அ.தி.மு.க.வின் முக்கிய நிர்வாகிகளை விடுதலை சிறுத்தைகள் கட்சித் தலைவர் தொல்.திருமாவளவன் தொடர்ந்து சந்தித்து வருவதால் வரும் தேர்தல்களில் இரண்டு கட்சிகளும் கூட்டணி அமைக்கும் என்ற பேச்சு எழுந்துள்ளது.

ஆந்திர மாநில முதல்வர் சந்திரபாபு நாயுடுவை, நேற்று தமிழக முதல்வர் ஓ.பன்னீர்செல்வம் சந்தித்தார். ஆந்திர மாநிலத்திலிருந்து தமிழகத்துக்கு கிருஷ்ணா நதி நீரை திறந்து விட வேண்டும் என்று ஓ.பன்னீர்செல்வம் கோரிக்கை வைத்தார். அவரது கோரிக்கையை ஏற்ற சந்திரபாபு நாயுடு, 2.5 டி.எம்.சி தண்ணீரை திறப்பதாக உறுதி அளித்தார். இந்நிலையில் முதல்வர் ஓ.பன்னீர்செல்வத்தை விடுதலை சிறுத்தைகள் கட்சித் தலைவர் தொல்.திருமாவளவன் இன்று சந்தித்தார். பொதுச் செயலாளர் ரவிக்குமார், துணைப் பொதுச் செயலாளர்கள் எஸ்.எஸ்.பாலாஜி, வன்னியரசு ஆகியோர் சென்றனர். ஓ.பன்னீர்செல்வத்திடம், திருமாவளவன், 10 ஆண்டுகளாக சிறையில் வாடும் சிறைவாசிகளுக்கு தண்டனையை குறைக்க வேண்டும். விவசாய தொழில்களுக்கு சிறப்பு கவனம் செலுத்த வேண்டும் உள்ளிட்ட கோரிக்கைகளை வலியுறுத்தி கடிதம் கொடுத்தார்.

விடுதலை சிறுத்தைகள் கட்சி வட்டாரங்கள் கூறுகையில், "தமிழகம் வறட்சியால் கடுமையாக பாதிக்கப்பட்டுள்ளது. குடிநீர் பிரச்னையை சந்திக்க வேண்டிய நிலையில் உள்ளது. நீர்நிலைகளில் தண்ணீர் இருப்பு வெகுவாக குறைந்து விட்டது. இந்த சமயத்தில் ஆந்திர முதல்வர் சந்திரபாபு நாயுடுவை சந்தித்து தண்ணீர் திறக்க முதல்வர் ஓ.பன்னீர்செல்வம் கோரிக்கை வைத்தார். தற்போது கிருஷ்ணா நதியிலிருந்து தண்ணீர் திறந்து விட ஆந்திர அரசும் சம்மதம் தெரிவித்துள்ளது. இதுபோல தமிழகத்தின் உரிமைகளை மீட்டெடுக்க வேண்டும் என்று விடுதலை சிறுத்தைகள் கட்சி சார்பில் கோரிக்கை வைத்துள்ளோம். அதில் ஆந்திராவுக்கு சென்றதைப் போல கர்நாடகாவுக்கும் முதல்வர் ஓ.பன்னீர் செல்வம் செல்ல வேண்டும். அடுத்து கேரளாவுக்கும் ஓ.பன்னீர்செல்வம் சென்று தமிழக அரசின் உரிமைகளை பெற வேண்டும். 
தமிழகத்தில் இயற்கை பேரிடரின்போது மட்டுமின்றி விவசாய நிலங்களின் பரப்பு சுருங்கி வருவதால் சாதாரண காலங்களிலும் அதிகம் பாதிக்கப்படுவது விவசாய தொழிலாளர்கள்தான். ஊரகப்பகுதிகளில் வேலைவாய்ப்புகள் இல்லாததால் ஆயிரக்கணக்கான விவசாயத் தொழிலாளர்கள் நகரங்களுக்கு இடம்பெயர்ந்து வருகின்றனர். பிற மாநிலங்களுக்கும் பிழைப்புத் தேடி செல்கின்றனர். வேளாண் அகதிகளாக விரட்டப்படும் விவசாயத் தொழிலாளர்களுக்கு நகரங்களிலும் வேலைவாய்ப்பு கிடைக்காததால் தற்கொலை செய்து கொள்கின்றனர்.

