பிரிட்டிஷ் அரசாங்கத்தின் ஆணைக்குஎதிராக தடை உத்தரவு பெற்ற இந்திய மருத்துவர்கள்

பிரிட்டிஷ் அரசாங்கத்தின் ஆணைக்குஎதிராக தடை உத்தரவு பெற்ற இந்திய மருத்துவர்கள்

ஆகஸ்ட் முதல் திகதிக்குப் பிறகு பிரிட்டனில் தங்க `விசா' இல்லாத ஐரோப்பியர் அல்லாத டாக்டர்களை வேலைக்கு எடுக்க வேண்டாம் என்று பிரிட்டிஷ் அரசின் சுகாதாரத்துறை பிறப்பித்த ஆணைக்கு தடை உத்தரவு பெற்றுவிட்டனர் அங்கு சென்றுள்ள இந்திய வம்சாவளி டாக்டர்கள்.

எத்தனை சோதனைகள் வந்தாலும் பிரிட்டனில் டாக்டராகப் பணிபுரிந்தே தீருவது என்ற முடிவோடு உள்ள டாக்டர்கள், அந் நாட்டு அரசு அடுத்தடுத்து ஏற்படுத்திவரும் சட்டத்தடைகளை மனம் தளராமல் உடைத்துக் கொண்டே வருகின்றனர்.

பிரிட்டனில் வேலைபார்த்தால் கௌரவம், பணம் அதிகம் கிடைக்கும் என்பதையெல்லாம்விட தங்களுடைய படிப்புக்கும் திறமைக்கும் அது பெருத்த அங்கீகாரம் என்று நினைப்பவர்கள் கணிசமாக இருக்கின்றனர். எனவே சமீப காலமாக இது பெரிய நிழல் யுத்தமாகவே நடைபெற்று வருகிறது.

நிறவெறி, இனவெறி போன்ற பாகுபாட்டையெல்லாம் களைந்து விட்டதாகக் கூறிக் கொண்டாலும் பிரிட்டனில் வெளிநாட்டவரை,அதிலும் குறிப்பாக, ஆசியர்களை மேலும் குறிப்பாக, இந்தியர்களை வேலைக்குச் சேர்ப்பதைத் தவிர்ப்பது எப்படி என்பது தான் பிரிட்டிஷ் ஆட்சியாளர்களின் சிந்தனையாகவே இருக்கிறது.

பிரிட்டிஷ் அரசின் சுகாதாரத்துறையில் 22,000 டாக்டர்கள் பதவி நிரப்பப்படாமல் உள்ளனர். இவற்றுக்கு பிரிட்டனிலேயே பிறந்த டாக்டர்களைத் தவிர ஐரோப்பிய நாடுகளைச் சேர்ந்தவர்களும் ஆசிய நாட்டவர்களும் நியமிக்கப்படுகின்றனர்.

இந்தியாவில், சர்வதேசத் தரத்தில் உள்ள நன்கு அங்கீகரிக்கப்பட்ட மருத்துவக் கல்லூரிகளில் படித்து முறையான பயிற்சி முடித்த டாக்டர்கள் பிரிட்டனில் பணிபுரிய அங்கு சென்று பதிவு செய்து கொண்டு காத்துக் கிடக்கின்றனர்.

முதலில் 22,000 பணியிடங்களுக்கும் பிரிட்டனில் பிறந்தவர்களுக்கும் பிற ஐரோப்பிய நாடுகளில் பிறந்தவர்களுக்கும் முன்னுரிமை என்று கூறப்பட்டது. இந்தியாவில் பிறந்து, படித்து டாக்டர் பட்டம் வாங்கியவர்கள் சங்கம் அமைத்து அதை முறியடித்தனர். அடுத்தபடியாக ஆகஸ்ட் முதல் திகதிக்குப் பிறகும் பிரிட்டனில் தங்கியிருக்க விசா பெற்றவர்களுக்குத்தான் வேலை என்று கூறப்பட்டது. இது குறித்து இந்திய டாக்டர்கள் சங்கம் கேட்டபோது, அப்படியெல்லாம் இல்லை. யாருக்கெல்லாம் வேலை நியமன உத்தரவு கிடைக்கிறதோ அவர்களுக்கெல்லாம் வேலை நிச்சயம் என்று சமாதானம் கூறப்பட்டது.

மார்ச் 2 ஆம் திகதி இந்திய டாக்டர்கள் சங்கம் , சுகாதாரத்துறை அதிகாரிகளிடம் எழுத்து பூர்வ உத்தரவாதத்தைக் கேட்டது. அன்று மாலையே தருவதாகக் கூறிய அதிகாரிகள் அப்படித் தராமல் பின்வாங்கி விட்டனர். இதை அடுத்து சங்கத்தினர் நீதிமன்றத்தை அணுகினர். நீதிபதி விலகி இதை விசாரித்து அரசின் உத்தரவுக்கு தடை விதித்தார்.

ஆகஸ்ட் 1 ஆம் திகதிக்குப் பிறகு செல்லுபடியாகக் கூடிய விசா இல்லாத ஐரோப்பியர் அல்லாத டாக்டர்களையும் நேர்முகத் தேர்வுக்கு அழைக்க வேண்டும். அவர்களுக்கும் பணி நியமன ஆணை அளிக்க வேண்டும். இந்த விசா திகதி அதற்கு எந்த வகையிலும் இடையூறாக இருக்கக் கூடாது என்று தீர்ப்பளித்தார்.

இது எங்களுக்குக் கிடைத்திருக்கும் சிறு வெற்றி இன்னும் நேர்காணல் முடிந்து பணி நியமனக் கடிதம் வரும்போது தான் முழு வெற்றி கிட்டும் என்று இந்திய டாக்டர்கள் சங்கத்தின் தலைவர் ரமேஷ் மேத்தா, துணைத் தலைவர் ராமன் லட்சுமணன் ஆகியோர் தெரிவித்தனர்.