லோதா கமிட்டி சீர்த்திருத்தங்களுக்கு உடன்படுவதாக தீர்மானம் நிறைவேற்றினால் மட்டுமே மாநில கிரிக்கெட் வாரியங்களுக்கு பிசிசிஐ நிதியளிக்கலாம் என்று உச்ச நீதிமன்றம் உத்தரவிட்டுள்ளது.

பிசிசிஐ-யின் கீழ் இயங்கும் 25 மாநில கிரிக்கெட் வாரியங்களுக்கு பிசிசிஐ அளிக்கும் நிதியை நிறுத்தி வைத்து உச்ச நீதிமன்றம் இன்று அதிரடி உத்தரவு பிறப்பித்தது.

தலைமை நீதிபதி டி.எஸ்.தாக்குர் தலைமையிலான அமர்வு, பிசிசிஐ செப்டம்பர் 30-ம் தேதியன்று சிறப்புக் கூட்டத்தில் முடிவெடுத்த 13 மாநில கிரிக்கெட் வாரியங்களுக்கு தலா ரூ.16.73 கோடி அளிக்கக் கூடாது என்று உத்தரவு பிறப்பித்துள்ளது.

அதாவது, லோதா கமிட்டி சீர்த்திருத்தப் பரிந்துரைகளை அதன் எழுத்து மற்றும் உணர்வு அடிப்படையில் ஏற்றுக் கொண்டு தீர்மானம் நிறைவேற்றி அந்தத் தீர்மானத்தின் நகல்களை லோதா கமிட்டிக்கும் உச்ச நீதிமன்றத்திற்கும் மாநில கிரிக்கெட் வாரியங்களின் அறிக்கையை பிசிசிஐ சமர்ப்பித்த பிறகே நிலுவையில் உள்ள ரூ.16.73 கோடி மற்றும் எதிர்கால நிதிகளை பிசிசிஐ அளிக்க வேண்டும் என்று உத்தரவிட்டுள்ளது.

மீதமுள்ள 12 மாநில கிரிக்கெட் வாரியங்களுக்கு ஏற்கெனவே பிசிசிஐ அளித்துவிட்ட ரூ.16.73 கோடியை அந்த வாரியங்கள் பயன்படுத்தக் கூடாது, அதாவது லோதா கமிட்டி சீர்த்திருத்தங்களை ஏற்று நடைமுறைபடுத்துவதாக எழுத்து மூலம் தீர்மானம் நிறைவேற்றி லோதா கமிட்டி, உச்ச நீதிமன்றத்தில் சமர்ப்பித்த பிறகுதான் அந்த நிதியை பயன்படுத்த வேண்டும் என்றும் உத்தரவில் திட்டவட்டமாகக் கூறப்பட்டுள்ளது.

மேலும் லோதா கமிட்டி சீர்திருத்த பரிந்துரைகளை எதிர்க்கும் இந்த 12 மாநில வாரியங்களும் தங்களுக்கு பிசிசிஐ அளித்த தொகையை பிக்சட் டெபாசிட் செய்து விடவேண்டும், மனம் மாறினால்தான் பயன்படுத்த முடியும் என்று தெரிவித்துள்ளது.

ஐசிசி தலைமைச் செயலதிகாரி டேவ் ரிச்சர்ட்ஸனை வலியுறுத்தி வாரியத்தில் இந்திய தணிக்கைக் கட்டுப்பாட்டு வாரிய அதிகாரி ஒருவர் இடம்பெற்றால் அது அரசு தலையீடு என்று குறிப்பிட்டு கடிதம் எழுத வைத்ததாக எழுந்த குற்றச்சாட்டுகள் குறித்து பிசிசிஐ தலைவர் அனுராக் தாக்குர் விளக்கம் அளித்து சொந்த வாக்குமூலம் சமர்ப்பிக்கவும் உச்ச நீதிமன்றம் உத்தரவிட்டுள்ளது.

வியாழனன்று உச்ச நீதிமன்றம் இது தொடர்பாக நியமித்த நம்பிக்கை உதவியாளரான கோபால் சுப்பிரமணியம் டேவ் ரிச்சர்ட்சன் விவகாரத்தை உச்ச நீதிமன்றத்தில் சமர்ப்பித்ததையடுத்து அனுராக் தாக்குருக்கு சிக்கல் எழுந்துள்ளது.

பிசிசிஐ இந்த குற்றச்சாட்டை மறுத்து டேவ் ரிச்சர்ட்சன் ‘தன்னைத்தானே குழப்பிக் கொண்டுள்ளார்’ என்று கூறியது.

இதற்கு நேற்று கேள்வி எழுப்பிய தலைமை நீதிபதி டி.எஸ்.தாக்குர், “அவர் இன்னமும் ஐசிசி சி.இ.ஓ.தானா? அவர் இதில் இழுத்துவிடப்பட்டுள்ளார் என்பதை அவர் அறிந்துள்ளாரா? பிசிசிஐ அவரிடம் கடிதம் எழுதுமாறு கூறியதாக டேவ் ரிச்சர்ட்சன் தவறான அறிக்கை வெளியிட்டாரா? என்று சரமாரி கேள்வி எழுப்பியது.

அதற்கு பிசிசிஐ வழக்கறிஞர், பிசிசிஐ ஒன்றும் ஓடிவிடவில்லை, வாக்குமூலங்களை கோர்டில் சமர்ப்பிக்கிறோம் என்று கூறியது. “தொழில்நுட்ப ரீதியாக சில தடைகள் உள்ளது” என்றது.

இதற்கு உச்ச நீதிமன்றம், “கவலைப்படாதீர்கள் உங்கள் அனைத்துத் தடைகளையும் நாங்கள் அகற்றுகிறோம். தயவு செய்து பிரச்சினைகளை வளர்க்காதீர்கள். இப்படிப்பட்ட உத்தரவுகளை நாங்கள் இடுவது ஒரு மகிழ்ச்சியான நிகழ்வாக இருக்காது. சரியான பாதையில் பயணிக்கவும்” என்று சற்று காட்டமாக தெரிவித்தது.