வங்கதேசத்தில் செயல்படும் ஜமாத்-இ-இஸ்லாமி அமைப்பின் மூத்த தலைவர் மிர் காசிம் அலி நேற்று தூக்கிலிடப்பட்டார். சனிக்கிழமை இரவு 10.30 மணியளவில் கஷிம்புர் சிறையில் தூக்கிலிடப்பட்டார்.

மிர் காசிமின் குடும்பத்தினர் 22 பேரை மட்டும் சிறை அதிகாரிகள் அவரைச் சந்திக்க அனுமதித்தனர்.

கிழக்குப் பாகிஸ்தானாக இருந்த வங்கதேசம், பாகிஸ்தானிடமிருந்து விடுதலை பெறுவதற்காக கடந்த 1971-ஆம் ஆண்டு ஆயுதப் போராட்டம் நடைபெற்றது.

அந்தப் போராட்டத்தின்போது மதவாத ஜமாத் கட்சியினர், பாகிஸ்தானுக்கு ஆதரவாக அல்-பதார் என்ற ராணுவப்படையை உருகாக்கி கிளர்ச்சியாளர்கள் மீது தாக்குதல் நிகழ்த்தினர். இதனையடுத்து இவர் மீது மனிதகுல விரோதி என்ற குற்றச்சாட்டு சுமத்தப்பட்டு சிறையில் தள்ளப்பட்டார்.

ஆள் கடத்தல், சட்டவிரோதமாக சிறை வைத்தல், சித்ரவதை, பாலியல் பலாத்காரம், படுகொலை உள்ளிட்ட மனித உரிமை மீறல்களில் அவர்கள் ஈடுபட்டதாக சர்வதேச நடுவர் நீதிமன்றத்தில் வழக்குகள் நடைபெற்று வந்தன.

இதுதொடர்பான வழக்கில், சுதந்திரப் போராட்டத்தின்போது ஜமாத் கட்சிக்கு பெருமளவில் நிதியுதவி அளித்து வந்த மிர் காசிம் அலி, போர்க் குற்றங்களில் ஈடுபட்டதற்காக நீதிமன்றம் அவருக்கு மரண தண்டனை விதித்து கடந்த 2014-ஆம் ஆண்டு தீர்ப்பளித்தது.

இதை எதிர்த்து அவர் டாக்கா உயர்நீதிமன்றத்தில் மனு தாக்கல் செய்தார். கடந்த மாதம் 30-ந் தேதி அவருடைய மனுவை நீதிமன்றம் தள்ளுபடி செய்து உத்தரவிட்டது. இதையடுத்து காசிம்பூர் சிறையில் நேற்று இரவு மிர் காசிம் அலி தூக்கிலிடப்பட்டார். போர் குற்றச்சாட்டின் பேரில் வங்காளதேசத்தில் தூக்கிலிடப்படும் 6-வது தலைவர் மிர் காசிம் அலி என்பது குறிப்பிடத்தக்கது.

உடல் அடக்கம்:

காசிம்பூர் சிறையில் இருந்து அவரது உடல் பின்னிரவு 12.30 மணியளவில் ஆம்புலன்ஸ் மூலம் மானிக்கஞ்ச் மாவட்டத்தில் உள்ள அவரது சொந்த கிராமமான சலா-வுக்கு கொண்டு செல்லப்பட்டது. இன்று அதிகாலை சுமார் 3.30 மணியளவில் அவரது உடல் இஸ்லாமிய முறைப்படி அடக்கம் செய்யப்பட்டது.