8 மாதங்களில் 3 இலட்சத்து 40 ஆயிரம் தமிழர்கள் இடப்பெயர்வு

ஞாயிறு 25-03-2007 00:57 மணி தமிழீழம் [தாயகன்]

8 மாதங்களில் 3 இலட்சத்து 40 ஆயிரம் தமிழர்கள் இடப்பெயர்வு

தமிழர் தாயகத்தில் சிறீலங்காப் படையினரின் தாக்குதல்கள் காரணமாக கடந்த 8 மாத காலத்தில் 3 இலட்சத்து 40 ஆயிரத்துக்கு மேற்பட்ட மக்கள் இடம்பெயர்ந்து அல்லல்ப்படுகின்றனர்.

கடந்த ஓகஸ்ட் மாதத்தின் பின்னர் யாழ் குடாநாட்டில் முன்னரங்க நிலைகளில் இருந்து ஆயிரக் கணக்கில் மக்கள் இடம்பெயர்ந்து, முல்லைத்தீவு, கிளிநொச்சி மாவட்டங்களில் தற்காலிகமாகக் குடியேறியுள்ளனர்.

திருகோணமலை மாவட்டத்தில் சிறீலங்காப் படையினர் மேற்கொண்ட தாக்குதல்களால் கடந்த ஏப்ரல் மாதம் முதல் இடம்பெயர்ந்த மக்கள் மட்டக்களப்பு, அம்பாறை மாவட்டங்களில் தங்கியுள்ளனர்.

வவுனியாவில் இந்த ஆண்டிலேயே அதிகளவு மக்கள் இடம்பெயர்ந்துள்ளனர்.

மட்டக்களப்பு மாவட்டத்தில் அண்மையில் மேற்கொள்ளப்பட்ட ஆக்கிரமிப்பு நடவடிக்கைகள் காரணமாக இலட்சக் கணக்கான மக்கள் இடம்பெயர்ந்து அவல வாழ்வு வாழ்ந்து வருகின்றனர்.

மட்டக்களப்பில் ஒரு இலட்சத்து 53 ஆயிரம் பேரும், யாழ்ப்பாணத்தில் 55 ஆயிரம் பேரும், முல்லைத்தீவில் 40 ஆயிரம் பேரும், கிளிநொச்சியில் 25 ஆயிரம் பேரும், திருகோணமலையில் 20 ஆயிரம் பேரும், வவுனியாவில் 12 ஆயிரம் பேரும், அம்பாறையில் 10 ஆயிரம் பேரும், மன்னாரில் 5 ஆயிரம் பேரும் இடம்பெயர்ந்துள்ளனர்.

பதிவு.கொம்