங்கள் தொடர்பான பல நடவடிக்கைகளை எடுத்து வருகிறது. அன்னிய முதலீட்டை ஈர்க்க தொழிலாளர் சட்டங்களிலும் பல மாற்றங்களைச் செய்து வருகிறது. நஷ்டத்தில் இயங்கும் பொதுத்துறை நிறுவனங்களின் பங்குகளை விற்கும் முயற்சியிலும் அரசு ஈடுபட்டுள்ளது.

http://www.bbc.com/tamil/india/2016/09/160902_indiabandh