“இதுதான் கரெக்ட் டைம்!” - ரஜினிக்கு சிவப்புக் கம்பளம் விரிக்கும் பிரமுகர்கள்

“நான் வரவேண்டிய நேரத்தில் கரெக்டா வருவேன்” என்று டயலாக் பேசிய ரஜினியிடம், ‘அரசியலில் கால் பதிக்க இதுதான் கரெக்ட் டைம்’ என வரிசையாகச் சென்று ‘நேரம்’ குறித்துவிட்டு வருகிறார்கள் சில பிரபலங்கள்.

ரசிகர்கள் சந்திப்பு, சஸ்பென்ஸ் பேச்சு என ரஜினி மீண்டும் ஒருமுறை பரபரப்பை ஏற்படுத்தியது  முதலே, அரசியல் பிரமுகர்களும் திரையுலக நண்பர்களும் ரஜினியுடன் தனிப்பட்ட முறையில் சந்திப்பை நடத்தி வருகின்றனர். காந்திய மக்கள் இயக்கத் தலைவர் தமிழருவி மணியன்தான் இந்தச் சந்திப்புகளுக்குப் பிள்ளையார் சுழி போட்டவர். “50 ஆண்டுகளாக திராவிடக் கட்சிகளின் பிடியிலிருக்கும் தமிழகத்தை மீட்க, ரஜினி அரசியலுக்கு வரவேண்டும் என வலியுறுத்தியுள்ளோம்’’ என்றார் தமிழருவி மணியன். அதன் தொடர்ச்சியாக பலர் ரஜினியைச் சந்திக்கத் தொடங்கினார்கள். அவர்களில் சிலரிடம், ‘ரஜினி என்ன பேசினார்’ என்று கேட்டோம். 

ரஜினியைச் சந்தித்த இந்து மக்கள் கட்சியின் தலைவர் அர்ஜுன் சம்பத், ‘‘அரசியல் மற்றும் ஆன்மிகம் குறித்து அவரிடம் பேசினோம். ‘தமிழக அரசியலில் ஒரு வெற்றிடம் ஏற்பட்டுள்ளது. அந்த வெற்றிடத்தை நிரப்ப வேண்டும். அதற்கு அரசியல் களத்துக்கு வரவேண்டும்’எனச் சொன்னேன்.அதை அமைதியாகக் கேட்டுக்கொண்டார். அரசியலுக்கு வருவதன் சாதக, பாதகங்கள் குறித்துக் கேட்டார். ரஜினியின் மனதில் நதிநீர் இணைப்பு பற்றி  திட்டம் இருந்துவருகிறது. இப்போதைக்குத் தென்னக நதிகளையாவது இணைக்க வேண்டும் என்ற விருப்பம் உள்ளது. அரசியலில் இறங்கும்போது தனிக்கட்சியைத்தான் தொடங்குவார்” என்றார்.

ரஜினியைச் சந்தித்த  நடிகை கஸ்துாரியிடம் கேட்டோம்.  “சமீபத்தில் ரஜினி அரசியல் வாய்ஸ் கொடுத்தப்போ, நான் அவருக்கு எதிரா ட்வீட் பண்ணினேன். அதற்கு நிறைய எதிர்ப்பு வந்தது. அதற்கான விளக்கத்தைப் பேட்டிகள் மூலமா தெளிவுபடுத்தினேன். ரஜினி என்ன பண்ணினாலும் அதை முழு மனசோடு வரவேற்கிற, அவரோட தீவிரமான ரசிகர்கள் ஒருபக்கம் இருக்காங்க. அதே சமயம், அவருடைய நிலைப்பாடுகள் குறித்தும் செயல்பாடுகள் குறித்தும் சரியான புரிதல் இல்லாம நிறைய கேள்விகளோடு காத்துக்கிட்டிருக்கிற ரசிகர்கள் மறுபக்கம் இருக்காங்க.

எனக்கு ஏற்பட்ட சந்தேகங்களை அவரிடம் நேரடியாகவே கேட்டேன். அவர் அரசியலுக்கு வரப்போறது நிதர்சனம். அந்த முடிவுக்கு அவர் வந்துவிட்டார். அதை என்கிட்ட சொன்னார். அவர் அரசியலுக்கு வர்றதை நானும் மனப்பூர்வமா வரவேற்கிறேன். நானும் அவருடைய உண்மையான ரசிகைதான்” என்றார்.

ரஜினியைச் சமீபத்தில் சந்தித்த லதாவிடம், ரஜினி தன் அரசியல் பிரவேசம் குறித்து என்ன சொன்னார் எனக் கேட்டோம். ‘‘ஜெயலலிதாவின் மறைவுக்குப் பிறகு தமிழக அரசியலில் ஏற்பட்டுள்ள சூழ்நிலைகள்தான் அவரை அரசியல் குறித்து யோசிக்கவைத்துள்ளது. சில மாதங்களுக்கு முன்பே அவருக்கு முக்கிய கட்சி ஒன்றிலிருந்து அழைப்பு வந்தபோது, ‘வேறு கட்சியில் இணைந்து பணியாற்றும் மனநிலையில் நான் இல்லை’ என்பதைச் சொல்லிவிட்டார்.

தமிழக அரசியல் களம் அவருக்குப் புரியாத ஒன்றல்ல. அரசியலுக்கு வந்தால், நண்பர்களாக இருக்கும் பலரும் தன்னை விமர்சிக்கும் சூழ்நிலை வருமே என்ற தயக்கம் அவரிடம் உள்ளது. ஆனாலும், தமிழக மக்களுக்கு ஏதாவது செய்ய வேண்டும் என்று ஆர்வத்தில்தான் அரசியல் குறித்துப் பலரிடமும் பேசிவருகிறார். அவர் அரசியலுக்கு வருதற்கு இது நல்ல நேரம். வேறு கட்சிகளில் இணையாமல் தனியாகக் கட்சி ஆரம்பித்தால் நல்லது என்று நானும் சொன்னேன். விரைவில் அவரே இதுகுறித்து வெளிப்படையாகப் பேசுவார்’’ என்றார்.

மே மாதம் ரசிகர்கள் சந்திப்பு முடிந்தபிறகு ‘காலா’ ஷூட்டிங்குக்காக மும்பை சென்றார் ரஜினி. ஷூட்டிங் முடிந்து திரும்பியபிறகு இந்தச் சந்திப்புகள் அதிகமாகி இருக்கின்றன. தன்னைச் சந்திக்க வரும் அனைவரிடமும் நீண்ட நேரம் பேசும் ரஜினி, ‘‘நான் அரசியலுக்கு வந்தால், அதன் விளைவுகள் எப்படி இருக்கும்?’’ என்ற கேள்வியை மறக்காமல் கேட்டு பதில் வாங்குகிறாராம். ஆனால், தன் குடும்பத்தில் யாரிடமும் மறந்தும்கூட அரசியல் பற்றிப் பேசுவதில்லையாம். அதனால், ரசிகர்கள் போலவே ரஜினியின் குடும்பத்தினரும் குழப்பமாகவே இருக்கிறார்கள்.

http://www.vikatan.com