தேசிய குற்ற ஆவண மையத்தின் (என்.சி.ஆர்.பி) சமீபத்திய அறிக்கையின்படி தமிழகத்தில் 2015-ம் ஆண்டு மட்டும் 604 விவசாயத் தொழிலாளர்கள் தற்கொலை செய்துள்ளனர். இதனால் விவசாயத் தொழிலாளர்களின் குடும்பத்துக்கு பத்தாயிரம் ரூபாய் நிவாரணம் வழங்க வேண்டும். 100 நாள் வேலைவாய்ப்புத் திட்டத்தை 200 நாட்களாக உயர்த்த வேண்டும். தொழிலாளர்களுக்கு ஊதியத்தை பணமாக மட்டுமின்றி உணவுப் பொருட்களாகவும் வழங்க வேண்டும். மீன்பிடித் தடைக்காலத்தில் வேலையின்றி இருக்கும் மீனவர்களுக்கு நிவாரணத் தொகை வழங்க தேசிய சேமிப்பு மற்றும் நிவாரணத் திட்டம் உள்ளது. அதுபோல விவசாய தொழிலாளர்களுக்கும் ஒரு திட்டம் உருவாக்க வேண்டும். விவசாயத் தொழிலாளர்களுக்கு மாதம் 3000 ரூபாய் வீதம் மூன்று மாதங்கள் வழங்க வேண்டும்" என்றனர். 

கடந்த முறை சசிகலாவை, திருமாவளவன் சந்தித்தபோது, மக்கள் நலக்கூட்டணியிலிருந்து அதன் ஒருங்கிணைப்பாளராக இருந்த வைகோ விலகி விட்டார். தற்போது விடுதலை சிறுத்தைகள் கட்சி, இரண்டு கம்யூனிஸ்ட் கட்சிகள் மட்டுமே மக்கள் நலக்கூட்டணியில் உள்ளன. இதனால் நீங்களும் அ.தி.மு.க. கூட்டணிக்கு வந்துவிடுங்கள்" என்று சொல்லியுள்ளார் சசிகலா. அதற்கு 'கட்சி நிர்வாகிகளுடன் கலந்து ஆலோசித்து விட்டு முடிவு எடுக்கிறேன்' என்று திருமாவளவன் சொல்லி இருக்கிறார். இன்று, முதல்வர் ஓ.பன்னீர்செல்வத்தை திருமாவளவன் சந்தித்தபோது, 'முடிவு செய்து விட்டீர்களா' என்ற கேள்வியை ஓ.பி.எஸ் கேட்டுள்ளார். அதற்கு சிரித்துக் கொண்டு 'விரைவில் நல்ல முடிவு எடுக்கிறேன்' என்று தெரிவித்துள்ளார் திருமாவளவன். 
 
முதல்வரை சந்தித்துவிட்டு வெளியே வந்த திருமாவளவனிடம், 'தமிழகத்தில் ஜல்லிக்கட்டு நடந்தால் ஜனாதிபதி ஆட்சிதான் என்று பா.ஜ.க. மூத்த தலைவர்களில் ஒருவரான சுப்ரமணியசுவாமி சொல்லி உள்ளாரே என்று கேட்டதற்கு,' மக்களால் தேர்ந்தெடுக்கப்பட்ட அ.தி.மு.க ஆட்சி, முழுமையாக நிறைவடையும்' என்று சொல்லி விட்டுச் சென்றுள்ளார். இதை வைத்துப் பார்க்கும்போது அ.தி.மு.க.வுக்கு திருமாவளவன் கிரீன் சிக்னல் கொடுத்து விட்டதாக தெரிய வருகிறது. விடுதலை சிறுத்தைகள் கட்சியின் நிர்வாகிகளும், தொண்டர்களும் அ.தி.மு.க.வுடன் கூட்டணி அமைக்கலாம் என்று திருமாவளவனிடம் வலியுறுத்தி வருகின்றனர். விரைவில் கூட்டணி தொடர்பாக அதிகாரபூர்வ அறிவிப்பு வெளியாகலாம் என்று எதிர்பார்க்கப்படுகிறது.