அ.தி.மு.க., பொதுச்செயலர் பதவியிலிருந்து சசிகலாவை நீக்க... முடியுமா?

அ.தி.மு.க., பொதுச் செயலராக, சசிகலா நியமிக்கப்பட்டதை எதிர்த்த மனுக்கள், தேர்தல்
கமிஷனின் பரிசீலனையில் உள்ளதால், அவரை பதவி நீக்கம் செய்ய முடியுமா, பொதுக்குழு கூடி அதிரடி நடவடிக்கை எடுக்க அதிகாரம் உள்ளதா என்ற கேள்வி எழுந்துள்ளது.
இது தொடர்பான சர்ச்சை கேள்விகளுக்கு, சட்ட நிபுணர்கள் விரிவான பதிலளித்து உள்ளனர்.

பொதுச் செயலராக இருந்த, ஜெயலலிதா மறைவுக்கு பின், அ.தி.மு.க., பொதுக்குழு கூடி, சசி
கலாவை பொதுச் செயலராக நியமித்தது. ஆனால், அ.தி.மு.க., சட்ட விதிகளின்
படி, கட்சியின் அடிப்படை உறுப்பினர்களால் தான், பொதுச் செயலர் தேர்ந்தெடுக்கப்பட வேண்டும். இந்த விதியை மாற்றவோ, திருத்தவோ முடியாது. ஆனால், சசிகலா விஷயத்தில், பொதுச் செயலரை தேர்ந்தெடுக்காமல் நியமனம் செய்துள்ளனர்.

பரிசீலனை

எனவே, சசிகலா நியமனத்தை எதிர்த்து, தேர்தல் கமிஷனில், முன்னாள் முதல்வர் பன்னீர் செல்வம் தரப்பில் மனுக்கள் தாக்கல் செய்யப்பட்டு உள்ளன. அத்துடன், கட்சியின் சட்ட திட்டங்களையும் தாக்கல் செய்து உள்ளனர். இந்த மனுக்கள், தேர்தல் கமிஷனின் பரிசீலனையில் உள்ளன.சென்னை, ஆர்.கே.நகர் இடைத்தேர்தலை முன்னிட்டு, இரட்டை இலை சின்னத்தை, இருதரப்பினரும் கோரியதால், சின்னம் முடக்கப்பட்டது.

தற்போது, பன்னீர் தலைமையிலான அணியும், முதல்வர் பழனிசாமி தலைமையிலான அணியும், இணைவதற்கான சூழ்நிலை உருவாகி உள்ளது.இருப்பினும், 'சசிகலா, தினகரன் குடும்பத்தை, கட்சியை விட்டு நீக்க வேண்டும்; ஜெ., மரணம் குறித்து, சி.பி.ஐ., விசாரிக்க வேண்டும்' என்ற கோரிக்கைகளை, பன்னீர்செல்வம் தரப்பு முன்வைத்து, அதில் பிடிவாதமாகவும் உள்ளது. அதே நேரத்தில், பொதுச் செயலர் பொறுப்பில் இருக்கும் சசிகலாவை, கட்சியில் இருந்து நீக்குவது, அவ்வளவு எளிதல்ல என்ற கருத்தும் நிலவுகிறது.

இது குறித்து, உயர் நீதிமன்ற வழக்கறிஞர், கே.சக்திவேல் கூறியதாவது:

பொதுச் செயலராக சசிகலா நியமிக்கப்பட்டது, தேர்தல் கமிஷனின் பரிசீலனையில் உள்ளது.
இந்த விஷயத்தில், தேர்தல் கமிஷன் தான், நியமனம் சரியா, இல்லையா என்ற முடிவை அறிவிக்க வேண்டும்.சசிகலா நியமனம் செல்லாது என முடிவெடுத்தால், அவரால் மேற்கொள்ளப்பட்ட அனைத்து நியமனங்களும், நீக்கங்களும் செல்லாததாகிவிடும். அதன்பின், சசிகலா, சாதாரண உறுப்பினராகி விடுவார்.

கட்சி உறுப்பினரில் இருந்து, ஒருவரை நீக்குவதை பொறுத்தவரை, எந்த பகுதியில் இருந்து உறுப்பினராக வருகிறாரோ, அந்தப் பகுதியைச் சேர்ந்த, மாவட்ட நிர்வாகியால் நீக்க முடியும்.
அதற்கு முன், முறைப்படி, 'நோட்டீஸ்' அளித்து, விளக்கம் பெற வேண்டும்.பொதுச் செயலராக நியமித்தது சரி என, தேர்தல் கமிஷன் உத்தரவிட்டால், மற்ற உறுப்பினர்கள், நிர்வாகிகளை போல, சசிகலாவை நேரடியாக நீக்கிவிட முடியாது.

ஏனென்றால், அ.தி.மு.க., விதிகளின்படி, பொதுச் செயலரை நீக்குவதற்கு, யாருக்கும் அதிகாரம் வழங்கப்படவில்லை.பொதுச் செயலருக்கு மேலான அமைப்பாக, பொதுக்குழு உள்ளது. எனவே, பொதுச் செயலரை நீக்குவது என்றால், அதை பொதுக்குழு தான் முடிவு செய்ய வேண்டும். இவ்வாறு அவர் கூறினார்.

செல்லாது

உயர் நீதிமன்ற வழக்கறிஞர், சி.திருமாறன் கூறியதாவது:

அ.தி.மு.க.,வை பொறுத்தவரை, தேர்ந்தெடுக்கப்பட்ட பொதுச் செயலருக்கு தான், அனைத்து
அதிகாரங்களும் உள்ளன. அவருக்கு கீழ் தான், பொதுக்குழு வருகிறது. கட்சி சட்ட விதிகளின்
படி, பொதுச் செயலரை நியமிக்கும் அதிகாரம், பொதுக்குழுவுக்கு இல்லை. அதனால், பொதுச் செயலராக சசிகலாவை நியமித்து நிறைவேற்றிய தீர்மானம், சட்ட விதிகளின்படி செல்லாதது
மட்டுமல்ல; எந்த அடிப்படையும் இல்லாதது.

பொதுக்குழுவில் நிறைவேற்றப்பட்ட முறையற்ற தீர்மானத்தை, அதாவது, சசிகலாவை பொதுச் செயலராக நியமித்து நிறைவேற்றிய தீர்மானத்தை, அதே பொதுக்குழுவால் தான் ரத்து செய்ய முடியும். மேலும், அவரை அடிப்படை உறுப்பினரில் இருந்தும் நீக்க முடியும்.

தேர்ந்தெடுக்கப்பட்ட பொதுச் செயலராக இருந்த, ஜெயலலிதாவால் நியமிக்கப்பட்ட அவைத் தலைவர், பொருளாளர் உள்ளிட்ட நிர்வாகிகள் அடங்கிய குழு, கட்சியை வழிநடத்த முடியும்.
அடிப்படை உறுப்பினர்களால், பொதுச் செயலர் தேர்ந்தெடுக்கப்படும் வரை, கட்சியை வழிநடத்த குழு நியமிக்கலாம்.

சசிகலா நியமனத்தை ரத்து செய்யும் போது, அவரால் மேற்கொள்ளப்பட்ட நியமனங்கள், நீக்கங்கள் செல்லாததாகிவிடும்.இவ்வாறு அவர் கூறினார்.

- நமது நிருபர் -