இலங்கையுடன் கூட்டு ரோந்துக்கு இந்தியா சம்மதிக்கக் கூடாது: ஜெயலலிதா வற்புறுத்தல்

சென்னை, மார்ச்.23-: இலங்கையுடன் கூட்டு ரோந்துக்கு இந்தியா சம்மதிக்கக் கூடாது என்று ஜெயலலிதா கூறினார்.

தமிழக சட்டசபை கூட்டம் நேற்று தொடங்கியது. சட்டசபை கூட்டத்தில் அ.தி.மு.க. எம்.எல்.ஏ.க்கள் எவ்வாறு நடந்து கொள்ள வேண்டும் என்பது பற்றிய ஆலோசனை கூட்டம் அ.தி.மு.க. தலைமை அலுவலகத்தில் நேற்று நடைபெற்றது. கூட்டம் முடிந்ததும் ஜெயலலிதா நிருபர்களுக்கு பேட்டியளித்தார். அப்போது நிருபர்கள் கேட்ட கேள்விக்கு அவர் அளித்த பதில் வருமாறு:-

கேள்வி:- தமிழக பட்ஜெட் கூட்டத் தொடரில் சட்டசபையில் உங்கள் கட்சியின் நிலைபாடு என்ன?

பதில்:- தமிழக பட்ஜெட் கூட்டத் தொடர் தொடங்கியுள்ளது. பட்ஜெட்டை தாக்கல் செய்ய இருக்கிறார்கள். எங்கள் கட்சியின் அணுகுமுறை போக போக தெரியும்.

கேள்வி:- சட்டசபை கூட்டத்தில் நீங்கள் கலந்துகொள்வீர்களா?

பதில்:- அதுவும் போக போக தெரியும். சட்டசபையில் பேச வாய்ப்பு கொடுப்பதில்லை. சில அடிப்படை மரபுகள் நடைமுறைகள் ஆகியவற்றை கடைப்பிடிப்பது இல்லை. பெண் எம்.எல்.ஏ.க்களுக்கு கூட மரியாதை கெடுப்பதில்லை. ஆளுங்கட்சிக்கு பிடிக்காத கருத்தை யாராவது சொன்னால் கண்ணியமான வார்த்தைகளால் பேசினால் கூட அவை குறிப்பில் இருந்து நீக்கப்படுகிறது.

ஆளுங்கட்சி உறுப்பினர்களுக்கு ஆளுங்கட்சிக்கு பிடித்த மாதிரி எதிர்கட்சி உறுப்பினர்கள் பேச முடியாது. எதிர்கட்சி தலைவர், அரசிடம் உள்ள குறைகளை சுட்டிக்காட்டி தான் பேசுவார். அது தான் எதிர்கட்சி தலைவரின் கடமையும் கூட. ஆனால், அப்படிப்பட்ட கருத்துக்களை சொல்கின்ற போது முதல்-அமைச்சருக்கு பிடிக்காத கருத்துக்களை சொல்கின்ற போது அனைத்து ஆளுங்கட்சி எம்.எல்.ஏ.க்களும் எழுந்து நின்று கூச்சல் போட்டு குறுக்கீடு செய்கிறார்கள். பேச விடாமல் செய்கிறார்கள்.

கேள்வி:- இது போன்ற காரணங்களுக்காக நீங்கள் அவையை புறக்கணித்தால்...?

பதில்:- நான் அவையை புறக்கணிக்கவில்லை. புறக்கணிக்க வேண்டும் என்ற எண்ணமும் எனக்கு இல்லை. ஆனால், என்னை பேச விட வில்லை என்றால் நான் என்ன செய்வது.

கேள்வி:- சட்டசபை கூட்டத் தொடரில் பாட்டாளி மக்கள் கட்சிக்கும், அ.தி.மு.க.வுக்கும் இடையே ஒருங்கிணைப்பு இருக்குமா?

பதில்:- அது பற்றி நான் இப்போது எதுவும் சொல்ல முடியாது. எங்களை பொறுத்த வரையில் நாங்கள் அரசின் குறைபாடுகளை சுட்டி காட்டுவோம். அவ்வளவு தான்.

கேள்வி:- சில்லரை வணிகத்தில் வெளிநாட்டு நிறுவனமும், பன்னாட்டு ஏகபோக நிறுவனங்களும் வியாபாரம் செய்வதால் ஏழை மக்கள் பாதிக்கப்படுவார்கள் என்று பா.ம.க. கட்சி சொல்லும் இதே கருத்தில் நீங்களும் ஒருமித்த கருத்துடையதாக இருக்கின்றீர்களே? எனவே அ.தி.மு.க., பா.ம.க. இணைந்து செயல்படுவதற்கான வாய்ப்பு இருக்கின்றதா?

பதில்:- நாங்கள் எந்த ஒரு கருத்தையும் இன்னொரு கட்சியுடன் உடன்பட வேண்டும் என்பதற்காக சொல்லவில்லை. பொதுமக்களை பாதிக்கின்ற பிரச்சினையை தான் வெளிபடுத்துகிறோம். அப்படி கூறும் போது மற்றவர்கள் கருத்துடன் ஒன்றாக இருந்தால் எதாவது ஒரு முடிவை நீங்களாக எடுக்கலாம். ஆனால், அப்படி ஒரு ஆழமான கற்பனைக்குள் நீங்கள் செல்ல வேண்டாம் என்று நான் விரும்புகிறேன்.

கேள்வி:- தமிழக மீனவர்கள் இலங்கை கடற்படையினரால் தாக்கப்படுவதை தடுக்க தமிழக கடற்படையினரும், இலங்கை கடற்படையினரும் கூட்டாகச் சேர்ந்து ரோந்து பணியில் ஈடுபடப்போகிறார்கள் என்று கூறப்படுகிறதே ?

பதில்:- இது மிகவும் ஆபத்தான விஷயம். இதற்கு இந்தியா சம்மதிக்கவே கூடாது. நம்முடைய இந்திய கடற்படை அங்கு அதிகமாக ரோந்து பணியில் ஈடுபட வேண்டும். இலங்கையின் உள்நாட்டு பிரச்சினைகளில் இந்தியா தன்னை ஈடுபடுத்தி கொள்ளக்கூடாது.

கேள்வி:- தமிழக மீனவர்களை காப்பாற்ற இலங்கை கடற்படையும், இந்திய கடற்படையும் கூட்டாக ரோந்து பணியில் ஈடுபடாவிட்டால் எப்படி மீனவர்களை காப்பாற்ற முடியும் என்று நினைக்கின்றீர்கள்?

பதில்:- தமிழக மீனவர்களை காப்பாற்றும் பிரச்சினைக்கு தீர்வு கூட்டு ரோந்து அல்ல. நமது கடல் பகுதியில் இந்திய கடற்படை தனது ரோந்து பணியினை இன்னும் அதிகப்படுத்த வேண்டும்.

இவ்வாறு ஜெயலலிதா கூறினார்.

விகடன்.கொம்

ஜெயலலிதா வாழ்க!