உஸ்பெகிஸ்தானின் அதிபர் இஸ்லாம் கரிமோவ் காலமானார் என்பதை அந்நாட்டு அரசாங்க தொலைக்காட்சியில் அதிகாரபூர்வமாக அறிவிக்கப்பட்டுள்ளது.

தற்காலத்தில் வாழ்ந்த மிகக் கடுமையான சர்வாதிகாரிகளில் ஒருவர் என்று விமர்சகர்களால் வர்ணிக்கப்பட்டவரான அதிபர் கரிமோவின் மரணம் உஸ்பெகிஸ்தானில் எதிர்காலம் குறித்த கேள்வியை எழுப்பியுள்ளது.

கடந்த 1991 ஆம் ஆண்டு சோவியத் யூனியன் சிதறுண்டதை அடுத்து சுதந்திர உஸ்பெகிஸ்தானின் அதிபராக இஸ்லாம் அப்துகனியேவிச் கரிமோவ் தேர்தெடுக்கப்பட்டார்.

அந்தத் தேர்தலில் மட்டுமே முன்னாள் கம்யூனிஸத் தலைவரான அவரை எதிர்த்து, எதிர்கட்சியைச் சேர்ந்த ஒருவர் இயல்பாக தேர்தலில் போட்டியிட்டார்.

ஆனால் அதன்பின்னரான காலகட்டத்தில் அவரது எதிரிளும், விமர்சகர்களும் உடனடியாக கைது செய்யப்பட்டனர் அல்லது வலிந்து நாட்டைவிட்டு வெளியேற்றப்பட்டனர்.

தீவிரவாத இஸ்லாமுடன் தொடர்புடையவர்கள் என சந்தேகிக்கப்பட்ட, மத நம்பிக்கை கொண்ட ஆயிரக்கணக்கான முஸ்லிம்களை கரிமோவ் கைது செய்தார். உஸ்பெகிஸ்தான் தனது சொந்த பாணியிலான ஜனநாயகத்தை முன்னெடுப்பதாக அவர் வலியுறுத்தினார்.

ஆனால் அவர் கூறிய ஜனநாயகத்தில் பேச்சு சுதந்திரமும், மதச் சுதந்திரமும் ஒருபோதும் சகித்துக்கொள்ளப்படவில்லை.

கடந்த 1999ஆம் ஆண்டு கொலை முயற்சியிலிருந்து தப்பித்த பிறகு, அதிபர் கரிமோவ் புதிய அடக்குமுறை நடவடிக்கைகளை முன்னெடுத்தார். அது 2005 ஆம் ஆண்டு நடைபெற்ற படுகொலைகளில் முடிந்தது.

அண்டிஜான் நகரில் நடைபெற்ற கிளர்ச்சி ஒன்றை அடுத்து, அமைதியான வழியில் போராடிய நூற்றுக்கணக்கானவர்களை அரச படையினர் கொன்றதாக மனித உரிமை அமைப்புகள் கூறுகின்றன.

அவருக்கு அடுத்து யார் என்பதே இப்போதுள்ள கேள்வி? ஒரு சமயம் அவரது மூத்த மகள் குல்நாரா பதவிக்கு வருவார் எனக் கருதப்பட்டது.

ஆனால் வர்த்தக ஊழல்கள் மற்றும் ஆடம்பரமான வாழ்க்கைமுறை காரணமாக அந்த வாய்ப்பை இழந்த அவர் இப்போது வீட்டுக்காவலில் உள்ளார்.

நீண்ட காலமாக பிரதமராகவுள்ள ஷவுகத் மிர்சியேவ் மற்றும் துணைப் பிரதமர் ருஸ்தம் அஸிமோவ் ஆகியோர் அடுத்த அதிபராக வரக்கூடும் எனக் கருதப்படுகிறது.